台灣過江龍「築間酸菜魚」主打可以飲埋湯嘅酸菜魚，最近喺銅鑼灣開設首間海外分店啦！喺台灣一向係人氣排隊店，香港店新開幕更派台灣人來港監製煮法味道，完美還原台灣風味呀。
總長酸菜魚來襲!!
「築間酸菜魚」充滿漫畫玩味感。
湯都飲埋！天然發酵•最叛逆酸菜魚
「築間酸菜魚」向30年酸菜魚老師傅學藝，誓要做一碗最叛逆嘅酸菜魚。以天然發酵嘅古法工藝醃製芥菜，做出酸脆勁爽嘅酸菜，成就濃湯+鮮魚無雙美味。食之前飲啖湯底，就知同平時激酸激辣嘅酸菜魚好唔同，鮮香湯底唔會遮蓋魚鮮，呢度主要用更鮮甜嘅烏鱧魚片㗎(部分湯底除外)。
6款魚料理+1款湯料理都有大、中、小份量選擇，均跟配配料、寬粉(無雙腸血旺魚跟配台灣王子麵)。你亦可另追加餃類、肉類、蔬菜等，人氣最高係招牌蛋餃、魚餃，同埋吸湯神物—金針菇、凍豆腐。
招牌推薦 | 總長酸菜魚
正宗酸爽口味！湯頭酸菜、酸蘿蔔全自家製作。將天然發酵新鮮芥菜，配搭獨門高湯、乾辣椒、泡椒、大紅袍花椒熬製而成嘅招牌湯底，加埋鮮嫩幼滑烏鱧魚片，親嚐店家座右銘「湯比魚更鮮，一碗記三天」。
總長酸菜魚。全自家製作酸菜、酸蘿蔔。
酸甜有致 | 純愛番茄魚
如果你鍾意酸酸甜甜，肯定會鍾意呢款番茄魚。「築間酸菜魚」選用日曬充足嘅新鮮牛番茄、聖女番茄。熬製成番茄糊時，再加入自製酸蘿蔔、獨門高湯煮出酸甜有致，又有蔬菜清爽感嘅番茄酸菜魚，越食越開胃。
純愛番茄魚。選用日曬充足新鮮牛番茄、聖女番茄。
復古滋味 | 打破沙鍋魚
沙鍋魚頭係台灣人新年必食年菜之一。店家承傳師傅古早味煮法，用秘製沙茶醬爆炒洋蔥、香菇、辣豆瓣等食材，再加入厚實彈牙嘅鱸魚，喺香港都食到台灣人新年味道。
打破沙鍋魚。用秘製沙茶醬爆炒洋蔥、香菇、辣豆瓣等食材。
解鎖特色 | 海派蝦湯魚
海派蝦湯配料勁搶眼!! 除咗烏鱧魚片外，仲鋪滿大蝦、青口、魷魚。湯底沿用北海道地道煮法，將蝦殼、蝦頭、洋蔥、胡椒等炒香，打爛過濾成蝦膏後加入蝦肉熬煮3小時。最後加入白蝦炒出嘅蝦油、白蝦頭高湯，煮出蝦味十足嘅湯底。
海派蝦湯魚。湯底用自家煮製蝦膏，再加入蝦油、白蝦頭高湯。
口碑保證 | 極道明太子奶香魚
如果你好鍾意creamy白汁，一定會愛上呢款日式酸菜魚!! 湯底加咗牛奶、芝士、明太子煮出濃厚質地。海鮮配料又掛汁，冬天食特別有幸福感。
極道明太子奶香魚。加入牛奶、芝士、明太子煮出濃厚質地。
香臭系 | 無雙腸血旺魚
全場唯獨呢款酸菜魚有台灣王子麵～身為王子麵fans必食!! 並有無敵鐵三角滋味—臭豆腐+豬大腸+鴨血，並結合麻辣湯底撞出層次。當中臭豆腐係從50幾款不同口感和臭味中脫穎而出，放心品嚐香臭系。
無雙腸血旺魚。配料有無敵鐵三角滋味—臭豆腐+豬大腸+鴨血。
極濃厚 | 奥義豬肚骨煲
冬天想暖身，呢個豬肚骨煲就加咗胡椒、滋補藥材煮製。天氣凍嗰陣，飲幾啖湯已經好舒暢。配料有好軟腍豬軟骨、雞翼、豬肚。
奥義豬肚骨煲。胡椒、滋補藥材煮製，天氣凍飲兩啖已經好舒暢。
【酸菜魚之外·好食推介】
呢度除咗湯都飲埋嘅酸菜魚，仲有幾款人氣必食!!
(左上至右)浪子鹹酥雞、鐵漢小酥肉(椒麻口味)
(左下至右)鬼魔酒蒸鮮沙白、神帝酒嗆蝦
蟹膏鮭魚卵拌飯
絕對值得留肚食嘅拌飯!! 爆濃郁蟹膏+自家炸蒜+三文魚籽，又濃又脆卜卜，多重口感極過癮。
蟹膏鮭魚卵拌飯，絕對值得留肚食埋。
每啖都有爆濃郁蟹膏、自家炸蒜、三文魚籽。
神帝酒嗆蝦
好多人食完都大讚好鮮甜嘅醉蝦，特別選用新鮮白蝦。煮嗰陣將日本清酒、米酒沿鍋邊灒酒，逼出白蝦原始鮮甜味。比傳統只用米酒煮法，清酒更多咗種米香甜味㗎。
神帝酒嗆蝦。特別選用新鮮白蝦，以日本清酒、米酒逼出原始鮮甜味。
鬼魔酒蒸鮮沙白
用大火快速焗沙白後，同樣用日本清酒、米酒沿鍋邊灒酒。煮嗰陣一滴水都唔使加，沙白完全吸晒清酒嘅甜味。
鬼魔酒蒸鮮沙白。煮嗰陣一滴水都唔使加，蛤蠣吸晒清酒甜味。
【飲酒食酸菜魚】
店內自助吧可任飲陳皮茶、洛神茶，特別冬天一坐低飲啖熱茶真係好舒服，相當貼心。此外，呢度仲有5款沙瓦可以邊飲酒、邊食魚～口味包括提子沙瓦、波子汽水沙瓦、芒果沙瓦、密瓜沙瓦、白桃沙瓦。
自助吧可任飲陳皮茶、洛神茶。
築間酸菜魚
地址: 銅鑼灣軒尼詩道489號銅鑼灣廣場一期2樓202-203號舖
電話: 36190669