Tartes & Pop

營業中

休息中

見到網上面有唔少人都大讚依間由法國人開嘅撻鋪嘅撻睇得又食得，咁啱黎到上環，一於買番幾件俾屋企人食。鋪頭唔算大，勝在夠簡單，鋪面淨係有一個甜品櫃放咗唔同種類嘅撻，賣相非常吸引，隱約見到門後面有幾個師傅整緊撻，可想然知啲撻係新鮮製造嘅。叫咗4款，分別係黑芝麻抹茶撻、法式咖啡忌廉布丁撻、覆盆子巧克力撻、檸檬榛子朱古力撻，每款都係$45。黑芝麻抹茶撻，係眾中之眾。最上面係抹茶慕絲，中間夾住黑芝麻慕絲同埋杏仁蛋糕，底層係朱古力撻底，層層分明，非常有口感。抹茶味非常重，有證明書證明由宇治抹茶黎整，可見用料巧究，亦都同黑芝麻同杏仁味好夾。法式咖啡忌廉布丁撻，一望就知上層嘅焦糖焗得夠侯，內層係咖啡味嘅忌廉布丁。咖啡香味濃郁，配上幼滑嘅布丁，令人流哂口水。覆盆子巧克力撻，唔甜，超有朱古力味，食食下可能會有啲膩，而上面嘅覆盆子酸酸地，正好解膩。檸檬榛子朱古力撻，上面係3個細嘅榛子朱古力，內裡係檸檬撻，我比較中意佢依種超級酸嘅味道。