主打健康地中海飲食概念嘅“Cafe Bonita”，於木的地．R三樓全新登場喇！餐廳貫切木的地酒店嘅西班牙風格，環境舒適富有空間感，仲有戶外空間可以隨時出去散步唞氣，好chill啊。酒店更設瑜伽中心提供各種瑜伽及頌缽工作坊，就算唔係酒店住客都可以參加，做完運動嚟食健康嘢就啱晒喇。
廚師團隊以西班牙美食為靈感設計多款菜式，提供半自助早餐、午餐同單點菜式，午餐最平只係$88起，另有加一收費，性價比高，值得試吓。
注入地中海飲食模式的西餐 午市套餐 $88起
廚師每日都會喺本地街市挑選新鮮食材，主要以橄欖油、香草、海鮮、蔬菜入饌，炮製健康好食嘅菜式。午餐時段會供應「兩道菜精選午市套餐」，每星期都會轉換頭盤同主菜，午餐仲會送咖啡或茗茶㖭。留意返，呢度嘅茗茶特以名牌茶葉沖泡一壺好茶，想飲其他特色茶仲有甚少見嘅煙燻茶葉、有機茶葉選擇，比坊間沖製茶包更高享受，好推薦大家趁價錢相宜嘅午市套餐一試。
主菜亦有多款選擇，包括招牌西班牙海鮮飯、沙律碗、精選意大利粉或意大利飯同埋扒類，總有一款啱你口味。
招牌西班牙海鮮飯
提到西班牙菜，點少得呢款經典菜式呢！以多種海鮮入饌，包括：青口、鮮蝦、魷魚等，依西班牙傳統做法煮得creamy惹味，可以一口氣食到大海嘅味道啊！
焗杏仁蒜香比目魚甜菜根燴意大利飯
呢度嘅意大利飯都好有心思，以紅菜頭燴製意大利飯，令飯粒沾滿天然奪目嘅紫紅色，淨係顏色已經夠搶眼啦！配埋煎得焦香嘅肥美比目魚，極富魚油香。
豐富雜錦沙律碗
平時想食得輕盈啲，呢度以素食為主嘅沙律都好豐富！以色彩繽粉嘅蔬果吸引眼球，再加入自家製醬汁，食落清新又唔怕口寡寡。更可追加煙三文魚 或 蒜香蝦補充優質蛋白質，係健康無負擔嘅好選擇。
單點菜單 | 地道西班牙小食+特色甜品
單點菜單有多款地道西班牙美食，包括當地西部嘅特色脆炸田雞腿、招牌甜品肉桂油條、傳統西班牙炸牛奶同西班牙肉桂多士等，難得喺香港都食到歐洲風味啊。
西班牙西部地道小食脆炸田雞腿
原來西班牙都有炸田雞㗎～師傅會將田雞腳蘸上薄薄一層粉漿，落油鑊炸到外脆內香，田雞肉仲好柔軟，唧埋檸檬汁提鮮仲好食。
西班牙油條（Churros）
相信大家對Churros呢款地道西班牙甜品唔陌生，金黃香脆嘅油條炸到超香口。食落脆卜卜，表面沾滿肉桂粉，香氣十足！
西班牙炸牛奶（Leche Frita）
當地招牌甜品大多以炸物為主，好似呢款Leche Frita都唔例外。薄脆炸衣包裹香滑軟綿嘅鮮奶，外脆內軟。趁熱食嘅話，仲會食到冰火交融嘅衝擊～
西班牙肉桂多士（Torrijas）
鍾意肉桂嘅你唔可以錯過呢度嘅多士喇！西多士烤至金黃色，賣相好吸引，外層微脆而內裡鬆軟。表面加上時令生果，如士多啤梨、藍莓、焦糖香蕉等作配搭，食落更開胃清新。最後再灑上肉桂粉，昇華咗成個甜品嘅層次啊！
搜羅各地精品咖啡及茗茶 口味多元化
Cafe Bonita對咖啡嘅出品都好有要求㗎，呢度會定期供應世界各地搜羅嘅精品咖啡豆，如巴西、哥倫比亞等地，盡量滿足咖啡迷嘅口味。特別一提嘅係，餐廳即將推出由雲南省普洱市孟連縣引入嘅高海拔單品（SOE）咖啡豆，入口濃郁並伴隨堅果同黑朱古力尾韻，層次好豐富，只要叫任何咖啡加$8就可以升級飲到喇。
除咗意式咖啡，呢度一樣飲到帶堅果風味嘅巴西黃波旁，同埋富果香嘅哥倫比亞卡杜拉手沖咖啡，每杯$68，性價比幾高！唔想飲啡，亦有多款健康養生嘅有機茗茶，包括沉香茶、毛尖綠茶、松煙香小種紅茶等都嘆到。下午茶簡單食件自家製英式鬆餅已經好chill，啱晒愛茶之人靜落嚟享受慢活節奏。
營業時間
每日上午7時30分至下午6時，各段用餐時間如下： |
Cafe Bonita
地址：九龍佐敦長樂街19號木的地．R 三樓
電話：21219867
WhatsApp: 57222847