近年日本抹茶熱潮卷席全港，唔單止多咗日本過江龍嚟香港開茶室，連唔少本土牌子都推出綠茶同抹茶口味食品。但各位抹茶控喺試之前有無睇清楚Menu同包裝，到底上面寫住綠茶定抹茶？雖然都係綠色，但其實當中嘅分別大有學問！
 

1. 抹茶係綠茶嘅其中一種

綠茶其實係其中一種未發酵嘅茶，無論係中國嘅龍井、碧螺春定係日本嘅玉露、抹茶都可以歸類為綠茶。當中分別就在於茶葉嘅處理工序。
 

2. 抹茶處理工序特別講究

喺採收茶葉之前約20日，茶農會用稻草或者黑網遮擋陽光，樹葉為咗繼續進行光合作用會分泌更多葉綠素同茶氨酸，所以抹茶比普通綠茶味道更甘甜。人工採收芽業之後經過蒸煮、烘乾，然後研磨成粉。而且茶磨亦係重點，唔少抹茶老店都仲用緊人手將茶葉慢慢磨成幼細清香嘅抹茶粉，有時一個鐘先磨到40g！
 

3. 抹茶有更多抗氧化物

抹茶熱潮唔單止喺亞洲蔓延，呢陣綠色潮流仲吹到歐美，成為大熱「Super Food」之一。皆因抹茶係未發酵茶，而且抹茶係直接將茶葉研磨成粉，所以對人體有益嘅茶多酚就得以更有效保存。有研究發現，抹茶嘅抗氧化物EGCG濃度比中國綠茶高出137倍！
 

4. 抹茶更濃郁回甘

抹茶唔單止係日本茶道嘅專用茶，唔少甜品店都不惜工本選用抹茶粉而棄用一般綠茶，原因在於抹茶嘅特別處理工序，令茶粉特別翠綠同時保留甘甜味，亦因此抹茶比普通綠茶入口回甘餘韻更悠長。
 

資料參考：Mat-Cha-Doh，商業周刊，營養師陳灝雲
圖：Mat-Cha-Doh

開飯編輯推介：

1. 【專訪】冬甩店美食車舖面 加國回流女生：香港冇吖嘛

2. 10月份好評餐廳十強

3. 【香港米芝蓮】車胎人推介新上榜餐廳逐間睇

熱門文章推介：

1. 一齊滾起佢！季選任食火鍋

2. 秋冬天，番薯天 5大蕃薯味零食大比拼

3. 油麻地特色美食地圖

隨時接收最新資訊
讚好OpenRice專頁！