雖然仲有十幾日先至情人節，但有啲事情必須準備咗先嘅，禮物要預早買定，餐廳就更加要早啲卜定啦！特別係啲坐享靚景嘅餐廳呀！雖然話就話同愛嘅人食飯，鹹魚白菜也好好味啫，但呢啲特別日子都係要花下啲心思，食好西都食靚景嘅，呢度有6間餐廳，唔同菜式唔同地區唔同價位都有，應該點都有間啱你啩（當然前提係首先你要……）。

珀麗灣德國菜  沙灘旁望青馬橋 Oma's Kitchen

圖：Your Marvellous Angel N、candicebb

呢間喺珀麗灣嘅德國菜餐廳，有室內都有室外座，室外除咗同沙灘接近零距離之外，仲可以望住青馬大橋嘅夜景嚟食飯，好鬼靚！平時呢，佢哋就休星期二嘅，但情人節搭正星期二就當然有例外，照常營業啦~ 當晚餐牌淨係得set menu，龍蝦湯加沙律，而主菜就五揀一，三文魚扒呀烤雞呀Ribs呀之類都有得揀。
價錢：450/位，另收加一

尖沙咀歐洲菜  鬧巿綠田園   城市匯

圖：JannisT

唔係淨係得海景先叫靚景嘅，如果你嘅伴侶係大自然系，閒時都鍾意親親草地嘅，呢間喺尖咀嘅餐廳就應該幾啱喇。有室外露天座位㗎，仲要係綠油油嘅「草地」嚟呀，唔使去到郊外都可以有野餐feel~ 至於嘢食方面，前菜同湯就梗有啦，主菜就一係食牛，一係食龍蝦，而甜品就應該係大部分女生都會冧嘅玫瑰香檳白朱古力mousse呀！仲會一人送一杯意大利汽泡酒（Prosecco）添~
價錢：$599/位，另收加一（2月7日前預訂有優惠：$549/位）

山頂美國菜  俯瞰香港夜景  阿甘蝦餐廳

圖：c.hyy、MISSJOR

眾所周知，山頂係睇香港夜景嘅勝地之一，咁位於山頂嘅餐廳當然就係佔盡優勢啦。早啲卜位可以坐到窗邊位就正喇！情人節嘅menu前菜有香煎帶子配紅菜頭草莓沙律同椰菜菜烤蒜湯，而主菜就喺炭燒和牛牛腹肉、龍蝦海鮮意大利飯同烤燉橙香豬腩肉中間三揀一，再加多個甜品。
價錢：$688/位，另收加一

銅鑼灣鐵板燒   直望維港    嘉門鐵板燒

圖：Lamsiufai、Fishsquare2

年年情人節都食西餐，不如今年轉下食鐵板燒啦，呢間喺銅鑼灣嘅餐廳上年年尾先開㗎，望到維港夜景已經好正，仲要係冇落地玻璃隔住，可以直接望出去呀！九道菜套餐包括咗3款刺身、香煎鵝肝、和牛炒飯等等，特別要提嘅係宮崎A5和牛同法國藍龍蝦呀！前者牛味重，油脂分佈平均，入口即溶；後者係餐廳嘅招牌菜，龍蝦肥美多肉，仲要配埋龍蝦醬，好juicy好香。
價錢：$2380（兩位），另收加一（另加$488可配香檳、紅酒及梅酒各一杯）

銅鑼灣靚靚甜品   高貴紫格調  紫

圖：車媽媽

同樣都係上年年底先開嘅日本餐廳，老實講望出去嘅銅鑼灣海景係相對上冇樓上嘅餐廳咁闊，但係佢勝在內部裝修夠氣派，以紫色為主調係幾有格調嘅，而且每道菜式上碟都係砌得靚靚的，影相呃like一流。講返情人節嘅menu，9道菜，鵝肝、刺身走唔甩，重點係有鐵板燒蘇格蘭蟶子皇伴紫薯茸，蟶子彈牙爽口，而甜品士多啤梨雪葩就更加係保持一貫視覺系嘅路線啦。
價錢：$ 1,488/位，另收加一

尖咀西餐廳  露天維港景    Harlan's

介紹完喺港島望嘅維港景，當然係要講埋尖咀嗰邊望㗎啦。尖沙咀The One高層，露天座望維港，成個景夠晒開揚。個套餐都幾吸引，又帶子又鵝肝龍蝦海膽，仲有乳鴿Risotto等等，全部都係香港人最愛！
價錢：$2988（兩位），另收加一

文：Kar

情人節系列推介：
期間限定！最Sweet主題甜品指南