韓國過江龍午市7折+荃灣限定Lunch Set! 石燒腩肉激厚切

韓國料理有種獨特風味，要用當地辣椒醬(gochujang)、大醬(ssamjang)、韓國麻油(gireum) 等等煮製而成，絕非現成醬料做到。韓國過江龍“Yadllie Plate”就好著重還原韓國味道，大部分食材、香料、醬料都由韓國直送，韓國老闆朴正根先生更會到香港店親自監察，確保料理保持水準，難怪韓國已超過30間分店。

荃灣分店非常開揚，可觀賞花園景、海景。

“Yadllie Plate”現於旺角、荃灣都有分店。旺角店一向係爽食炸雞嘅人氣飯聚點；而去年新開荃灣分店則走古典英倫風，深藍色調及海景不禁令人放慢腳步。趁住午市優惠，即刻嚟食個lunch chill吓啦。

午市優惠(星期一至五12:00pm-5:00pm)

1) 荃灣分店限定午市套餐，跟配新鮮泡菜、新鮮沙律、手調百香果茶/汽水(優惠價+$18升級梳打或熱飲系列)

2) 午市時段，全線分店單點餐牌、甜品均享7折

【荃灣限定】午市套餐 | 免費跟配泡菜·沙律·手調百香果茶

“Yadllie Plate”為咗完美還原韓國味道，小至泡菜都係用韓國秘方。每日以梨、蘋果、新鮮香料、韓國秘製泡菜醬新鮮製作，今次喺午市套餐就可以食到喇。

古典英倫風環境，放鬆舒適。

跟餐仲有淋上韓國檸檬沙律汁嘅新鮮沙律菜；以及手調百香果茶/汽水，優惠價+$18可升級草莓乳酸梳打、巨峰乳酸梳打、玫瑰蜜桃果茶等㗎。

人氣爆紅午市料理！石燒腩肉

午市推出12款韓國料理選擇，好似晚餐咁豐富大份！當中人氣最高就係石燒腩肉伴香蔥煎餅，熱辣辣石板堆滿厚切腩肉。全部豬腩片均韓國進口，有種獨特豬肉香兼零羶味。

熱辣辣石板，堆滿韓國進口厚切腩肉。

石板熱力逼出豬腩片油份，未食已經聞到好香啦!! 而且跟配大量新鮮蔬菜、香蔥蛋餅，好似韓燒般用蔬菜包住燒豬腩片食，再食件蛋餅勁有韓國街頭風味。

用蔬菜包住燒豬腩片食，清爽又爆出肉汁。

韓國暖笠笠料理

冬天時不時就想食啲暖嘢，估唔到午市時間都有咁足料鍋物，並跟配韓國手切麵，獨特彈牙口感好有記憶點。3款鍋物中，最多人鍾意係芝士泡菜辣海鮮鍋，辛辣夾雜芝士濃郁奶香，開動前飲兩啖湯已經好有幸福感。另外2款千層五花白菜鍋、千層牛肉醬油鍋分別用秘製辣湯底、韓國醬油煮製，新鮮白菜吸滿熱湯。

最多人鍾意芝士泡菜辣海鮮鍋。

(左) 近年人氣大熱嘅千層五花白菜鍋。

(右) 千層牛肉醬油鍋，以韓國醬油煮製。

韓國人擅於以食養生，夏天會食蔘雞湯「以熱治熱」；冬天則選燒酒麻油雞滋補暖身。“Yadllie Plate”作為炸雞專門店，只選用韓國進口走地雞，肉質特別鮮嫩。平時用作炸雞好金黃香脆，估唔到變成麻油雞後肉質更嫩滑，鮮味唔油。呢道燒酒麻油雞最過癮係會跟配一杯韓國燒酒，畀你倒落麻油雞加強酒味!! 甚至你想直接飲落肚都得㗎。

燒酒麻油雞配白飯。附送韓國燒酒一杯，畀你倒入鍋中加強酒味。

韓國料理點少得芝士!! 每次食完韓式芝士拌飯，嗰種飽足感都好療癒。今次午市套餐就有芝士蛋慢煮牛五花肉伴蔬菜飯，牛五花集合筋、肉兩種口感，慢煮後更加軟綿。唔使用力咬就於口中化開，拌勻芝士、蔬菜、黑椒牛扒醬一齊食好開胃。另一款芝士蛋椰絲蝦蔬菜飯，炸蝦份量之多絕對午餐少見。特以韓國進口椰絲包著虎蝦炸至金黃，粗身椰絲令炸蝦更香脆，兼有淡淡椰子香。