唐記包點 (港鐵烏溪沙站)

營業中

休息中

今晚OT到差不多夜晚八點，個人攰到一個點就係會係馬鐵訓著，一起身已經到總站烏溪沙！！懷著頹喪心情，諗住醫埋肚先走，行左一個圈，係又攰又肚餓之下，最後揀左唐記包點外賣，爭取時間返屋企坐定定繼續工作⋯⋯真係堅餓，叫左一飯一包一點心，一拎到個包時，就算天氣稱不上寒冷都感到超溫暖，令我更有動力加快腳步去搭車返大水坑享用。影完一幅相之後即刻開餐，啲食物仲暖的。茶肉包品質仍然保持到水準，餡多、調味適中，不會太鹹；燒賣上有枸子，成日要OT的我同自己講可以順便養生，同埋咁樣食無咁齋，食物味道層次多左；蒸飯要求了走豉油，因為食開雞同北菇已夠味，每一次食佢地個蒸飯，都好感恩佢地提供埋菜，有機會補充下纖維。如果唐記高層睇到呢篇食評，請問可唔可以考慮係富安花園開間分店，做我地呢啲成日OT無飯的人生意。