各位抹茶控見到日本大阪酒店有抹茶自助餐係咪超羨慕？今次終於香港都有啦！而且仲係用京都百年老字號嘅抹茶出品，有齊鹹甜點之餘仲有個超吸睛嘅抹茶朱古力噴泉，難得成個下午茶自助餐埋單大概都係$200一位，計返CP值都唔錯㗎。
 

位於尖沙咀區咖啡亭4月推出嘅「遇見‧宇治‧抹茶物語」下午茶自助餐特別用咗以京都宇治老店「山政小山園」出品嘅正宗矜貴抹茶，質素當然有保證啦。抹茶忌廉卷蛋用幼滑忌廉配搭帶抹茶香嘅軟熟蛋糕。而抹茶朱古力噴泉就勝在有得食又有得玩，大人細路都鐘意。
 

有抹茶又點少得佢嘅最佳拍檔紅豆呢？日式金箔紅豆抹茶奶凍甜而不膩，加埋金箔點綴更精緻，記得要相機食先呀。自家製軟雪糕配抹茶粉用嘅係酒店大廚嘅自家秘方，奶香濃郁嘅軟雪糕上面灑上抹茶粉，入口清香而餘韻悠長。
 

除咗甜品之外仲有抹茶鹹點㗎，例如手工抹茶蕎麥冷麵、抹茶炸魚同抹茶雞翼，茶香清新。當然想快啲回本嘅話，仲有各款冰顉海鮮同新鮮刺身任食。
 

咖啡亭 遇見‧宇治‧抹茶物語 下午茶自助餐
供應日期：2017年4月1日至6月30日
星期一至五(下午3:00-4:30) 
$198(成人) / $158(小童/長者)*
星期六至日、公眾假期 (下午3:15-5:00)
$218(成人) / $158(小童/長者)*

*適用於 3-11 歲小童及65歲或以上長者，所有價格收取原價10%服務費

文：Cathy