暢和號 (翠怡花園)

營業中

休息中

【大埔區】【暢和號】大埔區係人傑地靈嘅好區，而太和消防局附近不嬲有勁多好嘢食，我之前都寫過幾間，都係一啲令我留下深刻印象嘅好餐廳。今日同經理哥嚟到就試啲未食過嘅，嚟咗呢間叫「暢和號」嘅餐廳。就咁睇個名係唔知佢食乜，睇吓就知原來係食東南亞菜嘅。經理哥試 $68 嘅「暢和去骨海南雞飯」，配嘅「雞油飯」阿經理哥話幾重薑黃味，唔錯。跟餐嘅仲有「椰子冬瓜雞湯」同「小份涼拌青瓜」，我見經理哥食到舔舔脷就知道都唔錯。佢加 $14 要埋「參巴醬菠菜」，我就冇試，但佢就話都幾好，行動上都食晒。而我就試 $71 嘅「生炸大大香茅雞扒配喇沙」，炸雞扒好大塊仲有另上，唔錯。而碗叻沙裡面仲有魚片、豆芽、豆卜、雞蛋、班蘭葉絲，都幾豐富。個麵底我揀咗「滲滲」，即係油麵加米粉，食落都幾好。而且佢仲附上一碟醬汁嚟點雞扒食，好快就清晒。而我選擇加配嘅，係 $16 嘅「泰式椰汁西米糕」，同經理哥一人兩件試試佢，都幾香椰汁味。我哋都有試加 $14 先有嘅特飲，佢試凍「泰式傳統奶茶」，我就試凍「泰式龍眼茶」，兩者都係甜甜哋嘅選擇，感覺好泰式風情。冇加一，價錢 $197，唔算貴吧。。。（地址：太和大埔太和路14號翠怡花園B座地下