Sky726

一餐令人滿意嘅飯局，包含好多元素，食物、環境、服務及價錢都同樣重要。因為被openrice 提供嘅餐牌吸引，所以揀呢間食店，但原來我睇到嘅係晚餐餐牌，所以今日我中午去係另一回事，未開始食就先失望。幸好服務員服務態度殷勤，令我好快收拾失望心情。半乾蕃茄，甜味多過酸味，其他都係一般合格。餐包熱騰騰，好香蒜味，加埋牛油真係美味極了；餐湯係周打蜆湯，普通合格。配菜香甜，廚師廚藝不俗，只係件安格斯西冷本身肉質同肉味比較差，希望只係個別。濃味牛肝菌蓉，真係好味到不得了，配菜用紅石榴種子，好特別又甜，帶起食慾，而最初食件黑毛豬肉質滑，肉味濃，但慢慢開始凍就變得少少硬。咖啡一送上，香氣撲鼻，方型咖啡糖，帶來驚喜，配上熱奶，加入咖啡後都冇將咖啡溫度降低，所以最後都可以「滿意」離開。