近年唔少人為咗環保或者健康，而開始茹素或者彈性素（Flexitarian）。而無論你每日食素、逢星期一食素，定係陪朋友或者屋企人食素，袋定一兩間新派素食餐廳，約飯局就更方便啦。
入門素食 Cafe 我行我素 
圖：黑沙環中街呢間 Cafe 好啱食素新手入門，或者平時無茹素習慣嘅朋友去試，皆因餐廳會用唔同食材、包括植物肉去製作大家耳熟能詳嘅美食！例如台式紅燒素牛肉麵、純素西多士、新餐肉滑蛋丼飯等，餐牌上亦會細心地標明是否含有五辛、奶製品或者雞蛋。
Fusion 創意素食 D'light Dessert Cafe
圖：請注意，呢間西餐 Cafe 嚴格嚟講唔係素食餐廳，但佢哋嘅素食選擇佔 Menu 約一半，比一般餐廳多好多！原來餐廳主廚有一位茹素嘅媽媽，就開始研究唔同素食，而且配搭新穎，好似素鹹魚新豬肉忌廉意大利飯、素吞拿鳳梨水蜜桃薄餅等，風味只此一家。
驚喜無菜單料理 八分目
圖：餐廳名嚟自日本俗語「腹八分目」，即係食到八分飽就好，保留二分空腹更惬意。小店供應無菜單嘅素食料理，午市供應定食同輕食為主，最近有牛油果刺身丼。晚市就係預約制，如果有特別要求，例如要走蛋奶或五辛，或者有食物敏感都可以請餐廳安排。