大家喺OpenRice搵食可以搜尋「咪嘥嘢食店」，有超過900間餐廳承諾善用食材、減少廚餘、環保減塑。我哋作為食客，食飯時都唔好眼闊肚窄，清晒枱面飯餸就唔使做大嘥鬼啦。
今次我哋搜羅咗3間各有特色嘅「咪嘥嘢食店」，有重塑戰前歷史建築嘅咖啡店；有開業20年大受街坊歡迎嘅多國菜餐廳；仲有用盡食材去熬足料靚湯嘅泰國菜小店。
打開OpenRice 進入「進階搜尋」頁面，喺「食品/餐廳類型」就可以搵到「咪嘥嘢食店」喇。
【南角】保留歷史建築 實踐環保之美
每次行過九龍城南角道，都一定會畀充滿歷史感嘅「南角」吸引。咖啡店嘅前身係荒廢多年嘅五金舖，屬於戰前歷史建築。店主特意保留歷史痕跡，以另一種形式延續故事。保育之餘，亦不失唯美。
「南角」門口仲保留住舊鐵閘，充滿歷史感。
行入店舖，第一眼一定望到前五金舖嘅招牌。店主完美保留舊店閣樓同舊木條，呢種新舊交融嘅感覺好特別。
前五金舖招牌好吸睛。
店內加入簡約木系同水泥石設計，巧妙將新舊融合。
咖啡渣原來係吸味神器！
店內彌漫住陣陣咖啡香，呢度有多款咖啡選擇，其中斑蘭咖啡同玫瑰梳打咖啡都係坊間少有。咖啡店每日都會產生唔少咖啡渣，不過員工會將佢哋放入用完嘅腐乳玻璃樽內曬乾，然後重用於植物肥料、雪櫃辟味等。
員工喺曬乾咖啡渣嘅過程中有個意外收穫，發現短短幾個鐘，啲咖啡渣已經將玻璃樽入面嘅腐乳味吸走晒，可以重用作容器，簡直係吸味神器！
員工喺曬乾咖啡渣期間，發現咖啡渣嘅超強吸味能力。
醬料玻璃樽洗淨吸味後，可以重用作容器、盆栽等用途。
保持海鮮新鮮 按先入先出原則
呢度嘅fusion意粉好受歡迎，特別係忌廉腐乳北海道帶子闊麵同泰式冬蔭功大蝦意粉。咁多海鮮食材，保持新鮮度非常重要，所以店家每日都要監察雪櫃溫度，並按「先入先出」原則將舊貨放於當眼處，由舊至新使用食材存貨，再配合定期防治滅鼠嘅措施保持衛生，咁就可以避免過期變壞而浪費喇。我哋喺屋企都可以參考呢啲善存食材嘅小技巧㗎。
齊齊減塑 自備外賣盒減$1優惠
而家自備咖啡杯／外賣盒嚟「南角」買外賣，即享減$1優惠。店家亦即將轉用非塑膠嘅紙漿餐盒同木餐具，並培訓員工主動詢問外賣食客需唔需要餐具，實行多方面環保減塑。
「南角」即將轉用非塑膠嘅外賣餐具同餐盒。
「南角」有咩必食？
咖啡迷必試特色咖啡，簡單配多士已經夠曬chill。「南角」嘅多士都唔簡單㗎，佢哋選用天然酸種麵包，而天然酵母更加健康易消化，配埋炒蛋、西班牙風乾火腿、黑魚籽勁有層次，同場仲有多款意粉值得一試。
炒蛋、西班牙風乾火腿、黑魚籽酸種多士
忌廉腐乳北海道帶子闊麵
泰式冬蔭功大蝦意粉
【老爹茶居】激多菜式選擇 考驗控貨能力
馬鞍山開業20年嘅「老爹茶居」，由西餐起家到而家主打多國菜，一直大受區內街坊支持。為咗保持新鮮感，餐廳每日都會更新菜單，所以要引入大量食材，變相好考控制入貨量嘅能力。
老闆坦言：「每日都有新menu，所以一定要用電腦統計食客喜好，受歡迎嘅食材當然會引入多啲喇，基本上每日都會用盡食材，唔會浪費。」但現實中難免有突發情況，老闆分享：「如果天氣差或者打風，食客自然少咗，咁當日嘅剩餘食材就會畀員工做伙食，甚至畀佢哋帶返屋企煮㗎。」
「老爹茶居」每日更新菜單保持新鮮感，大受街坊歡迎。
用盡食材 熬湯兼免費送畀熟客
雖然可以科技控貨，但新鮮食材難免有頭頭尾尾要切走，其實呢啲都可以用盡㗎。例如早前推出三文魚菜式時，老闆會將切出嚟嘅三文魚頭免費送畀員工或食客拎返屋企煮餸煲湯。
牛扒係店家人氣菜式之一，煎牛扒前都要切走多餘嘅肉。呢啲驟眼以為係剩食嘅牛肉，大廚亦唔浪費，會用嚟煲羅宋湯，唔使落味精己經湯味濃郁，又可以減少廚餘，絕對一舉兩得。
牛扒肉可以熬羅宋湯，零味精勁香濃。
咁餐廳成日出現嘅檸檬皮呢？雖然唔可以用嚟煮餸，但員工會用嚟洗毛巾同放入雪櫃辟味，志在用盡食材功能。如果少不免出現剩食，員工亦會將乾、濕廚餘分類，保持衛生，避免老鼠蟲害影響食材。
街坊主動要求少飯·自備外賣盒 環保意識強
老闆讚嘆馬鞍山街坊環保意識好強，好多熟客會主動走飲管，甚至自備食物盒買外賣。呢度亦提供少飯選擇，幾細食嘅客人都可以輕鬆清碟。
「老爹茶居」有咩必食？
呢度主打多國菜，每日嚟都會有新菜單唔會悶。冬天食creamy意大利飯、啖啖肉德國豬手就啱晒。午市就有餸飯一流嘅馬來咖喱，辣中帶甜好開胃。
黑松露菌意大利飯配香煎鵝肝
燒德國鹹豬手、蜜糖芥末汁配雜果沙律
馬來咖喱牛腩
【泰家】泰國香料煮出地道風味 密實盒保存新鮮蔬菜
主打泰國菜嘅「泰家」，引入多款泰國香料煮出地道風味，菜式包括泰式炒金邊粉、泰家去骨海南雞飯、冬蔭功系列湯麵等等，豐富香料味吸引唔少捧場客。
「泰家」主打地道泰國料理。
餐廳熱賣嘅海南雞飯會貼心地幫食客去埋骨，雖然過程中會產生唔少雞骨廚餘，但店家會提供員工培訓，向佢地講解善用食材嘅重要性，所以店員每日都會將雞骨熬成湯，而其他剩餘香料亦會用嚟煮醬汁，令泰式料理更有風味。
若當日雞骨太多，員工更會分予其他分店熬湯。
剩餘香料可煮醬汁，天然食材更有風味。
食客可要求走配菜·避免浪費
身邊總有幾個朋友唔鍾意食青瓜、番茄、韭菜等呢類常見嘅蔬菜配料，所以員工落單時都會貼心詢問需唔需要「飛走」或少飯。店面亦有貼上「咪嘥嘢食店」海報，提醒食客唔好做大嘥鬼。
紅咖喱雞飯。全店菜式都可自選走配料或少飯。
店面貼上「咪嘥嘢食店」海報，提醒食客咪做大嘥鬼。
新鮮蔬菜密實保存 使用前拎出洗淨
泰國料理有咁多蔬菜香料，一定要先用密實盒蓋好放入雪櫃保存。準備煮之前先拎出嚟洗淨備用，咁就可以延長保鮮期喇。
「泰家」將新鮮食材存放密實盒，使用前拎出洗淨避免變壞腐爛。
「泰家」有咩必食？
店家引入多種泰國香料入饌，即叫即煮熱辣辣，煮出泰國地道「家的味道」，食客更可自選少辣／少甜。
泰式炒金邊粉
泰家去骨海南雞飯
冬蔭功系列湯麵