Le Viet

星期一放工同朋友行尖沙咀the one，行到八點幾先搵嘢食，之前已經見過呢間鋪頭，因為佢顏色配搭好特別，所以有啲印象，於是就試吓佢。入到去覺得個環境幾好，因為佢裝修顏色都有花過心思，連啲枱枱櫈櫈同埋碟都襯返啲顏色，令人食嘢嘅心情都好啲。其實有好多野想食，可惜得兩個人叫唔到太多嘢食，只係叫咗兩個小食同埋兩個主菜。每次食越南野我都一定會叫炸蝦餅，因為香脆得來中間嗰啲蝦肉又好彈牙，而呢個蝦餅都做到呢一點，同埋夠熱辣辣，唔錯！另一樣必叫嘅就係牛油雞翼，因為呢個雞翼好花功夫，試過自己係屋企整，真係太過麻煩，所以出街食最好，呢個雞翼咬落去夠香脆，啲肉都好嫩滑，我都覺得好滿意，不過我比較重口味，如果可以多啲蒜蓉牛油味就好喇！呢個椰青海鮮飯，上面啲海鮮都幾多，有蝦有蜆有墨魚仔，啲飯全部都有椰汁包住好清甜，仲有啲椰肉！咖哩鮮雞鍋配法包，咖哩汁嘅辣度啱啱好，唔會太辣，個法包吸晒啲汁食落去好正！啲雞唔會好鞋口，薯仔唔係一般淋patpat嘅薯仔，唔會一咬就散晒，仲要個鍋一路熱住，食到最後唔會凍晒。鹹檸七都好正！