Involtini Italian Cuisine

營業中

休息中

知道佢手整意粉。想試佢好耐。無奈佢實在太受歡迎。好鬼難book，一路都冇試過。結果一個月前book 終於book 到星期五晚食。入面比想像中細。唔怪得咁難book. 但檯嘅距離都唔錯，加埋膠板都食得安心。4個人叫咗2個頭盤，3個主菜，2個甜品。全部都屬於幾好至好正嘅水平。頭盤較鐘意雪蟹肉沙律。勁多蟹肉，雖然蟹肉唔屬於好鮮甜，但連埋啲魚子同青瓜食夠清新，啱曬近排天氣食。Carbonara 真係堅高質，意粉al dente，食得出係手工意粉，個汁好有蛋香，但又唔會覺得好heavy, 成碟嘢有響意大利食意粉嘅感覺，好想食多碟。紅蝦意大利飯個飯都做得好好，飯煮得剛好，唯獨是蝦味唔突出。甜品反而個蘋果批好過tiramisu. 可能出面太多地方整tiramisu 都做到呢個水平，佢呢個反而冇乜特別。 蘋果批係淋嗰隻，好在蘋果多，甜而不膩，加埋唔太甜嘅雲呢拿雪糕真係一流。總結：食得過。必食carbonara。