祥囍煲仔小廚

營業中

休息中

秋風起，食臘味。雖然作為年輕新一代，但對於呢個懷舊嘅傳統，係天氣開始涼涼地時不期然會想起。今次同男朋友去到筲箕灣煲仔飯名店 - 祥囍煲仔小廚試試佢。說來慚愧，作為一個東區人，呢間排隊旺店我竟然係出發前30分鐘先知道。地點極度不起眼。如果不幸地無訂位，就要係後巷度開餐，成件事其實幾有佬味，但如果有潔癖嘅朋友，就強烈唔建議你地去喇。臘味蝦乾煲仔飯 $92，價錢相當怡人，而且飯同配料基本係1:1嘅配搭，一打開蓋已經見到滿滿蝦乾、臘腸、潤腸同冬菇。除左煲仔飯之外，另一個必食就係椒鹽墨魚餅$98，呢個真係意外驚喜。墨魚餅做得非常厚身，咬落去完全係啖啖肉，仲會食到粒粒墨魚碎，非常彈牙。飲啖啤酒，再食一口墨魚餅，成件事好夾呢。唯一不足，面頭灑左d椒鹽，即使重口味如我，但依然鹹到我要撥開所有椒鹽粉先食得落口。啫啫生菜煲 $75 可以話係呢餐飯嘅敗筆。叫啫啫生菜煲而唔係蒜蓉炒生菜，就係想生得香口同乾身d，點知完全大失所望。敗筆有三。第一，生菜已經煮到極軟身，完全唔爽口；第二，煲底全部都係水，好唔乾身；第三，生菜煲竟然有椒鹽味道………….. 結論，下次只係叫煲仔飯同墨魚餅就足夠。