譚家魚翅 (已結業)

星期日晚一行4人諗住去搵好野食,行到福隆新街見到有個亞姐周圍向人推介緊唔知乜野,好奇心之下走去睇下,見個位亞姐著住"譚家魚翅"既制服係處介紹間食店,一睇見係食魚翅,心諗會唔會好貴,不過個位亞姐即刻俾張餐牌我地睇,依~~價錢可以接受喎,不過又諗會唔會將貨就價又或者好難食,個位亞姐見到我地個表情有疑惑,於是就解釋話呢間店係做"海味批發"所以d魚翅價格平之餘品質都有保證,於是抱住一試既心態走去睇下,一入門口就只見到好多海味,跟住再落一條好短既樓梯,見到一處好光猛而唔係太多枱既飯店,大約有6-7張左右,但一d都唔會逼,跟住待應奉上一壺茶倒俾我地,招呼幾好,跟住俾個餐牌我地點菜仲極力推介價值$38既"魚翅撈飯"...嘩~~$38既"魚翅撈飯"真唔真呀,咁落力既推介咪試2個啦,另外個店長"譚先生"介紹我地試"冰山鹽炖雞"係凍食既,另外叫左一個"雲腿津白"..第一碟上既係"冰山鹽炖雞",我覺得味道好過普通"鹽焗雞,因為係冷盤天氣熱食就正...再隔左一陣二鍋滾熱辣既"魚翅"就放左枱上,一睇...依,真係有翅嫁,雖然唔多但$38呢個價錢去食,可以算係超值,跟住當然係奉上白飯啦,我自己覺得同白飯分開食唔好