MUTA Restaurant by ATUM (Closed)

今日同朋友喺尖沙咀行街，行到有啲肚餓，見到有間新餐廳，個set lunch又好多選擇，於是就入去試吓。Set lunch 價錢由百頭到差唔多二百蚊都有，包一杯飲品。如果想加小食，都係幾十蚊就有交易，CP值幾高！我偏重口味，揀咗佢地嘅沖繩風味塔可牛肉飯（$138）。塔可醬汁似Mexican Chili，微微辣，混合特製香料，味道濃郁。牛肉碎口感綿滑，伴碟有好多新鮮沙律菜，可平衡味道。朋友想清淡D，揀咗香蔥芝麻吞拿魚蓉飯（$138），米飯口感蓬鬆甜美，吞拿魚蓉分量極之多，而且新鮮，真係好好味呀！小食我哋就揀咗，炸廣島蠔（$38）同月見雞肉棒串（$58）。炸蠔嘅肉質好新鮮，炸得好酥脆，唔油膩，檸檬醬清新又提升鮮味！雞肉串啲雞肉烤得酥脆，混合雞軟骨碎粒，層次豐富，醬汁惹味。另外我哋加多咗個炸窩夫烤餅（$118）做甜品。即叫即做嘅Waffle加上水果、楓糖漿同鮮奶油，甜味好平衡，賣相亦精美。