王子私房菜

營業中

休息中

山長水遠入元朗探朋友，我對元朗就完全唔熟，由於朋友有大有細，朋友就話不如落樓飲茶啦。跟住朋友落樓下，帶到我去酒樓門口，望一望，點解咁熟口面嘅？原來係王子飯店嘅分支，王子飯店尖沙嘴分店就食過，食物質素就唔錯嘅，今日先知原來開到入嚟元朗，希望掛住王子個牌頭啲質素都有返咁上下啦。由於朋友有小朋友，於是就交俾佢發辦啦，費事叫咗啲小朋友唔食嘅嘢嘛。朋友簡簡單單都係叫咗啲點心，都係志在慢慢飲杯茶吹下水。都係奶皇包(小朋友鍾意食)，腸粉，菜苗餃嗰啲點心啦。因為大家都唔係太餓就冇叫咁多嘢費事食唔晒。味道都算唔錯，有返尖沙咀嘅水準。菜苗餃皮薄尤其出色。食下坐下傾下，好快食咗個幾鐘就散場，雖然啲嘢食唔錯，不過如果唔係探朋友都好難會特登入元朗食飯了。

上個月 25 號，一家人去咗元朗形點「王子私房菜」飲茶。門口唔算太多人等位，但係企係門口個肥經理好似好緊張咁，經常大聲責罵員工，大聲呼喝員工。連對客人都極大聲，極冇禮貌。D 蝦🦐「死死實實」，完全冇蝦味，好明顯係「雪藏蝦」。成碟野味道好淡，冇咩味道。份量極少，收人咁嘅價錢，完全係搵笨。味道係咁多樣稍為最好嘅，啲蝦食得出係「新鮮蝦」，而腸粉皮都還可以。個皮太薄冇乜口感，其餘菜同蝦都還可以。叫得陳皮牛肉球，就應該要有「陳皮」香味，但係佢係完全冇嘅。P.S. 【溫馨提示】一入到去，職員會比碟小食客人，係一碟番石榴，如果唔想要嘅話，記得同職員講，並且叫佢拎走。如果唔係就會收小食費 $18/碟。同埋埋單果時記得 Check 多次職員有冇減番。（因為本人之前試過職員想照收）

年尾家人飲返個下午茶 真心YOHO真係無乜選擇好多都厭左 又唔想去美🖤 就揀左依間 佢價位都算正常 四人千三有找*手撕雞涼拌粉皮？好似係咁叫正常嘢⋯咁簡單都唔會難食得去邊*蠔餅👁️👁️我睇人地上枱好吸引 所以我又叫但⋯一放入口又唔係我想要嘅嘢嚟🥹🥹🥹🥹係脆呀 粉漿薄 但我係想要潮式果種 有咬口厚身少少果啲🥹🥹*灌湯餃 個湯幾甜 唔係有化學味😂 似係自己煲出嚟唔係現成嗌貨返嚟開水煲*小炒皇幾香口 無咩特別但佢成間餐廳最好食係xo醬😂😂😂😂😂另外有二位男經理服務幾好 👍🏿 對得住收加一 有禮貌 開頭早到左 佢地見我拎好多嘢係咁叫我入去坐左先 仲話幫我拎 （咁當然我唔洗啦( ´▽｀)）

與伴侶多次路經這間餐廳，看過它的餐單，菜式構思感覺像老式的中菜館，價錢算中間，想著應該會有老式中菜館的穩定而可靠的品質，所以在BOXING DAY進去試試。由於當日胃口也不算好，只點了叉燒跟烤鴨兩食。黑毛豬叉燒：很油膩，調味很淡，不甜，不脆，肉質軟，有被開水浸過的出塵味道，我吃了一塊，不禁笑言：「像叉蒸，不像叉燒。」北京烤鴨，片皮：餅皮質感不錯，軟韌不失彈性，肉不算滑，但也不差，有鴨油香，配上醬汁與蜜瓜、青瓜絲、洋蔥等，能中和油膩感，不差北京烤鴨，醬爆：這一道鑊氣透鴨肉，很香，芹菜口感也很嫩（我把叉燒扔進去，試圖趁熱吸一點鑊氣，急救一下，可惜失敗）陳皮紅豆沙：附送糖水，有鮮明陳皮香，甜度與酸度適中，不錯總結：叉蒸讓人失望，可以說是近一年來吃過最難吃的叉燒，難以想像在這個價位，這個地段的餐廳能吃到這種水平的叉蒸，但鴨的烹調不錯，卻不算令人很驚豔，吃過不傷心，但沒有意欲再來（附註：比較有趣的一點是在餐館內要紙巾，需要５元，但濕紙巾卻是免費）

次次行過都見到好多人排隊咁就即管試下啦一入到去呢已經見到嗰啲櫈極污糟仲要唔係一張兩張，係張張都係咁污糟勁多食物殘渣咁嘅價錢之後畀啲咁嘅質素服務又差真係幾離譜囉我覺得呢間嘢之後waiter擺低啲碗碟求其揼到亂糟糟叫咗黑毛豬叉燒但係有幾舊係完全係肥嚟嘅成碟都油浸住,係食都食唔到呀嗰啲蠔餅先古怪囉，個師傅知唔知乜嘢係蠔餅呀極多炸粉去包住啲蠔超級大舊炸粉就咁攞去炸成狗都係炸粉嚟嘅成碟都係咬出嚟啲肥呀嗰啲炸粉呀唔食得嘅啲粉皮蒸到超級勁林滋滋

今日去元朗揾食，見到呢間睇落好似唔錯，就入左去食，星期六下就去到都唔洗等好耐蛋撻仔，睇親呢啲都忍唔住試，佢既酥皮屬於正常發揮，而餡既顏色偏白，味道上都偏向奶味多過蛋味芝士條，大家想像中既味道，但係不得不說佢既攞盤真係唔多靚😂黑松露餃，佢係有啲似水晶餃既皮，唔會太厚同埋有啲煙韌，餡就有淡淡既黑松露味，唔會好濃天下第一包，本身以為係好似叉燒餐包，但係佢個皮係好軟既，同埋個餡好似無調過味既叉燒咁，同想像中好唔同，覺得一般最後係脆皮牛坑腩，第一次試呢樣野，牛腩外面包住脆皮，口感唔錯，不過牛腩偏瘦

元朗近年名店食店一一進駐，形點王子私房菜還是第一次，中高檔， 預咗每人300蚊落樓，既然太太生那就要一試。王子飯店保留了高質的服務，雖然地方不大 ，仍顯高貴。晚上可以選擇的款式也差不多， 每枱所吃的都很相像。幾個例牌包括蟹皇伊麵，蒜香肉排， 半隻脆皮雞，海參海鮮煲， 鹹蛋黃脆炸明蝦球， 王子炒飯。 落樓埋單一千三百幾其實都算係咁。個人覺得最有特色的是明蝦球，加了少少鹹蛋黃脆炸，蝦肉爽翠， 外脆甘香 ， 有點點像鹹蛋黃魚皮表層的鹹香感覺， 入口 並不油膩，值得推介。脆皮雞雖然烹調都不錯，皮薄香脆，肉質鮮嫩，但可惜隻雞實在太瘦，欠缺口感，份量不足，性價較低。地點在西鐵站旁的形點， 尚算方便，但記住要訂位。交通味道 質素 環境 回頭 服務 性價 份量

想吃個簡單生日飯，因為近排吃得多西餐，今晚都想與老公食番餐中式菜嚟到「王子私房菜」希望舒舒服服歎番一下，打開菜牌選擇唔多！普普通通嘅菜式價錢都比較貴所以是旦叫咗幾個菜就算了侍應服務態度okay嘅！不過可能平日無什麼人氣！入到去都感覺環境比當年悄為暗暗沉沉咗好多，而且無什麼酒樓氣氛食物亦好快上枱，但每款菜都好似襯托返個大環境一樣「無什麼色彩」味道都係普普通通不是太特別！而且仲有退步績象添希望下次再嚟會有突破性進步吧加油！

一年一度，食蟹季節。選了王子飯店，因為食物質素高，價錢合理，服務又好。食物絕對是正，蟹粉小籠蟹味濃，充滿湯汁。蟹粉魚湯魚翅伴金華火腿汁，魚翅在香港已經唔多地方有得食了，湯十分鮮味。前菜有少量燒味，包括叉燒燒肉素鵝，雖不是重點，但味道也是好的。鮑魚中規中距，可以接受。餐單設計有心思，尾段有薑粒肉餅蒸飯和黃薑茶驅寒。甜品芝麻糕，水準之作，像在吃濃厚芝麻糊。服務5星級，讚。美中不足，晚上無此店至尊甜品芝麻煎堆供應，唯有午市時再去吧。

我成日都話元朗人好有錢，咁差嘅服務質素，食物完全跟唔上尖沙咀嘅Standard，收費一流。叫點心要自己畫，但係連支筆都要三催四請。完全冇見過擺枱咁求奇嘅阿姐，全部嘢放低晒叫我自己搞，屋村酒樓都識得擺好個位比客人啊。坐張凳又污糟到嚇死人，坐落去直程郁嘅？係咪爛咗呢？一邊飲茶一邊小心唔敢郁。點心比較慢，炸嘢比較快，要讚一下係熱辣辣同埋好鬆脆。鹹水角，餡料一般貨色。蛋撻仔好食，蘿蔔絲酥餅唔得👎🏻蝦餃燒賣食咗先講，一樣係一般酒樓貨色。價錢偏貴，服務欠佳，坐近窗邊位置唔夠冷氣，熱到出汗。

呢間王子私房菜位於Yoho mall，屬於中高級的中式酒樓，係米芝蓮餐廳，裝修環境唔錯，坐得舒服。今日星期六，下午2pm,等左大約15分鐘可以入座。食左幾款點心：🔶️豉汁煎虎皮椒 ($58，8 /10)佢條虎皮椒賣相同一般酒樓唔同，佢係圓筒型，切左頭尾 ，條虎皮椒好大條，有驚喜。條椒接近唔辣，豉汁少少過咸，都香口，不過如果釀埋饀更加好！少少貴。🔶️黃金流沙包（3件） ($30，10/10)超級好味！好熱好流心好香咸蛋黃味！！！！🤤🤤🤤🔶️胡椒豬肚雲吞 ($58，7/10)冇咩胡椒味，酸菜同湯偏甜。有3粒雲吞，雲吞幾好味。豬肚厚身但唔靭，洗得好乾淨。🔶️黑松露野菌山珍餃 （3件）($30，9.5/10)皮薄。黑松露好香好濃，菇菇一粒粒好爽口同好新鮮。中意食菇味既一定要試！🔶️蜜汁叉燒腸 ($38，9.5/10)比一般酒樓的叉燒腸多叉燒，而且叉燒瘦得黎好香，高級叉燒。🔶️芝士蝦長春卷 （3件） ($38，8/10)炸得脆，香口，味道ok ，賣相ok，但饀唔夠多。🫖壽眉 （茶芥$15位）茶好飲！地方環境都舒服衛生，兩個人都可以坐好大張枱，空間感ok。90分鐘要交枱，都夠時間慢慢食。收埋加一，兩個人埋單大

有突發事件發生，請左日假！待稍後安排之下，出咗嚟飲茶，不過呢間酒樓令我有點點失望了！首先服務態度都只可以話一般！不過出現咗送錯餐情況！明明點左叉燒腸，可以拎錯咗牛肉腸，真係差好遠喎！春卷就不過不失啦！又拎漏咗喼汁俾我，叫佢拎過嚟反應又比較慢！不過出錯餐都有去補救，呢個位可以加返d分, 春卷都脆，燒賣都幾足料，幾大粒下！排骨陳村粉不過不失，只不過係辣咗少少，叫咗鳳爪，個汁都ok，夠林既！只不過味精就多咗少少！個包用自己個名來做品牌，雖然比較薄，但餡料都幾足既，個餡都有啲濃，幾香豬肉味！餐廳衛生情況都幾理想嘅！每個位都有公筷比客人分開！

牛一，慶祝一下，選了這間酒樓，喜愛它實而不華。叫了蟹粉小籠包，蟹粉多而鮮，應該係今年食過最好味的蟹粉小笼包。點了魚翅，已經很久沒有吃了，魚翅足料，金華火腿好香，還有金華火腿汁，唔夠味可以自己加，可惜的魚翅不是一條條排翅。紅燒豆腐，家常小菜，味道不錯。甜品點了芝麻糕，像吃涷芝麻糊般，很好吃。還叫了一份叉燒，味道很好的，只是今次肥了一些，不適合唔食肥肉的我。環境：坐落商場中，地方寬敞。服務：一向覺得好好，無什麼問題

打風日，不用上班，去偷下閒吧。選了王子飲下茶，為何選王子？性價比高攞。天下第一包，十分鬆軟，內有一絲絲叉燒，王子的叉燒水準也不錯。叫個傳統點心金錢肚，茶樓才吃到的食物，好。 王子炒飯，基本上是必叫，內有大量叉燒粒和乾瑤柱。和膽固醇講聲hello，食了久違的鮮尤，不過不失。今次大力推薦的是甜品芝麻煎堆。外皮佈滿芝麻，十分香脆，內裏芝麻含像芝麻糊一樣，好好食。製作需時，早一點叫吧。環境舒適，位好寬。服務好好啊。

爸爸話要慶祝一下Happy Friday，所以帶我哋去食餐好嘅！因為佢鍾意食中餐，所以揀咗王子私房菜。餐廳環境舒服，係酒樓嘅格局，但冇一般酒樓咁嘈，啱晒傾偈。我哋三個人揀咗一個四人套餐，有頭盤，主食，到最後甜品，食到勁飽！鮮蝦沙律啲蝦好新鮮，彈牙爽口，沙律裏面有蘋果同埋薯仔，沙律醬非常清新開胃。海蜇叉燒燒肉拼盤海蜇好獨特，味道較清淡，口感爽！最鍾意係個叉燒，入味，非常多汁！西芹雜菌炒帶子蔬菜較為清淡，但帶子鮮甜！炸子雞外面脆裏面好多汁，好味👍炒飯睇落一個好普通嘅炒飯，但係功架十足，飯底好乾身，粒粒分明，而且非常煙韌，裏面有啲nuts，多層次。最後，上糖水係木瓜雪耳糖水，欣賞佢唔太甜，直到最後雖然好飽，但係呢碗糖水令你食得舒服！非常暖胃。總括來說，雖然菜式普通，但味道很好，食到食物嘅本身味道，而且食完唔會好口渴。買單二千幾蚊，都可以一試！