Hungry Lobster (已結業)

最近食龍蝦食上癮，今日再去呢間好出名食龍蝦既Hungry Lobster食龍蝦大餐。我地叫左一個飢餓龍蝦全餐share。有法式龍蝦湯，烤全隻波士頓龍蝦，龍蝦意粉，龍蝦包，配薯條同沙律，好豐富呀。首先上既係龍蝦湯配蒜蓉包，龍蝦湯味道好濃，好creamy，蒜蓉包好香脆，仲搽滿蒜蓉醬，非常香口。烤龍蝦既肉好紮實同有嚼勁，非常鮮甜。最鐘意就係佢既龍蝦包，佢既包係牛油軟包，內外都搽滿左牛油去烘，令到成個包都充滿住牛油香，外脆內軟，入面仲夾左好多龍蝦肉，有成兩隻龍蝦鉗咁多阿。另外薯條係粗切，炸到熱辣辣，仲有好香嘅胡椒味。沙律都幾新鮮。龍蝦長通粉嘅通粉都幾彈牙，個汁味道都幾濃，仲有個龍蝦頭伴碟，入面有好多蝦膏，份量都幾多。食到有少少頸渴，就叫左一樽Pompelmocello啤酒。店員話呢款啤酒襯埋龍蝦包一齊飲就最夾。呢款啤酒有酸酸既西柚味，味道好香好清新，都幾特別。Hungry Lobster果然無令我地失望，等我下次又帶朋友黎食先！