【手信巡禮】韓國手信揀呢啲唷

煲咗咁耐韓劇終於攞到假去韓國追Oppa，同時又要面對新問題：買咩手信好？每次都係護膚品Taster或者公仔襪好悶啫，開飯仔幫你諗定幾款好味手信，送比親戚同事朋友兄弟姐妹一樣得，唔洗同我講唔該(감사합니다 gam-sa-ham-ni-da)啦。

Binggrae　辣海鮮麵味零食　(크라운 꽃게랑불짬뽕)

圖：chaekkoba@Instagram(左) & jy_1118@Instagram(右)
如果有睇韓劇就會知道佢地經常食中華料理，而其中一項最有代表性嘅就係辣海鮮麵。成碗海鮮麵帶唔到返香港，帶呢款零食就得啦。特別介紹呢款，係因為佢由韓國大熱綜藝節目《拜託冰箱》當中嘅主廚李連福研發，唔少韓國人都非常鐘意食，貪佢辣辣地夠惹味，唔小心食下食下就一包。

樂天　Farm on the road田園水果軟糖　(롯데 팜온더로 드젤리)

圖：by_youm@Instagram(右)
細細包嘅軟糖總共有五款口味：士多啤梨、藍莓、柑橘、番茄同葡萄，派比同事或者同學都夠方便，而且裡面都加入咗真·果汁，例如柑橘味嘅軟糖就係用咗濟州柑橘，果汁含量有20%！番茄味為咗平衡酸味，仲加入咗蘋果汁，咁平時嫌酸嘅朋友仔都可以食到番茄嘅清新滋味啦。去到超市或者便利店，認住代言人趙寅成大頭就得。

CJ　Petitzel Sweet Pudding　(제일제당 쁘띠첼 스윗푸딩)

圖：seulgi0505@Instagram(右)
又名來自星星的布甸，因為佢喺韓劇《來自星星的你》出現過，亦係由金秀賢(a.k.a.都敏俊xi)代言。呢個系列有原味、焦糖、芝士同吉士四款口味，每一款口感都非常綿密，比一般台灣或者日本嘅布甸都絲滑柔嫩，入口即溶。唯一比較麻煩嘅就係佢需要低溫保存，記得臨上機先去買。

C&U便利店　Line Friend 飲品　(CU편의점 라인프렌즈 아이스드링크)

如果身邊有鐘意Line嘅朋友，送呢個就啱哂，因為佢地品牌delaffe嘅飲品係一袋袋而且有唔同口味唔同包裝，例如美式咖啡、朱古力、蜜桃茶、藍色檸檬梳打等等，雖然色素係多咗少少，但送比鐘意相機食先嘅朋友就啱哂！順便一提，如果你即場飲嘅話可以買埋冰杯，上面都有Line Friend圖案！

三陽　辣烤雞撈麵　(삼양 불닭볶음면)

圖：kiki_sunyoung@Instagram(右)
利申，因為呢隻杯麵真係好受歡迎，所以香港有啲韓國食品店已經有，但去到韓國依然值得買多幾個嚟做手信。因為佢喺2014年畀即食麵達人Hans Lienesch評為選為全球10大最辣即食麵第三位，連食開辣嘅韓國人都會覺得辣，所以如果身邊親戚朋友都食得辣，不妨大手入貨一齊挑戰下！佢嘅辣味屬於後勁，一開始入口覺得OK，之後先會喺喉嚨爆出嚟。

黑麥核桃　黑麥核桃餅　(호밀호두 호밀호두)

買比長輩嘅手信當然唔可以太隨便，想得體又錫住荷包嘅話可以考慮呢款韓國傳統小食黑麥核桃餅，其實係雞蛋糕包住紅豆沙同核桃。低糖低熱量之餘核桃仲有補腦嘅功效，注重養生嘅老人家或者小朋友都啱食。唔怕麻煩嘅可以放入微波爐稍微叮熱再食，別有一番滋味。

不倒翁　調味香油(芝麻油)　(오뚜기 고소한 참기름)

圖：iam_j_s@Instagram(右)
認真Mode，雖然特登去韓國托罐油返嚟好似好無聊咁，但如果你身邊有一位鐘意食韓國菜又經常下廚嘅人，就絕對可以考慮買罐細嘅芝麻油當手信。事關可能唔少人都試過喺屋企整簡單嘅韓國菜例如部隊鍋或者紫菜飯卷，但都發現比喺韓國食嘅味道有出入，呢個時候如果將屋企枝麻油轉做呢枝，效果就會好好多！呢個牌子係唔少韓國人由細食到大嘅，特別香而且聲稱唔熱氣。

隨時接收最新資訊
讚好OpenRice專頁！