近年中秋，好多間酒店同餅店都會推出奶黃月餅，有啲sell造型可愛，有啲就靠味道取勝。咁多款又點揀好呢？咁就要睇你想送禮定自食，試新味定愛傳統喇！
可愛版
搞鬼Emoji 聖安娜餅屋
呢款奶黃月餅見到都即刻變心心眼，老是常出現嘅Emoji造型可愛，睇極都唔厭。有笑喊、心心眼、伸脷同戴太陽眼鏡四款表情，四個裝仲送埋emoji袋仔，好打耳呀～
呢款由Piccolo兒童會設計嘅兒童迷你奶黃月餅外型七彩繽紛，夠哂搶眼。禮盒內有6件迷你奶黃月餅，設計以月亮為構思，呈現出月亮從月牙到滿月嘅不同階段，可以一邊食月餅一邊同小朋友講解中秋節嘅故事同習俗，好有心思。送畀有小朋友嘅家庭就啱哂。
迷你熊貓 奇華餅家
佢哋年年都同海洋公園聯乘推出cute版月餅，盒又cute，餅又cute。一啡一黃雙色熊貓造型月餅，細細個，食完唔怕太膩。
更多【月餅巡禮】： |
清新版
柚子奶黃 欣圖軒
有啲人會覺得奶黃月餅好膩所以唔食太多，咁你哋就可以試下呢間酒店新出嘅柚子奶黃月餅啦。加咗柚子令到味道更清新，同奶黃好夾。酒店仲同慈善機構合作，將呢款月餅嘅收益扣除成本之後全數撥捐比「願望成真基金」，幫助患有重病嘅兒童實現願望。咁有意義又有好嘢食，諗得過呀喂。
奶黃控版
黃金比例 國金軒
呢間餐廳嘅皇牌奶黃月餅，冇咩特別花巧，就係以嚴選重量均稱嘅頂級鹹蛋黃，用黃金比例製作奶黃餡取勝。外皮鬆化，餡料甜得嚟又唔會好膩。
精選禮盒 君悅酒店
呢間酒店今年推出咗四款精選禮盒，其中「喜悅禮盒」入面就有八個迷你奶黃月餅，小巧的骰，入口即溶，送畀人或者自私食都得。
文：Crystal