Boon (已搬遷) 新店位置

今晚唔知食乜好，search 下附近睇下有咩Cafe 想試，見到呢間評分高，價錢ok, 試下啦。上到去，先講下環境，因為呢一晚滿座，我被安排在靠窗中間，左右都係人，間距明顯唔足夠，二人枱放唔到袋，建議去都係帶斜揹廢包比較方便，好在店員好肯俾凳。食物方面，我地叫左封門柳， 蟹粉蟹肉意粉＆明太子薯條，明太子薯條：明太子醬灑滿表面，賣相好，份量多，但醬偏咸，建議多幾個人叫淺嚐比較好； 蟹粉蟹肉意粉，味道唔錯但比較單一，扁意粉可以煮淋啲，如果可以加兩條蘆筍會更滿足；封門柳，牛肉味道質地都ok，但外層大火煮乾少少，裡面還好，份量比較少（6片），旁邊椰菜及薯蓉份量好多。成餐飯食完感受好深係好熱好迫，冷氣唔夠，食物唔難食但冇乜驚喜，可能叫嘅食物冇乜汁，又太多澱粉質，食完好滯，完全食唔落甜品，可惜。呢度整體表現一般，冇叫飲品，見到好多人叫沙冰感覺吸引，tea time去飲杯野應該會唔錯。