Size最霸氣！生日超級鮮果芭菲

生日只會食生日蛋糕？少年你太年輕了，呢度就提供咗一個霸氣選擇：生日芭菲！足足有30cm高，入面有15球唔同口味個雪糕球同生果粒，夠6-8人開心Share。生日慶祝嘅話建議先訂好，咁就可以送埋寫住你心意嘅朱古力牌，Selfie都開心啲。即興同屋企人去食亦得，因為生日芭菲暫時無數量限定亦唔需要預訂。

味道最霸氣！港式鴛鴦芭菲

芭菲店嚟到香港特別推出咗四款地區限定口味，連日本都無得試係咪真·霸氣先？當中特別推介港式鴛鴦口味，忌廉下面有一球香濃Creamy嘅咖啡雪糕，同一球茶味飄香嘅奶茶味雪糕。最精彩嘅係最底嘅咖啡啫喱，濃郁有餘韻，同微甜嘅奶茶雪糕或者清甜嘅生果粒一齊食就啱哂。

用料最霸氣！日本蜜桃芭菲

一樣係香港限定口味芭菲，蜜桃由日本雪藏空運到港，而且每一杯芭菲就要用一隻原裝日本蜜桃！一咬落蜜桃相當Juicy，甜香四溢，簡單配桃味雪糕同鮮忌廉就已經夠迷人。為咗保持品質，呢個日本蜜桃芭菲係夏季限定。加上香港限定芭菲本身每日各限定供應20客，要試一定要快！

茶香最霸氣！宇治抹茶芭菲

香港嘅抹茶熱似乎同最近氣溫一樣居高不下，當然要介紹埋喺日本都相當受歡迎嘅宇治抹茶口味啦。抹茶雪糕選用京都宇治抹茶，入口茶味香濃，帶少少回甘而唔係人工甜味。加埋一樣係日本進口嘅甜栗子同紅豆，成個Feel好似真係去咗日本嘆芭菲咁爽歪歪。

拉芝最霸氣！流心芝士漢堡扒

餐廳照顧女士嘅甜品胃之餘，仲照顧埋男士！主菜當中就以呢個香港限定，而且每日得20份嘅流心芝士漢堡扒最吸引。以日本新興嘅tsutsumu包法，以耐熱嘅袋包住漢堡扒嚟煮，保證肉汁唔會喺煮嘅時候流失，最重要嘅當然係用刀一切開芝士流出嚟嘅瞬間，有得拉芝乜乜乜。

呢間嚟自日本九州佐賀縣嘅人氣芭菲店Ufufu Cafe選址尖沙咀，聽日6月4日正式營業，芭菲食譜跟返日本本店，喺香港新鮮製造。雖然價錢唔算平民，但唔洗飛一轉日本就食到和風芭菲，仲可以喺雪糕融之前瘋狂Selfie，啱返數啦。