各位甜魔嘅To-eat-list又多一間啦！嚟自日本嘅法式蛋糕店Chateraise喺太古城中心APITA開咗第一間分店，蛋糕同甜品選擇眾多。而且佢地百分百使用日本原產食材，無論係Tea Time自私食瑞士卷同泡芙，或者紀念日買一大個士多啤梨鮮忌廉蛋糕慶祝都一樣咁幸福。
Chateraise喺日本有超過470間分店，喺杜拜、新加坡、馬來西亞、台灣同上海等地都有開設分店，而太古呢間將會係佢地喺香港嘅第一間分店。太古店雖然佔地唔大，但其實數下數下都有大概100款蛋糕甜品，占全部商品種類嘅五分之一㗎啦！
其中一款日本人氣蛋糕係原味瑞士卷，唔好睇佢賣相平實，呢度嘅蛋糕全部都係精選北海道忌廉同北海道雞蛋，再喺日本嘅自家工廠新鮮生產。瑞士卷蛋糕食落相當鬆軟，而忌廉香滑得嚟甜味得宜。難怪開飯仔見到有人試食之後，即刻買咗10件走！
另一熱賣商品就係雙味泡芙，有吉士、抹茶同朱古力三款口味。有啲可惜嘅係始終泡芙皮唔係即焗，因此香脆程度麻麻。不過忌廉相當香濃，當中以朱古力味最甜，吉士味最易入口，抹茶味回甘度一般但富抹茶清香。Tea Time配杯茶慢慢嘆就最啱喇。
好味嘅蛋糕唔想自私食嘅話，不如訂個大蛋糕一齊開心Share！佢地日本最出名嘅係鮮忌廉蛋糕，以新鮮原粒士多啤梨點綴，紅白賣相非常吸睛。入面係一層層嘅原味鮮忌廉、士多啤梨鮮忌廉、雲呢嗱海綿蛋糕同新鮮士多啤梨果醬。
另外仲有大福、閃電泡芙、現焙芝士撻、鮮忌廉銅鑼燒、千層蛋糕同唔同造型嘅可愛蛋糕。喺日本同樣大受歡迎嘅年輪蛋糕亦即將會喺稍後時間引入，各位甜魔揀好你嘅心水未？
Chateraise
地址：太古太古城道18號太古城中心二期地庫APITA
營業時間：星期一至四：10:00 - 22:30；星期五至日：10:00 - 23:00；每月第二個星期日：9:30 - 23:00
文、相、片：Cathy
開飯編輯推介：
2. 12月份好評餐廳十強
熱門文章推介：
隨時接收最新資訊
讚好OpenRice專頁！