女士無論幾多歲，都可以有一顆少女心，唔信嘅話不妨帶佢嚟灣仔新開呢間精品蛋糕店，單係粉紅主調嘅裝修就已經加咗唔少分。而且有可愛造型蛋糕，精緻嘅迷你蛋糕，甜美嘅馬卡龍、透心涼嘅雪糕馬卡龍同相機食先啱哂嘅拉花飲品...喺呢啲甜品面前，所有女士嘅少女心都會被喚起（應該係，除非唔係）。

呢間蛋糕店最近喺灣仔利東街開設分店，唔單止裝修貫徹簡約優雅風格，仲有三款全新蛋糕：青蘋果為主嘅Ever Green，有邪惡Oreo嘅Oreo Galaxy同加咗食用花瓣特別夢幻嘅Summer Flourish。

人氣商品當然亦繼續供應，包括好似有杯雪糕倒轉插喺蛋糕上面嘅Uni-cone雪糕甜筒蛋糕。而且雖然外表甜美，但蛋糕整體會控制糖分，確保蛋糕唔會出現過甜嘅情況，食完都唔會太大罪惡感。人少嘅話亦可以考慮迷你蛋糕，一樣別緻迷人。

除咗蛋糕，店裡面仲有各款口味獨特嘅馬卡龍，同夏天食啱哂嘅紅絲絨馬卡龍雪糕三文治。想試其他甜品嘅，亦有十二款口味杯子蛋糕任揀。

今次分店設有座位，所以亦有飲品供應，畀各位少女（同少女嘅男朋友）坐低慢慢細嘗。最新嘅夏日特調飲品就係睇落相當浪漫嘅紫薯Latte！喺甜品面前，少女們嘅減肥計劃似乎又要拖延，直到永遠...