富山和食料理屋 (已結業)

大埔區呢類日式食肆唔多，不過富山係一個唔錯選擇。可能由於附近冇乜日式食肆，呢度好多時都好多人，平日七點未夠已經開始要等位，假日就更加多人。一入到去，感覺上已經有的似和民，不過睇下個菜牌就冇和民咁多野食。今次我六點五十分去到，安排左我坐BAR檯位，唔使等冇乜所謂，仲可以見到壽司師父握壽司，雖然我對刺身冇興趣，但睇落好似幾新鮮。今次叫左四樣野，一份富山蛋包飯（$33）、一個土佐豆腐（$25）、一個炭火汁烤鴨胸（$33）同一個野菌釀雞卷（$28），比和民經濟少許。講下味道，蛋包飯蛋皮煎得唔錯，蛋皮有厚度，入面未完全熟晒，所以入口較滑，飯同蔬菜粒一齊炒，略為硬少少，汁只係普通茄汁，同在日本的蛋包飯專門店比較就差好遠喇！土佐豆腐只有三件，由於豆腐本身較淡，汁就需要較濃味，呢點做得唔錯。炭火汁烤鴨胸同野菌釀雞卷兩樣小食，鴨胸好多好大碟，有炭燒香味，不過食落較韌，至於野菌釀雞卷，由於材料屬於普通，味道已算不俗。環境上，檯比較迫，論舒適就唔及和民，不過都算幾企理，服務方面就合格水準，唔算十分出色。