屯馬線開通，為九龍城呢個舊區帶嚟唔少新衝擊，但唔代表舊有面貌就會被抹去。呢間就係將二戰前唐樓活化而成嘅Cafe，裝修保留窗花、牌匾等部分舊物，食物就糅合九龍城特色，例如以區內老字號荳品店嘅腐乳炮製意粉、用泰國雜貨店嘅班蘭配搭咖啡，充滿驚喜。
 

保留前身五金店怡順榮嘅招牌，同時將原有全層嘅閣樓拆走，以原有木材重建後面一部分

負責人之一Calvin細細個就喺附近讀書，對九龍城呢區有情意結，一年幾前機緣巧合下發現南角道3號呢座已經荒廢咗八至十年嘅唐樓。作為設計師嘅Calvin認為成功嘅活化應該係「喺舊嘅嘢裡面有啲新嘅元素加入去，有個內容係fit到嗰個空間，又有生意價值」，所以就同有多年西餐經驗嘅拍檔Sam計劃將地下嘅怡順榮機器五金變成餐廳。
 

菜式糅合九龍城特色，從環境到食物都與眾不同

南角道3號係建於1945年前嘅二戰前唐樓，業主都無圖積喺手。要新舊並存唔能夠推倒重來就唯有邊做邊睇，因此裝修比一般餐廳花多一倍時間，細心觀察同發掘歷史痕跡再改建。以日本修復工藝金繼（金繕）為靈感，打造「不完美的美」。好似Sam提到例如餐廳嘅閣樓因為結構安全及牌照問題，同業主周旋後決定保留部分木材，還原一部分閣樓面貌，同時呈現戰前唐樓嘅特色。所以唔單止係區外客嘅打卡熱點，亦係九龍城街坊嚟聚腳點。
 

忌廉腐乳醬北海道帶子闊麵（$138）

餐廳介於Cafe同Bistro之間，食物選擇貴精不貴多。例如呢碟忌廉腐乳醬北海道帶子闊麵就用咗同區老字號義香荳腐食品嘅腐乳，特色係依然堅持用石磨磨豆同明火熬煮豆漿，因此荳品帶些微焦香。用腐乳代替西餐常見嘅芝士，混合牛油、忌廉等煮成有腐乳香但唔過鹹嘅醬汁，加上半熟嫩滑嘅刺身級北海道帶子，再以櫻花蝦增添鮮味，香氣十足。
 

泰式冬陰公幼意麵（$128）

九龍城有唔少泰國餐廳，呢度亦特別推出以泰式冬陰公為藍本嘅意粉，減低冬陰公辣度再配搭意式番茄醬增加甜味，味道酸辣開胃又唔嗆。加上彈牙蝦肉好啱夏天食。而且幼身嘅天使麵非常掛汁，啖啖都食到醬汁精華。
 

藍莓果醬忌廉芝士酸種多士（$48，早餐時段供應，連指定飲品）

酸種麵包由Calvin向歐洲麵包師傅訂購，口感外韌內軟帶微酸。配搭帶牛奶香味嘅忌廉芝士、味道自然嘅藍莓果醬，同多款新鮮水果，整體味道都係酸酸甜甜咁，係清爽又滿足嘅輕食。
 

法式煎多士（$78）

必試甜品！多士先用牛奶、雞蛋、肉桂浸過，煎完再撒上蔗糖燒香形成焦糖脆面！加上椰香泡沫、天然蜂巢、椰子雪糕，最後以青檸皮碎點綴，充滿東南亞風情。多士脆面嘅焦香同肉桂香好夾，加上蜂巢嘅清甜同雪糕嘅香甜，味道同口感都非常豐富。
 

斑蘭椰啡（$52）

用同區泰國雜貨店買嘅班蘭糖漿，配搭椰奶、House Blend Espresso同椰子雪糕。飲嘅時候不妨先試咗中間咖啡加椰奶嘅味道，House Blend採用本地Browny Roastery嘅出品，咖啡嘅堅果香同椰奶又幾夾。搞勻飲就會喺最後品嘗到班蘭嘅淡淡香氣，值得一試。
 

餐廳負責人Sam用九龍城特色食材創作菜式，連意粉用嘅帶子都係向同區凍肉店攞貨

南角
地址：九龍城南角道3號地下3號舖

文：Cathy.H
相、片：Wilfred Chui