社企故事動人，理念代代傳薪─社會上有一些有心人，受身邊嘅人和事啓發而創立社企，小生意不為賺大錢，只為幫助有需要嘅人可以自己賺錢幫返自己: 一班邊緣青年受咖啡班啟發，由踩單車派自家咖啡去到今年有埋Cafe「Coffee Bunnies」幫同路人；本身係專業測量師嘅媽媽Jo 幾年前受星兒(自閉症)囝囝啟發，創立社企「星星堂」幫更多星兒融入社會；仲有視障人士嚴俊傑喺心光盲人院院長鼓勵下，創辦社企「Cedar Workshop」為視障人士提供工作機會𠻹。
要創立社企，講就容易，實際上唔簡單。因為每間社企都要自負盈虧營運，有社企開業數年仍然蝕錢，疫情下更加雪上加霜。但佢哋無放棄，繼續開發新產品，發揮香港人自強不息嘅精神。
即日起至2022年1月3日期間，工展會就有多間社企攤檔，記得唔好錯過佢哋一系列手製品，如咖啡、手工麵、花茶、木燈盒等。
工展會特設社企區，多間社企出售各款手作產品。
工展會於維園舉行，2022年1月3日前嚟都得㗎！
【Coffee Bunnies】幫助邊緣青年 尋找人生目標
現職精品咖啡師嘅浩倫表示，佢以前係邊緣青年，貪玩，咩都想試吓，音樂、運動咩都玩啲。幾年前遇到外展社工介紹有咖啡興趣班，玩吓玩吓竟然認真地考咗咖啡師。佢對咖啡嘅熱愛，甚至促使佢踩單車免費派自沖咖啡! 依家佢加入咗「鄰舍輔導會」設立嘅的社企「Coffee Bunnies」，從此邊緣青年不再邊緣，有咗清晰目標。
究竟咖啡有咩吸引力？浩倫坦言：「以前以為咖啡一定係苦，原來每位咖啡師沖出嚟嘅酸度、甘味都唔同，甚至有果仁、花香味，就係呢種未知同挑戰好吸引我，我夢想係之後可以開自己嘅咖啡店。」其實年青人唔係漫無目的，可能只係世界太大又或夢想太遠。與其話「Coffee Bunnies」係一間Cafe；倒不如話係一個肯畀年青人發夢、發揮嘅地方。
工展會有咩賣？咖啡掛耳包．咖啡冷泡包
(攤位4A12｜展期: 2021年12月20至23日)
咖啡掛耳包好方便，只要沿虛線撕開再掛於杯上，注入30ml 熱水等20秒就得啦！而且全人手製作、無防腐劑，有危地馬拉、肯亞、耶加雪菲等多地鮮磨咖啡粉選擇。
咖啡掛耳包有多款選擇。
「Coffee Bunnies」經理Suki 及年青咖啡師會駐場工展會攤檔。
冷泡咖啡包同樣全人手製作、無防腐劑。只要將室溫水倒入袋中，再放入雪櫃，隔日就飲到冰凍Cold Brew 啦，有來自埃塞俄比亞、耶加雪菲等咖啡㗎。
全人手製作冷泡咖啡包。
工展會及網上購買咖啡豆，都可特別要求磨豆。
隨時網上訂購>> https://coffeebunnies.boutir.com/
【星星堂】聘請自閉症青年 助自力更生
其實自閉症人士具備工作能力，但因社交技巧、控制情緒有困難，畢業後難以得到聘任。創辦人之一Jo 早於囝囝在學時已發覺呢個問題，於是膽粗粗夥拍同為義工嘅Daisy，創立「山寨廠」製作曲奇。至今7年一路走來，正式成為社企，聘請多位自閉症青年，於工場做手作曲奇、養生花茶、手工麵等，並於各個展覽出售。
Jo 親切地稱每位員工為阿囝、阿囡：「曾經有個阿囝本來不擅社交，喺度工作1年幾後，有次單獨出去買物資，回程時擔心我哋肚餓於是買麵包畀我哋食；又有另一個阿囝去送外賣，突然滂沱大雨都堅持成身濕晒返嚟，原來佢驚去避雨或買遮嘅話，我哋會擔心佢唔知去咗邊。」雖然每件都係小事，但對於一心幫助星兒嘅Jo 嚟講都暖在心頭。
Jo 續笑道：「其實佢哋好鍾意喺攤檔Sell 人㗎，次次都笑得好開心。雖然顧客未必每字每句都明白，但都好有耐性同佢哋交流，慶幸好多市民都好理解、包容。」如果你嚟工展會，不妨去佢哋攤檔傾吓計，親身了解佢哋更多，其實佢哋好叻好努力㗎。
工展會有咩賣？手工麵．花茶
(攤位4A11｜展期: 2021年12月27至30日)
「星星堂」喺香港自設工場，人手製作多款手工麵、花茶、曲奇、醬料等。手工麵「靚麵」色彩繽紛，全天然無添加，只用蔬菜汁、麵粉等搓製而成，有紅菜頭、菠菜、紅蘿蔔等口味。而且貫徹環保概念，會使用外表不討好但新鮮完整嘅蔬菜，減少無人買而丟掉浪費。
手工麵「靚麵」全部香港人手製作。
「靚麵」色彩繽紛，純天然只用菜汁、麵粉等製作。
隨時網上訂購>> https://www.facebook.com/angelchild.com.hk
【Cedar Workshop】疫情困境轉型 視障人士尋出路
「Cedar Workshop」項目主任嚴俊傑是視障人士，於心光盲人院暨學校畢業後，發現好多企業唔太願意聘請視障人士。但其實只要有相應設備協助，視障人士都可完成好多工作㗎。最後造就「Cedar Workshop」出現，為校友畢業生同視障人士提供工作機會。其中一位員工Ivan 加入社企前要送外賣維生，但睇街道、門牌有一定困難，及後加入「Cedar Workshop」終於有適合自己嘅工作環境喇。
「Cedar Workshop」項目主任嚴俊傑駐場工展會攤檔，售賣一系列木製品。
工展會有咩賣？點字夜燈盒．四季杯墊
(攤位4A13｜展期: 2021年12月31至2022年1月3日)
視障員工會幫助製作各款木製產品，如點字夜燈盒、四季杯墊、書籤等，以雷射切割機整出各種圖案、點字語句。漆黑中開啟點字夜燈盒，會映照出無數個代表「Thank You」嘅點字，於網上訂購更可自訂點字訊息，創作自己專屬嘅Secret Message 㗎。
正式授權小王子木製點字夜燈盒。
點字夜燈盒可自訂點字訊息㗎！
凡於工展會購物滿$200 即送木製點字表；網上購物滿$200，註明想要木製點字表亦可，等大家輕鬆學點字。
四季杯墊同樣利用雷射切割技術，將代表四季嘅櫻花、鸚鵡螺、楓葉同雪花圖案融入杯墊，杯墊中嘅Cedar 點字你又搵唔搵到？
四季杯墊有多款花紋。
杯墊仲有新年系列花紋。
隨時網上訂購>> IG @cedareshvi
第55屆工展會
日期：2021年12月11日至2022年1月3日
地點：香港銅鑼灣維多利亞公園
社企攤位：4A11-13
開放時間：上午11時至晚上9時｜上午11時至晚上8時 (2022年1月3日)
(展覽會將於晚上8時30分停止參觀人士進場；2022年1月3日提早至晚上7時正)