各大品牌同便利店成日都出新款零食，就算作為定期會去巡舖、入貨嘅專業零食控，都未必試得到咁多款，有時又會驚中伏而卻步。到底邊款抵買抵食，邊款伏味濃，就等開飯仔行勻便利店、超巿、零食店等，時不時幫大家留意住最新、最吸引嘅新品，一一試真啲！
***12月22號更新***
各大超巿 DREYER’S 皇牌雪條系列
愈凍愈想食雪糕，好似係。DREYER’S最近將佢哋嘅經典口味，香烤杏仁、朱古力咖啡杏仁同薄荷朱古力，變身成雪條登場。朱古力咖啡杏仁雪條有淡淡咖啡香，仲有粒粒杏仁，口感豐富。而薄荷朱古力雪條則同桶裝一樣，感覺冰爽清新。
惠康/Market Place 老虎堂 黑糖珍珠湯圓
冬至要食湯圓，過咗冬至都一樣可以繼續食湯圓。老虎堂呢個人氣品牌，除咗將珍珠放入雪條度之外，而家放埋入湯圓內。新出兩款口味，芝麻黑糖珍珠湯圓、花生黑糖珍珠湯圓，湯圓皮軟糯煙韌，無論係芝麻定花生味都好香濃，不過可能太香濃嘅關係，顯得軟糯嘅招牌黑糖珍珠都幾低調，食完都未必察覺到佢嘅存在。
7-11 café 香芋味鮮奶咖啡
對於每日都要飲咖啡嘅朋友仔嚟講，雖然慣咗每日都飲同一款咖啡，但間中有新口味都幾好。7cafe最近有期間限定嘅新口味，係香芋味鮮奶咖啡，暖暖der，甜甜der。
***12月17號更新***
OK便利店 生力 生力白啤
生力啤酒最近推出全新口味嘅生力白啤，比起原味更清爽！聞起嚟會有薄荷同柑橘香氣，入口會有少少辛香、果味同麥味，味道平衡，而且無乜苦味，幾易入口。
***12月10號更新***
各大便利店及超巿 Haagen Dazs 全新朱古力三重奏系列
即使步入冬天，依然無阻哈根大師出新雪糕嘅決心。 最新款有朱古力三重奏系列，今次呢個系列隻隻都好濃香好甜，甜魔至愛。比利時朱古力榛子脆皮雪糕批除咗外層有香脆嘅榛子朱古力之外，內餡亦有片片朱古力脆片，口感豐富。
比利時朱古力榛子雪糕用嘅係50%可可比利時朱古力，加埋烘焙焦糖榛子粒；而黑朱古力杏仁雪糕則用72%嘅比利時黑朱古力製作，加入Ganache軟心朱古力醬同烘焙焦糖杏仁粒。
各大超巿 Shapetime 水果雪葩雪條系列
呢個嚟自北歐嘅健康零食品牌今年正式進駐香港，率先主打嘅就係0%脂肪、低卡路里、成分天然，不含防腐劑或人工色素嘅雪葩雪條frozen dessert。用新鮮水果製作，有奇異果、紅莓，同芒果三款口味。當中以奇異果最有驚喜，唔會太酸而且味道清爽自然，芒果甜度適中帶果香，紅莓相比之下就係三款當中最酸嘅，勝在莓香都幾突出又唔假。三款口感都相當綿密幼滑，食完都無罪惡感。
7-11 品客薯片 拉麵味系列
見到特別口味仲要期間限定，係有衝動想買嘅。薯片叔叔聯乘日本即食麵製造商Acecook，推出咗呢兩款拉麵味薯片，黃色嗰筒係定番熟成味噌拉麵味，而紅色嗰筒則係自慢雞骨醬油拉麵味。後者嘅鹹香味比前者濃郁啲，不過就唔算太似拉麵湯底嘅味道咯。
***12月2號更新***
H.K. Lovecraft Buzz (Honey Lager)
開始入冬，飲蜂蜜可以滋潤一下喉嚨，有本地精釀啤酒廠更加聯乘本地蜂場「香港原蜜」推出以本地蜂蜜（原生鴨腳木樹原蜜）釀製嘅蜂蜜啤酒！原蜜係指直接蜂巢度提取嘅蜜糖，冇經過任何加工，保留最多嘅營養。今次呢款蜂蜜啤酒，清爽得嚟又香甜，陣陣花蜜香味，仲有啤酒花散發出嚟嘅微澀，好好飲。而且由於原蜜產量少，BUZZ只係釀造兩個批次咋，賣晒就冇。
Young Master Naughty or Nice節慶啤酒套裝
呢期為安全起見，可能大家都會減少咗出街食飯同飲酒，但可以買酒返屋企飲呀~ 少爺推出咗節日限定啤酒套裝，Naughty or Nice，包括咗兩罐紅色嘅Nice (Classic Pale Ale)，同兩罐黑色嘅Naughty (Chocolate Vanilla Stout)。前者滿滿橘子等果香，配搭唔同嘅節日菜式都一樣夾；後者係隻朱古力黑啤，加入法國朱古力釀製，有香濃嘅烘烤同朱古力味道，口感薄身，食完大餐做ending就perfect池。
惠康、Market Place by Jasons Gordon’s Premium Pink Gin
女生們見到呢支粉紅色嘅Pink Gin應該都好難抗拒，釀製過程中加入天然新鮮莓果，除咗令酒體呈現迷人粉紅色之外，飲落亦有陣陣莓果嘅鮮甜香味，夾雜住杜松子嘅甘香清爽，成班朋友仔開party飲係幾爽。建議可以搭配tonic或lemonade一齊飲用，味道更加清新。
各大便利店及超巿 卡樂B 泰式青咖喱粟一燒
經典口味回歸啦！喺陰啲陰啲嘅咖喱辣香之中，又滲有陣陣甜甜地嘅椰奶香味，難怪輕易就奪得粉絲嘅芳心。
各大便利店及超巿小老板 輕怡海鹽味脆紫菜
佢哋嘅紫菜一向脆口，好易食唔停口。今次即使換上咗輕怡海鹽版，鹽份比一般紫菜少咗一半，食落都真係幾淡口，但依然都係會食下又一塊食下又一塊，轉個頭就清晒成包。
7-11 Daisho CoCo 日式火鍋湯包
冬天要打邊爐咯~ 湯底最重要！由日本原裝進口嘅兩款火鍋湯包，分別係日式咖喱味同海膽醬油味噌，啖啖香甜，連帶配料都甜埋一份。
7-11 麥維他 新口朱古力消化餅
細細個食到大嘅麥維他消化餅，都要搞搞新意思，推出咗兩款聖誕口味過節。橙色包裝嘅係薑餅風味牛奶朱古力，有淡淡嘅薑辣同香料味；深綠色包裝嘅係聖誕布甸風味牛奶朱古力，甜得嚟幾有層次。
***11月27號更新***
7-11 Kit Kat x Sanrio 香港特色系列連精美索袋禮品套裝
最近行過便利店，眼利嘅Kitty粉一定見到呢幾隻公仔，分別係化身成搭棚師傅、港式點心師傅同茶餐廳夥計嘅Hello Kitty，連埋相應主題嘅索繩袋同迷你朱古力。同步登場嘅仲有幾款新口味嘅尊貴金裝系列，包括奶香味重，中間夾住黑威化嘅焦糖朱古力、甜到爆炸但椰香較淡嘅椰子朱古力，同埋喺歐洲大賣嘅經典4指朱古力。
Charbonnel et Walker 海鹽焦糖軟心朱古力
倫敦著名嘅朱古力專門店Charbonnel et Walker登陸咗香港啦，暫時有幾款招牌朱古力可以買到，包括士多啤梨白朱古力配牛奶朱古力香檳酒心、海鹽焦糖軟心朱古力、開心果軟心朱古力同Tiptree士多啤梨醬軟心朱古力。其中，海鹽焦糖軟心嗰隻口感軟滑，濃郁香甜。朱古力控要試嘅話可以去置地廣場嘅pop up店或者佢哋嘅網店望望。
各大便利店及超巿 卡樂B宅卡B 帆立貝味紫薯條
細細包，脆卜卜嘅宅卡B薯條最近出咗新口味，以紫薯做base，配搭海鮮食材做咗隻帆立貝味出嚟，啖啖鹹鮮香味都幾過癮。另外出咗隻輕鹽版，比原味淡味少少，想食零食但又怕邪惡嘅話，呢款嘅罪惡感應該低啲，好似係。
各大便利店及超巿 嘉士伯家庭式啤酒機
有無諗過於屋企都可以感受生啤風味？嘉士伯今次聯乘美國著名品牌Fizzics推出全港首發限量版潮物「家庭式啤酒 機」！各位啤酒控以後無論安坐家中定開Party都好，有咗呢部製泡沫神器，啤酒都隨時可以變生啤，而且操作都簡易方便。不過可惜呢部家庭式啤酒機無得直接買，要於指定期間到指定超級市場及便利店，購買醇滑嘉士伯即可參加即刮即中獎活動，即有機會贏取一部！
便利店：2020 年 11 月 9 日至 12 月 9 日期間購買500 毫升 4 罐裝，即可獲得一次抽獎機會。
超級市場： 2020 年 11 月 18 至 12 月 18 日 購買320 毫升 12 罐裝，即可獲得一次抽獎機會。
***11月19號更新***
百佳 Rankingdak Hong Kong 辣炒雞粒年糕+芝士雞胸漢堡+雞胸午餐肉
健身一族又有新口味嘅雞胸肉食喇！韓國人氣即食雞胸肉品牌推出咗幾款新嘢，最新研發嘅雞胸午餐肉，混合雞胸、雞髀同雞皮，加埋木薯粉製成午餐肉，煎得叻嘅一樣可以有少少脆邊，口感較食開嘅午餐肉實淨，而且比較下係低卡路里而高蛋香質，食得過。
芝士雞胸漢堡則以雞胸肉混成肉漿，拌埋紐西蘭天然無添加粒粒車打芝士，叮完滲有淡淡芝士香。至於雞胸肉包心魚糕就用鱈魚製作，就算辣味都唔係好辣，但就幾鮮香。不過辣炒雞粒年糕嘅辣度即刻幾級跳，無論係魷魚味定紫蘇味嘅醬汁都相當有辣勁，而且啲辣勁仲會喺口度維持一陣呢。
Aroma Truffle 松露爆谷
呢個人氣新加坡松露薯片品牌最近喺尖沙咀開多咗間分店呀，兩款新出嘅松露爆谷都係海港城新店限定，黑松露爆谷啖啖都係松露香，而朱古力黑松露爆谷嘅朱古力味較重，甜甜苦苦der，最尾先滲返少少松露味出嚟，各有捧場客啦。多咗喺屋企煮返兩手嘅朋友仔，佢哋仲有隻黑松露辣椒醬，香香辣辣，特別啱配炸嘢或者意粉。
各大便利店及超巿 Lays 黑松露味薯片
Lays嘅薯片大部分都有保證，見到佢出松露味係幾令人期待，可惜今次大家可能要失望了。松露獨有嘅香味一入口就食得到，不過嚟得快散得快，成塊薯片都未食完，陣香味就已經fade out咗。
7-11 小老板 脆紫菜/紫菜手指卷
好多人都係小老板嘅捧場客，啲紫菜脆卜卜，一塊一塊咁食唔覺唔覺就食晒一包。最近有幾款新嘗試，包括韓式香辣麵味、青咖喱味同粟米濃湯味，呢幾隻都係平時其他零食常見嘅味道，但事實證明，唔係隻隻味搭落紫菜度都夾架原來。另外仲有隻黑松露黑胡椒味紫菜天婦羅，係幾脆身嘅，但松露味就比想像中淡咯。
各大便利店及超巿 LOTTE RUM 微醺朱古力
酒心朱古力幾時都咁吸引，呢兩款微醺朱古力分別係酒提子味同干邑味，甜得嚟又帶有甘苦，仲有少少嘅流心，酒鬼實啱。
各大便利店及超巿 MEITO鮮橙雞尾酒味朱古力
冬天飲下酒係會暖啲嘅，好似係，於是連朱古力都加下啲酒入去。呢次加嘅係黑醋栗利口酒，再加埋橙皮，層次豐富。另外一隻73%可可味嘅就冇加酒，甜就唔算好甜，仲有少少酸咁啦。
各大便利店及超巿 Oreo 歐洲直送口味
Oreo有好多款口味，今次輪到歐洲直送嘅朱古力布朗尼同埋士多啤梨芝士蛋糕味，當然都係貫徹返佢哋嘅濃甜啦，而士多啤梨嗰隻，會帶有少少酸甜莓果香嘅。
***11月13號更新***
7仔預購站 微熱山丘 柚香蘋果酥
以日本青森縣紅玉蘋果烘焙嘅蘋果酥，冇鳳梨酥咁甜，有絲絲嘅果香。面層嘅白色醬係Valorhona柚子可可醬，加埋檸檬糖霜雪花，令到呢款冬季限定甜品甜中帶微酸。
city'super 、各大精釀啤酒店 H.K. Lovecraft x Ultraman 怪獸限定精釀啤酒
出賣年齡系列啊。邊個細細個係睇咸蛋超人大㗎？實認得呢幾隻大怪獸啦，本地精釀啤酒廠H.K. Lovecraft聯乘Ultraman 推出咗3款限量版精釀啤酒連酒杯套裝，無論係樽酒定隻杯上面都有佢哋個樣，值得收藏啊。酒廠根據每隻怪獸嘅風格配落三款唔同風格嘅Lager度，包括最多人識嘅巴魯坦星人配皇牌Rauchbier，以山毛櫸木直接烘烤嘅麥芽釀製，帶有煙燻香、「友好珍獸」比蒙配平易近人嘅Helles Lager，口感輕盈清爽、靈活嘅達達星人則配Session IPL，清爽中帶出果香同啤酒花香，泡沫綿密。
各大便利店及超巿 日清合味道 周打蘑菇海鮮湯味
有時貪快貪就手，或者宵夜肚餓想淥個杯麵嘅，有新口味選擇。周打蘑菇海鮮湯味杯麵，湯底都幾creamy，仲有洋蔥、海鮮配料等等襯托出蘑菇嘅香味。
各大便利店及超巿 卡樂B 香港口味系列
卡樂B真係好多鬼主意，最近又出咗兩款香港本土口味嘅薯片，分別係咕嚕肉味同鮑魚味。前者食落酸酸甜甜，同本身咕嚕肉個汁嘅味又幾似；後者係厚切V cut薯片，口感唔錯但鮑汁味就相對淡咗少少。
7-11 金鴨 泰式冬蔭功雜錦脆脆
佢哋唔淨係得鹹蛋薯片嘅，新出嘅有泰式冬蔭功雜錦脆脆，入面有蓮藕片啦、蝦頰啦同蘑菇，不過唔好話開飯仔唔提定你，香料味重之餘，辣香味都幾重啊，係會有餘韻，食完都辣多陣嗰種啊。
7-11 SAMJIN花生朱古力年糕批
最近好多款韓國朱古力年糕批，呢款都幾唔錯，推介一下。長條bar形，外層有粒粒花生，朱古力層再包住香軟年糕，幾層口感都唔同，又脆又軟，甜度中等。
各大超巿及日本百貨公司 樂家杏仁糖 樂家迷你脆
以前新年好興買嚟做手信嘅樂家杏仁糖，出咗迷你版。呢隻迷你脆比食開嘅細粒啲、厚度減咗一半，而材料比例依舊，口感更脆。三款口味分別有迷你脆原味杏仁糖、迷你脆黑朱古力杏仁糖，同迷你脆牛奶朱古力杏仁糖，甜度不一，黑朱古力嗰隻更帶有微甘。
各大日式超巿 MEKO Eats 一口脆脆魚
有時口痕想食零食，但開一包薯片蝦條又怕太大包嘅，呢隻脆脆魚就啱晒，細細包實食得完，又頂到癮。用真‧沙甸魚製造，無添加防腐劑同人造色素，夠晒鬆脆，送酒都幾夾。日式芥末味會有少少攻鼻，泰式冬蔭功就微辣啦。
7-11 味覺糖 MARVEL系列系列
咁得意嘅包裝，MARVEL嘅粉絲係幾易忍唔住會想買返幾包。幾款口味分別係提子果汁、白桃果汁、檸檬蘋果酒味，全部都係軟糖嚟。
***11月6號更新***
各大超巿 Pinkfong x SPLiT 香蕉造型雪條
呢款雪條幾過癮，成條香蕉咁嘅造型，仲有得「搣蕉皮」，但原來唔係香蕉味嚟。由SPLiT同碰碰狐合作推出，「蕉皮」係白提子味啫喱，甜甜地，而「蕉肉」係雲呢嗱冰凍甜點，玩味十足！
各大便利店及超巿 卡樂B 金沙蟹黃薄餅薯片
咁多款薯片味當中，相信卡樂B經典薄餅味，都會係唔少薯片控嘅飛佛。今次嘅新口味就係喺薄餅味上再加埋潮流大熱嘅鹹蛋味，鹹鹹香香，好易食唔停口。
各大便利店及超巿 Pocky 冬日限定版百力滋
11.11除咗係光棍節，亦係Pocky Day。為此，Pocky特地推出咗冬日限定嘅特濃朱古力餅乾條，同期間限定香烤牛奶百奇餅乾條。前者層朱古力真心厚，咬落啖啖濃甜：至於後者，以可可豆製，餅乾條則用100%全麥粉，食落更鬆化，同埋奶味都幾重啊。
各大超巿 LINDT 100%可可特醇朱古力、70%特級純味可可軟心朱古力
鍾意食黑朱古力嘅朋友仔，你哋食開幾多percent嘅？有冇食過100%嘅？LINDT 最新出咗隻100%可可特醇朱古力呀！味道醇厚甘苦，一啲甜味都冇，但就會食得到可可豆原本酸酸地嘅果香味，餘韻悠長。如果怕100%太苦嘅朋友可以試另一隻新款，70%特級純味可可軟心朱古力，呢隻都甘甘地嘅，但會有返少少甜，內餡軟滑。
7-11 百福豆品 JOY GREEN™植物蛋白飲品系列
每次喺飲品凍櫃都要揀低糖或者無糖嘅健康一族，試咗呢兩款新出嘅豆漿未？無添加糖豆漿同低糖黑豆漿，都係用植物蛋白、同非基因改造嘅大豆所製，豆味幾重，雖則冇糖嘅又真係會淡咗少少，但係有豐富蛋白質嘛，低糖黑豆漿仲不含膽固醇同反式脂肪添，為咗健康冇計啦~
7-11 利是脆片 車打芝士味/酸忌廉洋蔥味
有時口痕想搵啲餅食下，可以諗諗利是脆皮新出嘅兩隻口味，分別係車打芝士同酸忌廉洋蔥，都係非油炸嘅餅乾嚟，但口感一樣脆卜卜。兩隻之中又以酸忌廉洋蔥味較為推介，酸酸地鹹鹹地都幾醒神。
***10月27號更新***
曲奇阿嬸 自家製曲奇
黃埔最近新開咗間曲奇專門店，由一班熱愛烘焙嘅「阿嬸」主理，以自家配方設計咗一系列創新配搭嘅曲奇口味。曲奇每日新鮮出爐，口感酥脆。包括有花生朱古力曲奇、日本宇治抹茶白朱古力曲奇、香蕉煙肉曲奇同芝士洋蔥曲奇等等。特別要介紹下士多啤梨朱古力曲奇，選用Callebaut嘅Ruby Chocolate再加Valrhona嘅士多啤梨朱古力製成，雙重莓果份外酸甜。香蕉煙肉曲奇仲有拌入楓糖漿，鹹甜有致，感覺就好似食緊份澳式早餐咁。
各大超巿 激辣魔薯 芥末味薯片（機動戰士 - 渣古版）
青BB嘅包裝，除咗係芥末味嘅代表，仲代表住日本動畫《機動戰士Gundam》入面隻渣古啊！芥末味薯片食一塊就冇乜嘢，連續食多幾塊就嚟料咯，會攻鼻的啊。
759 日清湖池屋 多國風味薯片
每個國家都有唔同嘅地道美食，而最近就有品牌將呢啲唔同嘅味道融合咗落薯片度，推出咗一系列世界風味嘅薯片。例始辣中帶微甜嘅韓式嘅辣雞味、有淡淡椰奶香嘅泰式青咖喱味、芝士味特別濃郁嘅歐陸芝士味，同埋酸味較重嘅酸忌廉洋蔥味薯片。
***10月23號更新***
各大超巿 公仔鬼辣 魚肉/雞肉燒賣
最近出咗好多爆辣嘅零食，各位辣椒仔女可以搵嚟挑下機。先介紹好多時口痕都會想篤返兩串嘅燒賣。方便簡單，加一加熱就食得，精髓當然係秘製鬼辣椒油，一點落去，嘩，辣勁即刻爆發，直衝4隻辣椒嘅辣度。不過唔好以為唔點椒油就冇事，無論係魚肉燒賣定雞肉燒賣，本身都已經加入咗少少辣嘅特製鬼椒粉架科科。
辣度：🌶🌶🌶🌶
百佳、惠康 公仔鬼辣 香辣味噌味點心麵 (入門版)
唔好嫌佢咁細杯啊，到你食嗰陣你就會感謝佢係得咁細杯，再大杯啲就應該會辣到嗌救命。湯底以多種香料製成，辣得嚟幾香。呢個入門版級別，如果你成功過關嘅，就可以準備升lvl打大佬喇！
辣度：🌶🌶🌶
各大便利店及超巿 公仔鬼辣 赤辣肉味炒麵
你以為冇浸住辣湯，撈麵就應該冇咁辣？傻豬嚟嘅，佢隻撈麵辣醬汁，混合咗辣至5級強度辣醬呀！但初頭唔覺嘅，入口先有陣陣肉香，當你一放低防備嗰陣，濃郁嘅辣勁慢慢就喺喉嚨度滲返出嚟，真心「辣到噴火」呀！建議有興趣試嘅朋友仔，唔好一嚟就唧晒成包辣醬，唧少少熱咗個身先~
辣度：🌶🌶🌶🌶🌶
Grozla網站 DAEBAK 鬼椒辣雞撈麵
另一隻辣到噴火嘅撈麵，由馬來西亞著名品牌同韓國食品公司合作，用咗世界最辣嘅辣椒之一嘅鬼椒製作，黑色嘅麵條，索晒啲辣汁，超級刺激，而且後勁非常凌厲，嗰陣辣感喺個口度停留咗好耐先至散得到，開飯仔試過就算即刻飲啤酒都沖唔散嗰陣辣。
辣度：🌶🌶🌶🌶🌶
各大超巿 日清湖池屋 激辣魔薯 三倍辣薯片
日清湖池屋最近出咗日本動畫《機動戰士Gundam》嘅特別包裝版，其中有隻係擁有三倍速技能嘅紅彗星渣古，隻薯片亦都跟手升咗三倍嘅辣度。不過呢隻三倍辣薯片喺對比下，已經唔算太辣了，就算平時食開小辣嘅朋友仔應該都食得到。
辣度：🌶🌶
各大超巿 灣仔碼頭 「辣子雞風味」白菜雞肉水餃
辣水餃系列又多多個member喇。辣子雞風味白菜雞肉水餃，以多款辣椒同香料製成，辣度較同系列嘅水餃高，一啖咬開除咗有股辣勁衝出嚟外，都有啲雞肉，同埋爽脆嘅椰菜同木耳等混和，幫手抒緩返少少辣感。
辣度：🌶🌶
KiKi網店 KiKi麻辣鴨血
辣度：🌶
網店：www.kikifg.com.hk
***10月20號更新***
各大便利店及超巿 Minions x 菓汁先生
Bello, bello~ Minions嘅粉絲要出動喇。話說Minions聯乘菓汁先生推出咗新包裝同新口味嘅果汁，總共有成16款咁多，儲齊咁多個樽就要勤力啲周圍搵下啦。除咗一向飲開嘅橙汁、蘋果汁等，仲多埋提子汁呢。
7-11 多款限定啤酒
7仔嘅雪櫃最近多咗唔少新款啤酒呢，有好多都係限定系列嚟。好似麒麟本榨果汁汽酒咁，就係伏特加水果調酒嚟，分別有西柚同檸檬味，酸酸澀澀但又幾清新。如果鍾意飲IPA嘅朋友，可試Mahon Session IPA，感覺清爽；或者Grand Kirin IPA，果香味重少少，但又有啲啲澀口。Paulaner嘅慕尼黑啤酒亦係力推之一，陣陣麥芽甜香，容易入口。
7-11 7-select 甜品
開始有秋涼嘅感覺啦~ 又到咗蕃薯同栗子嘅季節。三款日本直送甜品包括安納芋甜薯忌廉泡芙、法式鳴門金時甜薯蛋糕同法式栗子蛋糕，啖啖香甜係幾開心嘅，不過cream嘅份量都唔少啊。
7-11 金豬流沙奶黃包、雜菌包
而家啲點心款愈嚟愈多之餘亦都愈嚟愈cute，連便利店都有豬仔造型嘅流沙奶黃包啦，成個蘑菇嘅雜菌包，內餡多汁。
***10月15號更新***
Circle K 高普冠軍紀念版 Erdinger 小麥白啤酒
為慶祝高普率領球隊登上冠軍寶座，德國小麥啤酒品牌 Erdinger 聯乘高普推出冠軍紀念版啤酒。小麥白啤酒散發出獨特嘅果香，入口清爽順喉並帶有微微柑橘及香草味。罐上印有高普樣貌以及簽名，絕對值得球迷珍藏，期間限定發售，想買要快手喇～
7-11、Circle K及各大超市 嘉士伯無酒精啤酒
唔少減肥人士都怕飲酒，不過最近嘉士伯推出咗呢款無酒精啤酒，有別於市場上一啲無酒精啤酒味飲品，嘉士伯利用獨特過程技術及特殊酵母移除大部份酒精，以天然方法釀造出啤酒，並同時保留傳統啤酒清新自然嘅味道！呢款啤酒較一般啤酒熱量低，每100毫升只含20卡路里，甚至比普遍的碳酸飲品同果汁都低，飲完都唔覺邪惡！
PING Halloween特色雞尾洒
就到萬聖節，往年唔少人都會去酒吧慶祝，但今年可能唔少人都會因為疫情而卻步。有見及此，呢間香港瓶裝雞尾酒品牌Píng就推出萬聖節特色雞尾酒，包括Jack-o’-Lantuern以四川麻辣為主調，琴酒加入花椒同麻籽浸超過 24 小時，更加入多款蔬果如南瓜、紅蘿蔔、番薯和蘋果，味道甘甜。而另一款Black Widow以香口芝麻為主題，選用日本有機麥芽豆漿、法國利口酒及金朗姆酒，有焦糖香甜中又夾雜微辣，易於入口。即日起至 10 月 31 號期間限定推出，只有官方網站有售。
***10月13號更新***
7-11、Circle K Oreo 薄荷曲奇忌廉味冰凍甜點
Oreo再出雪條，外層係Oreo味朱古力脆皮加埋啲Oreo曲奇碎，內餡係薄荷味雪糕，同樣都混入咗曲奇碎，啖啖脆口。薄荷味好強勁，食完透心涼，如果佢早多一兩個月出到可能會啱feel啲科科。
7-11 樂天 黃豆粉/朱古力軟心年糕批
朱古力批一向有唔少粉絲，今次呢兩款係由韓國送到，外層嘅朱古力甜甜地，中間分別係煙煙韌韌嘅黃豆粉同軟心年糕，幾好咬口。
7-11 農心 雞蛋多士味薯片
另一款由韓國直送嘅零食係雞蛋多士味嘅薯片。最近啲薯片多咗好多喺餐廳menu上嘅菜式味道，但有部分都係得個鹹字，唔夠精髓。呢隻就唔同喇，食落去係甜甜地又鹹鹹地嘅牛油香，仲有少少蛋香，完全想像到蛋多士嗰隻味，像真度幾高。不過甜嘅薯片始終都係食唔慣……
各大便利店+超巿 Ritz 、Oreo 季節限定海鹽焦糖口味夾心餅
呢兩款都係由細食到大嘅夾心餅，最近同時出咗海鹽焦糖味，不過Oreo就係甜餅乾鹹夾心，Ritz就調返轉，鹹餅乾甜夾心。兩者都係一開包裝，就已經令四周都畀濃郁嘅焦糖甜香籠罩住。食落嘅感覺都幾唔同，Oreo塊餅可能本身都係好甜嘅關係，就算加埋鹹鹹地嘅海鹽焦糖夾心，依然都係甜度爆燈；反而Ritz嗰款balance做得唔錯，鹹甜有致。
7-11 嘉士伯 利物浦限定版
等咗咁多年，利物浦終於贏返次英超冠軍，嘉士伯就乘勢出咗呢款利物浦限量紀念版嘅罐裝啤酒，轉咗用利記嘅紅色做主色，仲有利記嘅徽號同球員簽名，好有紀念價值，利記迷必儲！行多幾間舖直至搵到為止啦。
***10月8號更新***
各大便利店及超巿 Haagen Dazs 全新檸檬柑橘雪糕
中秋都過埋，呢幾日都開始有啲秋意，Haagen Dazs抓住夏天嘅尾巴，推出全新檸檬柑橘雪糕。用上由地中海區域採摘返嚟嘅檸檬同柑橘，製成真果雪糕，啖啖酸香之餘，又滲有奶香，仲有粒粒檸檬片咬到，感覺清新。
7-11、惠康 SEOJU 法式波浪雪糕
韓國直送嘅呢款雪糕，感覺同千層雪糕好似。三層口感由上而下分別係，波浪型嘅朱古力脆皮、軟滑嘅雲呢嗱雪糕同朱古力雪糕，擘大啲個口一啖咬落去，一軟一脆，口感豐富。
7-11、惠康 老虎堂 黑糖波霸珍珠奶茶雪條
又多款黑糖珍奶雪條！呢條黑糖波霸珍珠奶茶雪條，香港都有得食喇。雪條表面都好似平時杯嘢飲咁，有條條虎紋。咬落有粒粒煙韌黑糖珍珠，增加咬口，不過整體感覺就偏甜咗啲。
Circle K、GODIVA專門店 GODIVA 黑朱古力軟心雪條
嚟自比利時嘅朱古力名店都推出兩款黑朱古力軟心雪條，分別係伯爵紅茶風味杏仁黑朱古力軟心雪條，同夏威夷果仁黑朱古力軟心雪條！前者用英式伯爵茶配搭香濃黑朱古力，外層係朱古力杏仁脆皮，中心有伯爵茶黑朱古力流心。後者同樣有比利時黑朱古力流心，但外層就改成澳洲夏威夷果仁朱古力脆皮，香脆可口。
***9月29號更新***
Circle K Binggrae 韓國KAKAO FRIENDS造型雪條
好多朋友仔都係Kakao Friends嘅粉絲，最近韓國品牌Binggrae就推出聯乘合作，有3款可愛造型嘅雪條，分別係Ryan布冧味、Muzi青提子味同Apeach水蜜桃味。全部都係用脫脂奶製作，低卡路里，啖啖果香。
各大便利店及超巿 NESCAFE
NESCAFÉ又有新包裝，今次聯同日本知名冷幽默插畫家KEIGO（河尻圭吾）合作，一罐罐咖啡換上香港日常情景，好似有因為跑得太慢而畀外賣大叔抱住跑嘅樹獺外賣仔、多條觸鬚同時喺度切燒肉嘅魷魚燒味師傅等，既熟悉又有親切感，有舖儲罐癮嘅朋友仔實好鍾意。
***9月11號更新***
各大便利店+超巿 Haagen Dazs Barista Collection
將café嘅飲品變成雪糕不是夢啦，Haagen Dazs做咗啦！新出兩款Barista Collection口味，焦糖香料奶茶雪糕選用大吉嶺同阿薩姆紅茶，混埋豆蔻、肉桂、丁香等，食得出香料味幾重，好少喺雪糕度出現呢啲味道，但未必個個都接受到；至於濃郁冰雪朱古力雪糕則利用比利時朱古力製作，有雪糕有朱古力醬仲有朱古力brownie，三重朱古力享受，每啖都係濃郁啲嘅~
惠康 珍珍 蔥爆辣雞煲味薯片
即將又進入雞煲嘅季節，就連薯片都要趕上雞煲嘅節奏。呢隻新出嘅蔥爆辣雞煲味鹹鹹地，初頭幾啖唔覺辣，但當放低咗防備之後，啲辣就會慢慢喉嚨度滲返出嚟。不過老老實實，唔多食得出雞煲味。
各大便利店+超巿 日清拉王 杯麵
呢兩款杯麵比平時嘅要淥耐少少，4分鐘先食得。黑蒜油豬骨湯味幾濃郁，陣陣鹹香 仲有芝麻香；而辣豬骨湯味就咁睇湯底都感受到有返咁上下辛辣度，幾刺激。
***9月7號更新***
The Ale Project、Second Draft、Alvy’s、Pub1842、少爺網店 少爺啤酒x Cookie DPT 限量版啤酒曲奇套裝
BBQ最正就係燒棉花糖，燒到半溶狀態，有陣陣炭烤香又甜到入心，呢種味道喺少爺最新出嘅手工啤酒度都搵到！GIMME S’MORE係一款烘焙棉花糖三重法國朱古力軟心曲奇威士忌陳釀黑啤，口感厚身，烘烤麥芽嘅香甜，隨住棉花糖同朱古力嘅甜味飄出嚟，細心嗒仲可以飲到桶味嘅餘香。去Taproom飲當然最開心啦，但網店一樣有貨。仲可以連埋PDT嘅棉花糖夾心曲奇成套咁買。曲奇快速叮熱8-10秒，就有半溶嘅棉花糖效果啦，口感鬆軟，甜度十足。
各大便利店+超巿 Dreyer’s 三色脆皮雪糕批系列
今次呢個系列，以北海道牛乳搭配茗茶同充滿日本特色嘅水果口味製成雪糕基底，分別係焙茶脆皮抹茶牛乳雪糕批同朱古力脆皮蜜瓜味牛乳雪糕批。前者嘅脆皮以靜岡產焙茶製作，帶有微微烘焙嘅炭香，宇治抹茶雪糕甘醇微苦，夾埋微甜嘅牛奶雪糕就啱啱好中和返；至於後者，蜜瓜果香夠晒清新呢~
各大便利店+超巿 卡樂B 蝦之脆蝦片
蝦片梗係要有蝦味先好食！呢兩款新出嘅蝦片都可以一試，口感脆身，而且比時食開嘅感覺乾爽啲，冇咁油。濃厚蝦片嗰款冇改錯名，蝦味係幾濃香嘅，而日式七味唐辛子味蝦片，就冇乜辣味，不過有陣陣鹹香嘅紫菜味補返數。
各大便利店 NESCAFÉ World Coffee瓶裝咖啡
飲開咖啡嘅朋友仔，對咖啡豆嘅產地唔多唔少都有啲認識，各地嘅咖啡豆都有唔同嘅特色。今次呢個系列就推出多款單一地區嘅特色咖啡豆，打頭陣嘅有巴西同印尼蘇門答臘。巴西產嗰隻口感溫和平衡，帶有堅果甜味；而蘇門答臘嘅則濃郁醇厚，帶有少少樹木香。
***9月4號更新***
Circle K Dreyer’s 比利時朱古力雪糕批
繼續有新雪糕~ 朱古力控見到實心心眼，成條朱古力雪糕批由外到內到返外都係用咗比利時朱古力製作，外層脆皮、仲有粒粒杏仁粒，內層雪糕軟滑，啖啖都係濃郁嘅朱古力香甜味道，大享受。
各大便利店及超巿 百福甜品館 沖繩黑糖豆腐花
想隨時食到豆花嘅話，最方便當然係買定喺屋企，一開即食啦。新出嘅沖繩黑糖豆腐花，用加拿大一級非基因改造大豆製作，加入黑糖，豆花呈淡啡色。幾滑身嘅，同埋只係微甜。
各大便利店及超巿 固力菓 超幼百力滋
細個食開嘅百力滋出咗超幼版，幼到只係得幾mm咁，脆係脆咗嘅，不過幼得滯就唔夠口感，可能一次過啪幾支會過癮啲。兩款味道分別係冬蔭功同孜然味，前者酸辣，後者濃郁。
各大超巿 家樂氏 超級莓果Granola
早餐食開麥皮、穀物嘅健康仔，可以試下呢款新出嘅Granola喎，混合咗5種天然穀物同埋由士多啤梨、小紅莓、車厘子、紅桑子同提子等製成嘅果乾，無論倒落牛奶定乳酪度，抑或就咁食都係有非常豐富嘅口感。
***8月31號更新***
HKTV mall Dashin
個個都想瘦身，但瘦身之路唔簡單，又要做運動又要節食……而韓國呢個人氣品牌就提供多款健康食品同營養補充劑，令呢條路可以行得輕鬆少少。6款口味嘅糙米飯，放入微波爐叮4分鐘就食得，好方便。糙米係稻米脫殼後嘅米，加工過程較少而又含有豐富蛋白質、膳食纖維等多種營養，而且更易控制血糖。當中以全州蒟蒻拌飯最低卡，而紫蘇葉辣炒雞飯則係蛋白質含量最高。
心思思想食甜品嘅有豆腐Tiramisu，採用韓國大豆磨成嘅全豆腐，混埋忌廉芝士，卡路里、脂肪同糖分都比平時食開嘅低。解凍廿分鐘就食得，啖啖都係豆味，口感較實在。
另外有7款100%天然排毒沙冰，以原材料直接研磨而成，有豐富嘅膳食纖維，除咗有多種蔬菜同水果外，仲有加入燕麥、可可粉同椰子水等口味，例如橙色嗰包係甘筍+紅菜頭+蘋果+香蕉，而黃色嗰包就係椰菜+蘋果+梨汁+山藥，味道清甜。
***8月19號更新***
各大超巿及便利店 Haagen Dazs 全新Gelato系列
Gelato比一般雪糕口感更綿密，Haagen Dazs最近就出咗幾款新口味嘅gelato，朱古力嗰隻用上比利時朱古加同比利時朱古力醬製作，令到佢嘅味道非常之咁rich；而焦糖味則係預期中嘅香甜軟滑。
另外兩款日版新品包括杏仁牛奶gelato同四重抹茶脆皮雪糕三明治，前者落咗杏仁蓉去製作，滲出淡淡杏仁香，後者絕對係抹茶控嘅選擇，四重抹茶包括抹茶威化、抹茶朱古力、抹茶雪糕同抹茶曲奇，濃郁回甘香甜、鬆脆軟身等咩味道咩口感都齊晒，好豐富。
各大便利店及超巿 雀巢 花生醬系列雪糕批
相信呢度有唔少花生醬迷，呢兩款以花生醬做脆皮外層嘅雪糕批，味道濃甜，未食都聞到香味。內層分別以牛奶雪糕混合海鹽焦糖醬同紅桑子醬，前者偏甜而後者微酸，各有捧場客。
7-11、百佳 炒麵王 麻辣味
呢隻新款炒麵啱晒麻辣控，用麻辣香料調製而成嘅醬汁辣勁十足，加滾水等3分鐘後，倒返走啲水走加醬料攪勻就食得，夠晒方便。但溫馨提示，辣度幾強，就住自己程度落幾多醬啊。
7-11 珍珍 五香肉丁味薯片
平時去茶記食開五香肉丁麵嘅朋友仔，薯片都有呢隻味喇而家，用五香粉同秘製辣椒粉調製，不過味道比起茶記食開嘅略為淡咗少少，唔算好辣。唔知幾時會有埋沙嗲牛肉味呢？
***7月31號更新***
百佳超巿 EKSELENCE 雙色雪葩雪糕系列
今次呢三款都係雙色系列，一半係以拉脫維亞牛奶同忌廉製成嘅雪糕，另一半係糅合清新水果製成嘅雪葩。車厘子雪葩配朱古力雪糕味道又酸又甜，但平衡得幾好；芒果雪葩配雲呢嗱雪糕用真‧芒果製成，啖啖果甜；雜莓雪葩配雲呢嗱雪糕莓味突出，夠晒酸，好清新。
各大超巿 福 全新東南亞風味麵
呢個經典品牌今次推出兩款東南亞風味嘅即食麵，鹹蛋味炒麵嘅麵條煙韌，落埋鹹蛋調味粉撈勻食，鹹香中仲帶有少少辣；至於冬蔭功味湯麵採用秘製酸辣湯底，一啖食齊晒酸辣鹹甜香，佢嘅辣度唔可以睇少啊。
Green Common Califia Farms氮氣冷萃咖啡
一日要飲一杯咖啡先安樂嘅朋友仔，有冇諗過可以飲得健康啲？呢款氮氣冷萃咖啡用燕麥奶沖製，喺冷萃咖啡入面注入氮氣，令咖啡頂部可以有厚厚嘅泡沫蓋，飲落更滑口。今次呢個系列總共有4個口味，分別係雙倍濃縮、無糖燕麥、朱古力燕麥同焦糖海鹽咖啡。
***7月27號更新***
各大便利店及超巿 日本の台所 濃抹茶杯裝雪糕系列
品牌嚟自日本，首次推出嘅「濃抹茶杯裝雪糕系列」採用日本南山園嘅西尾抹茶，有抹茶、抹茶玄米茶，同焙茶三款口味。雪糕都相當Creamy，當中最有驚喜嘅係抹茶玄米茶，既有淡雅抹茶香又有獨特焙炒香及米香。抹茶就勝在茶香清新而且回甘悠長，焙茶口味嘅茶甘甜味突出。
7-11、各大超巿 DREYER’S 低卡、零脂水果雪葩條系列
日日都咁熱，點可能唔食雪糕雪條？但食得多又怕肥，真係好鬼矛盾。呢個雪葩條系列就唔怕啦，零克脂肪、低卡路里，仲要用真‧果汁製造，青提嗰款味道清甜，白桃亦夠冰感同果甜，食完都唔使咁大罪惡感。
惠康 珍珍 番茄炒蛋味薯片
珍珍最近好勤力不停推出新口味，呢款係每個屋企都好常會煮嘅家常便飯——蕃茄炒蛋。加入天然番茄粉同蛋黃粉製作，整出嚟嘅味道，酸酸地甜甜地，又真係幾似喺屋企食到嗰碟咁。
***7月14號更新***
7-11 Haagen Dazs 日版期間限定雪糕
夏天總係日日都想食雪糕，特別係而家咁多新款口味雪糕出現。呢兩隻係日版期間限定味，極致濃厚焦糖雪糕以奶油糖製作濃郁焦糖，再融入牛奶，味道濃甜香滑，仲有淡淡鹽香；而薄荷碎朱古力雪糕嘅薄荷超勁，冰感十足，食完完全透心涼。
各大便利店及超巿 Lays 章魚燒/鹽味芝士/照燒雞味薯片
Lays薯片一向都有保證，今次帶嚟幾款日式口味。開飯仔試晒後覺得最有驚喜嘅係大阪章魚燒味，隻味幾似啊，完全係章魚燒隻醬嘅鹹甜味，仲隱隱有啲wasabi味添；北海道鹽味芝士都唔錯，鹹鹹香香，芝士味都突出；照燒雞味呢一開就聞到好濃嘅酸甜照燒醬味，但就略為甜咗少少。三款薯片都係大波浪紋，口感特別香脆。
Don Don Donki 日清x Don Don Donki 薯片
由日本開到嚟香港嘅Don Don Donki，最近喺銅鑼灣又開多間分店。仲為咗呢次開業，聯乘日清出咗兩款限定口味，分別係博多明太同炸豬扒汁味，前者鹹香微辣，後者鹹甜酸集一身，有啲複雜。
各大便利店及超巿 卡樂B 和風咖喱味薯片、星洲辣椒蟹味什菜薯條
平時去餐廳會食嘅咖喱飯同辣椒蟹，搖身一變成為薯片薯條。以日式咖喱調味，令到呢隻薯片既有咖喱香，亦比一般薯片冇咁鹹得嚟，仲多咗陣甜味；至於星洲辣椒蟹味什菜薯條，就少少鹹少少辣啦。
Godiva 夏之戀限定系列
話說原來嚟緊就嚟係七夕，即係又係要買朱古力氹另一半嘅日子！Godiva出咗最新嘅夏之戀限定系列，六款全新朱古力包括四款以兩種唔同夾心組成的朱古力，同埋兩款片裝朱古力。例如草莓芝士蛋糕口味牛奶朱古力有清甜嘅士多啤梨醬香，檸檬紅茶慕絲牛奶朱古力則同時食到清新果香同濃郁茶香嘅味道。
HKTV mall Dashin 韓國塑身零食
各位健身界嘅朋友，除咗瘋狂食雞胸之外，都仲可以食零食嘅！韓國嘅塑身食品品牌進軍香港，帶嚟10種唔同口味嘅全麥蛋白零食，以烤焗代替油炸，每包嘅蛋白質仲有成12g添。呢幾款零食包括有朱古力味同芝士味嘅脆皮捲、燕麥、黑芝麻味嘅蛋白燕麥條、果仁/韓式麻糬/蒜香牛油/辣味嘅高蛋白餅乾同埋原味、抹茶味嘅高蛋白曲奇。不過除咗脆皮捲外，其餘嘅口感都偏硬，建議配埋牛奶或乳酪等一齊食，會比較好。
***7月9號更新***
7-11、各大超巿 雀巢 FAB士多啤梨冰條
出賣年齡系列啊！邊個細個食過巨星嘅？經典回憶、消失多年嘅巨星最近重出江湖啦！同以前一樣都係上中下三層色，最頂嘅係脆皮朱古力加彩虹碎糖、中間係雲呢嗱味冰層，而最底嗰層雖然都係紅色，但就由以前嘅西瓜味變咗做士多啤梨味，啖啖都係冰爽嘅果汁感。
各大便利店及超巿 雀巢 棉花糖及蘋果味甜筒
雀巢今年出親啲雪條嘅顏色都勁靚，今次係好似獨角獸色咁嘅棉花糖及蘋果味甜筒。個cone係粉藍色，頂層薄荷綠色嘅雪糕係棉花糖味，夾雜住粉紅紐紋嘅蘋果味雪糕，又靚又甜。
各大便利店及超巿 OREO夾心餅
Oreo一向都畀人好甜嘅感覺，今次竟然有25%減糖版！雖然食落都仲係幾甜，但至少冇以前咁甜膩，罪惡感少啲。另外仲有隻抹茶卷味脆餅，餅底薄身啲，抹茶味都幾香甜，試得過。
各大便利店及超巿 太平梳打餅 紫薯味
又一款細細個食到大嘅餅乾，最近出咗新口味，係近年大熱嘅紫薯味啊！成塊梳打餅都係淺紫色，加入咗自然紫薯粉，食落都個味都突出喎，有啲驚喜。
***6月26號更新***
7-11 7-Select x Oreo
香港好多甜魔，對甜到爆嘅甜品有份情意結，Oreo正係其中一個被寵幸嘅品牌。7仔聯乘最新推出咗一系列Oreo甜品，全部都係甜滋滋der。包括有曲奇忌廉泡芙、曲奇忌廉瑞士卷同曲奇忌廉盆栽甜品杯，甜品杯仲有粒粒Oreo餅碎食到，粉絲應會幾開心。
超巿+便利店 雀巢FITNESS 高纖脆片小食
零食都唔一定係邪惡嘅。一系列嘅雀巢高纖小食係個例外，有脆片有堅果仲有smoothie，脆片由燕麥、小麥、粟米及米四種全穀物組成；堅果則係非油炸，兼採用烘烤形式製成，包括有無加鹽花生及杏仁、全穀物餅乾同藜麥夾心朱古力豆等，食完都唔使怕肥。
7-11 X 嘉士伯概念店
天口熱特別想飲多幾啖涼快嘅啤酒，嘉士伯出咗3款新酒，分別係高濃度而帶有淡淡焦糖香嘅Elephant Strong、麥芽味較濃嘅EXPORT，同埋未經過濾，保留酵母、啤酒花同麥芽原味道嘅UNFILTERED，不過呢3款新酒，暫時都只會喺佢哋最新開張嘅7-11 X 嘉士伯概念店度先有得賣，入開愉景灣玩嘅可以留意下。
7-11/百佳超巿 珍珍薯片
細細個就食嘅珍珍薯片，呢排好勤力係咁出新味，鍾意食辣嘅朋友記住要挑戰下！bb級嘅有大蝦冬蔭功味，辣中帶酸；中級嘅有麻辣火鍋味，由多款四川麻辣火鍋湯底配料包括辣椒粉、花椒粉調配而成，一入口就爆發麻香，呢兩款都可以喺百佳/Fusion/Taste搵到；而大佬級就有花椒口水雞味，麻中帶辣，而且係慢慢滲出嚟，初頭唔覺唔覺猛食嘅話，一發覺時已經成個喉嚨都要發滾啦，想試呢款就可以去7仔搵下。
7-11 鬼滅之刃 味覺糖
有追開《鬼滅之刃》嘅動漫迷，要勤力啲四圍捕獲喇，呢次味覺糖聯乘佢哋出咗幾款主要角色嘅包裝糖果，仲內附貼紙一張，個包裝咁靚，買咗都捨得拆開嚟食。
***6月19號更新***
Market Place、3hreeSixty SO COCO 純素雪糕
呢個品牌嘅椰子布甸，一向大受歡迎，佢哋最近更加成功研發純素雪糕，以有機新鮮冷壓椰奶代替牛奶製作，無論椰奶定果肉都係新鮮材料。雪糕不含人造色素、人造香料、防腐劑同膽固醇。第一階段先推出咗6款口味，包括朱古力、士多啤梨、抹茶、 熱情果、 泰式奶茶同椰子，甜度適中，帶有椰香。素食朋友都可以食雪糕啦~~
Circle K Pols
呢個北歐拉脫維亞嘅雪糕品牌，有雪糕杯都有雪糕窩夫。經典雲呢嗱雪糕杯，以拉脫維亞牛奶製作，奶香十足。至於窩夫，則以細細個嘅窩夫載住雪糕，口味包括曲奇脆脆、朱古力脆脆同開心果等，中間真係食到粒粒曲奇/朱古力，增加口感。
Circle K 少爺啤酒
儲罐迷注意！少爺啤酒最近聯乘香港電車出咗兩款叮叮啤呀，限量版嚟。兩個罐一紅一綠，都幾靚，罐上印有舊式電車車款，收藏值高。紅罐係清爽嘅小麥啤，加入咗中式材料好似生薑同桂花去釀製，飲落都甜甜地；綠罐係美式淡愛爾，加啲香橙同佛手柑 ，果香幾重。
***6月5號更新***
HKTV Mall 貓山王榴槤冰心蛋糕
又到咗食榴槤嘅季節，相信各位榴槤控對呢兩樣由微熱山丘同Forbidden出嘅榴槤產品，一定念念不忘！上年喺台灣出嗰陣，掀起熱潮。貓山王榴槤冰心蛋糕外層係斑蘭葉蛋糕，包住100%新鮮貓山王榴槤蓉，雪到凍冰冰拎出嚟攤一陣食，榴槤味濃郁甘甜之餘，仲有陣陣涼浸浸嘅冰感！至於D24榴槤蛋捲，一盒廿條，滲有陣陣蛋香同淡淡榴槤香，口感酥脆。而家飛唔到台灣都唔緊要，香港有得食！
***6月3號更新***
Circle K Skippy特濃花生醬雪糕三文治
去唔到旅行，好在都仲有韓國直送嘅特濃花生醬雪糕三文治食到！花生醬迷一定要試，三層口感都唔同，底面係鬆軟嘅蛋糕，搽咗層香滑濃郁嘅花生醬糖漿，然後夾住濃味嘅花生雪糕，食完有種滿足感！
各大便利店、超巿 低脂乳酪甜品
呢兩款新出嘅乳酪，唔止係低脂，仲混入埋甜品，食完都唔會太有罪惡感~ 士多啤梨芝士蛋糕味啖啖酸甜，仲有芝士味餅碎食到添；而蘋果奶酥味呢，又有果肉又有奶酥餅碎，口感豐富。
各大便利店、超巿 卡樂B
黃金蝦味蝦條用原隻鮮蝦製成嘅蝦條，加埋鹹蛋黃製作，陣陣鹹香之餘，仲有啲似食緊脆口版嘅黃金蝦，好易食唔停口。至於美式酸辣味薯片，係期間限定口味嚟。大大塊C-vut厚切嘅波浪形薯片，撒滿美式酸辣粉，係幾夠味，先酸後辣，啲辣味係喺喉嚨先至滲返出嚟。
***6月1號更新***
各大便利店、超巿 珍珍薯片
呢期潮流好似興將啲菜式味道融入薯片度，珍珍兩款新味薯片都係港人大愛嘅菜式口味，分別係鹹香味濃嘅大漠孜然燒烤味，同埋陣陣鹹鮮嘅日式蟹鍋味。前者仲可以由自己調控鹹度，加入適量嘅孜然粉，再shake幾下先食。
Circle K 星球工坊 - 伯爵茶拿鐵爆谷
伯爵茶拿鐵爆谷，係由星球工坊同手調飲品店迷客夏聯乘推出嘅新口味，一包倒出嚟有兩隻口味，白色嘅係煉乳，啡色嘅係伯爵紅茶，兩隻味分開食又得，一齊啪落口又得，香甜脆口。
百佳、Aeon 家樂氏雜莓玉米片
食咗好多年嘅粟米片，終於有新口味推出喇！呢隻雜莓玉米片，以天然士多啤梨果泥包住，仲有粒粒小紅莓乾添，沖牛奶同豆漿一齊食都好夾，酸甜香脆。
TaSTe、Fusion、百佳 GREENE KING
英倫品牌GREENE KING，有超過220年嘅釀酒歷史，最近佢哋一系列嘅手工啤酒引入咗香港，不論係pale ale、IPA、blonde ale定係stout等款式都有選擇。其中GREENE KING印度淡色精釀啤酒（IPA）入口清甜，帶淡淡酒花香，係入門之選。而BELHAVEN橡木桶精釀金啤酒仲用咗威士忌橡木桶釀製，飲落雲呢拿味香甜突出，仲有淡淡橡木香。
***5月26號更新***
各大便利店、超市 叉燒飯味薯片、薑蓉切雞飯味薯片
薯片控有印象嘅話，實記得佢哋上年出過燒鵝味同細蓉味薯片，今年再出地道港式嘅燒臘味。薑蓉切雞飯味薯片有淡淡薑蓉味，但講真blind test嘅話又唔太食得出；不過叉燒飯味嗰隻就做得幾似，蜜味醬汁鹹中帶甜。btw，有建議可以兩款口味薯片疊埋一齊食，變成「叉雞飯」味喎。
各大便利店、超市 三眼仔菓汁先生
三眼仔粉絲呢排要飲多幾杯橙汁喇！菓汁先生換咗包裝做「變裝三眼仔」，樽裝、紙盒裝各有唔同造型，一陣變咗胡迪，一陣又變咗做勞蘇，總共有6款咁多，慢慢搵，慢慢儲。
各大便利店、超市 NESTEA®皇室奶茶系列
全新登場嘅呢款奶茶系列，有原味同低糖，兩者均以紅茶葉做茶底，茶味突出，奶同茶嘅比例調得唔錯，過口癮之餘仲可以提神。
***5月22號更新***
K11 Musea(期間限定店) Ekselence雪糕
呢個品牌嘅雪糕嚟自拉脫維亞，有多款口味例如紅莓石榴、焦糖、白朱古力紅莓、椰子、開心果雪糕批等，仲有低糖低脂嘅選擇。最近喺尖沙咀K11 Musea 商場 B2樓開咗間pop up店，有興趣試北歐雪糕嘅朋友仔不妨去下，pop up店開到6月12號呀。
***5月18號更新***
7-11、日資超巿 Haagen Dazs 日本直送雪糕三文治
冇得飛日本都可以食到日本口味嘅Haagen Dazs！今次引入嘅係士多啤梨松露朱古力，同香濃焦糖脆皮雪糕三明治，兩款都係期間限定嚟！前者以法式Ganache朱古力醬融入雪糕中，士多啤梨雪糕加埋士多啤梨朱古力，係香甜嘅；後者則係甜魔必選。
各大超巿及便利店 Haagen Dazs 全新哈密瓜雪糕及芒果雪糕
呢兩杯就用咗真‧果肉製作嘅，哈密瓜嗰杯，用咗歐洲同地中海限光培飼嘅哈密瓜啲果肉同果汁混入雪糕入面；而芒果則混會多國多品種嘅果粒果蓉製作，兩者嘅果味都好真同好香呢。
各大超巿及便利店 Dreyer’s 紅寶石朱古力脆皮雪糕批
相信朱古力控對於世界上第4種朱古力——紅寶石朱古力絕對唔會陌生，Dreyer’s最近竟然出咗紅寶石朱古力脆皮雪糕批呀！粉紅色嘅脆皮，有陣陣莓香，包住原味雪糕，酸酸甜甜。
7-11 日本直送7 PREMIUM小食
要入手新零食嘅話可以考慮下呢堆由日本直送嘅小食，幾款包括加入咗鰹魚汁甜醬油調味嘅脆口紫菜天婦羅、豆香味濃嘅脆脆豌豆、甜中帶微鹹嘅焦糖脆條、細細粒又鹹香嘅鵪鶉蛋。
***5月7號更新***
各大超巿+Circle K DREYER’S 芒果熱情果乳酪條
呢排天氣咁熱，要食返條雪條降下溫先得。呢條乳酪條，外層法國乳酪混合咗果蓉，中間係真‧芒果同熱情果果蓉，酸酸甜甜夠晒清爽，重點係得89kcal咋一條，唔使怕肥。
Circle K 樂飛利乳酸雪條
冇得飛韓國都可以食到韓國直送嘅雪條，呢條乳酸雪條酸度夠濃，兩層都係用乳酸奶製作，大熱天時食特別爽口。
各大便利店及超巿 Kinder繽紛樂 - 椰子口味
繽紛樂最新出嘅期間限定口味，充滿住夏天嘅氣息，係椰子味呀！食開嘅白朱古力中加入椰奶，再灑多層椰絲，甜得嚟都幾有層次，可以一試。
各大便利店及超巿 固力果百力滋 - 芥末味
嘩，今次呢隻百力滋就刺激喇，wasabi！仲要係超濃超嗆嘅wasabi，每條都有好多粉，食一條已經即刻feel到嚟料，如果兩條打孖一齊食，或者一次過連續食多幾條，絕對有潛力攻鼻到流眼淚，要挑戰下呢。
7-11 HAITAI 忌廉曲奇蛋糕批
韓國直送嘅朱古力蛋糕，一盒有12件獨立包裝。出面嗰層又係朱古力，入面嗰層都係朱古力（曲奇忌廉）同埋蛋糕，夠晒甜！
7-11卡樂B青豆脆條
7仔獨家發售嘅青豆脆條，兩款口味包括芥末味同鹽醋味，前者嘅辛辣味相對溫和，後者陣陣醋酸，口感香脆，都幾啱拎嚟佐酒。
HKTV Mall 英國Karma Bites爆脆蓮子
首次引入香港嘅脆口蓮子，口感有少少似爆谷，但又畀爆谷脆多少少同埋健康少少。蓮子以低溫烘焙，低脂又低卡。5種口味包括焦糖、雲呢嗱椰子、喜馬拉雅粉紅鹽、日式芥末、霹靂辣椒，有甜有鹹有辣亦有相對淡身啲嘅，梗有款啱試。
***4月27號更新***
7-11 伊藤家卷蛋
有兩款新口味嘅卷蛋呀，仲係好港式嘅添。香濃粒粒奶醬卷蛋，選用Skippy粗粒花生醬製作，雖然食嗰陣又唔太食到粒粒花生醬，但都幾甜香嘅；另一款黑芝麻蛋白卷嘅味就濃啲，兩款口感都鬆軟，早餐或下午茶啪返個都啱數。
各大超巿、便利店 卡樂B - 鰻重味米住米條
好多人都好鍾意食鰻魚飯，估唔到連零食都食到呢隻味！「鰻重」即係「鰻魚加重箱」，係日本料理中高檔次級嘅鰻魚飯咁解！今次呢款米條，選用鰻魚肉厚骨少嘅中間部位，沾上醬汁喺炭火上反覆燒烤，難怪食落都有陣陣炭燒香，仲真係有鰻魚飯嗰種味添，有驚喜。
各大超巿 合味道-泰式咖喱蟹味
杯麵黨留心啦~ 新出嘅黃色包裝，係東南亞系列嘅泰式咖喱蟹味。湯底微微辣啦，咖喱味幾重，仲有泰式香料嘅味道，但蟹味就唔多食到喇。淥一淥，三分鐘，當快閃咗轉泰國咯科科。
各大超巿、便利店 菓蔬先生
菓汁先生出咗最新副線呀——菓蔬先生。即係又用蔬菜又用生果製作，夠晒健康。橙色嗰支係100%胡蘿蔔南瓜橙混合果蔬汁，仲加埋南瓜原漿同芒果蓉添，酸酸甜甜；紫色嗰支則係100%紫甘藍紅菜頭紅葡萄混合果蔬汁，材料豐富呀：紅葡萄汁、蘋果汁、紅菜頭汁、檸檬汁、紫甘藍汁、黑加侖子汁混埋一齊，仲有山楂原漿添，口感較濃稠。
***4月22號更新***
COA 罐裝雞尾酒LA PALOMA DE OAXACA
呢排酒吧又唔開得，又有限聚令，酒迷少咗好多地方飲返兩杯。不過有好消息呀，喺屋企，就算自己唔識調都可以飲到cocktail！少爺啤酒廠最新聯乘著名手工雞尾酒吧COA，推出罐裝雞尾酒LA PALOMA DE OAXACA！以Arquitecto Tequila加Alipus Mezcal，仲有新鮮自家製西柚梳打調製，飲落清爽，酸酸甜甜帶有微澀，一啲都唔覺酒精度有成11%咁多。而且每罐仲有包特製鹽跟上，飲用前將鹽加喺罐邊或杯邊，層次就更提昇喇。除咗COA有得飲外，少爺網店、HK Brewcraft、Angry Beer同Momentai都買到。
***4月20號更新***
7-11 小丸子、蠟筆小新精品零食
小丸子同蠟筆小新嘅粉絲要留意喇，有便利店出咗好多佢哋嘅精品啊！收納包、鐵盒、索袋、卡等，款款都好可愛，打開入面仲跟棉花糖或者曲奇等輕便零食。
***4月16號更新***
各大便利店及超巿 Oreo 季節限定
今個櫻花季冇得飛去睇櫻花，都可以搵下啲櫻花零食止下渴嘅。Oreo史上首次推出粉紅色版呀！呢隻櫻花抹茶味，成塊餅都櫻花粉色，係幾靚嘅，中間抹茶夾心則以真正抹茶粉調製，茶味甘甜。至於另一款限定則係白桃烏龍味，可惜只係食到偏甜嘅桃味，烏龍茶香就唔多突出。
各大便利店 雀巢KitKat （聯乘SANRIO）
咁多位Hello Kitty粉絲，KitKat最近聯乘Sanrio出咗一系列嘅Kitty文具盒朱古力，有唔同嘅場景包括茶記、竹棚、大酒樓等，除咗有歐洲直送嘅迷你版海鹽朱古力及焦糖脆脆、榛子朱古力及榛子粒粒等，盒內仲有便利貼套裝同原子筆！粉絲們如果想要儲齊咁多款場景，可能就要走多幾間搵喇。
7-11、各大超巿、嘉頓門巿 嘉頓朱古力手指（聯乘B.Duck）
細細個食到大嘅朱古力手指，呢期都做緊聯乘呀！佢哋同B.Duck合作，以「友情歲月」為主題推出限定包裝版，仲隨盒附送400mm X 400mm 嘅B.Duck咕𠱸套一個添。
奇華 海苔肉鬆鳳凰卷
鳳凰卷可以話係經典小食之一，呢款海苔肉鬆味最近新登場。鳳凰卷皮薄脆，牛油味香，啖啖香濃海苔味，肉鬆碎唔算好多但剛剛好。而有舖儲罐癮嘅朋友仔，可以留意下佢哋最新推出嘅香港情懷特色曲奇禮盒，分別係巴士、電車同小輪造型，入面嘅熊貓、企鵝同樹熊曲奇，好cute cute。
City’super Mamcafe麩菓子、Tobishima蛋白餅
由明治15年創立嘅老舖製作，口感軟脆嘅麩菓子塗上青森產果物製成嘅果醬，都幾甜身。幾款口味選擇包括原味、蘋果、芒果同藍莓。至於蛋白餅，以品牌自家栽培嘅果物調味，有檸檬、柚子、覆盆子、藍莓同蜜柑幾款都係酸酸甜甜嘅口味揀，外脆內軟。
Tea WG 季節限定繁盛花季系列
喜歡品茶嘅朋友仔，有幾款季節限定嘅新茶介紹返。綠色圓罐裝嘅蝴蝶夫人茶由清柔嘅綠茶加南方水果搭配而成，有微微桃香，酸甜平衡。小黃罐係夜露茗茶，由黑茶加薰衣草搭配，陣陣花香；至於小綠罐則係桔花烏龍茶，味道清香。
***4月9號更新***
7-11、超巿 Pringles 期間限定新口味
薯片叔叔成日都有新口味登場，今次出嘅係和風雞肉串燒同博多明太子味，前者炭燒香味濃郁，堅係有啲似食緊雞串，不過係脆雞串嘅感覺；後者帶有微微鹹香，味道相對較淡。發揮少少創意，兩隻味疊埋一齊食，就變成明太子雞肉串燒啦~
7-11、超巿 粟一燒 叻沙味
呢隻期間限定嘅叻沙栗一燒，還原度都算高，入口滿滿椰奶香，同埋叻沙湯底嘅微辣香料味，會食上癮。
7-11 不二家LOOK珍珠奶茶味朱古力
又一款珍奶零食！呢隻朱古力由日本直送，就咁睇落平平無奇咪又係朱古力一粒，但咬開就有驚喜喇，珍珠奶茶真係有珍珠，軟身嘅，朱古力嘅奶茶味都重。
***4月3號更新***
Circle K 少爺啤酒 飛雲
圖：YoungMaster IG
政府落咗禁令，酒吧酒館今日6pm起要關閉14日，除咗少數餐廳仍然有酒精提供外，惟有要drink from home啦。好在便利店都有手工啤酒賣，最新返貨嘅係少爺嘅小麥啤飛雲。呢款酒加入咗柑橘橙皮同新鮮磨製嘅芫荽籽，勁清新。
少爺網店 Beyond Possible #001
圖：少爺網店
再同大家介紹多款少爺新作，呢款Beyond Possible #001，只係得0.5%酒精度，但就充滿酒花嘅香氣，飲多幾杯都唔怕會同人有親密接觸啦（應該係）。想試draft嘅話，Second Draft有呀。
7-11 Viennetta薄荷味千層雪糕
大家嘅童年回憶千層雪糕，早前啱啱再度面世時，就掀起一陣搜貨潮，好多人都去便利店搵下有冇貨。嚟緊佢哋又出多隻味喇，今次係薄荷朱古力，冰感十足，好清新！
Aroma Truffle 黑松露薯片
呢個嚟自新加坡嘅黑松露薯片品牌，首間海外旗艦店即將登陸香港喇，選址銅鑼灣，4月9號開業，到時最少有3款口味發售，包括原味黑松露、巴馬臣芝士黑松露同蜜糖芥末黑松露。開飯仔試過，原味嘅黑松露味就最濃郁，蜜糖嗰隻就幾甜身。全部薯片都係厚切波浪紋，有口感呀。
***3月27號更新***
7-11 VIENNETTA
有返咁上下大嘅朋友仔，應該會對呢款千層雪糕充滿回憶！最近喺便利店又見返佢蹤影啦~ 除咗有經典嘅雲呢嗱味，仲多埋香橙朱古力味添呀！兩者都係喺層層雪糕中間夾有片片朱古力脆片，口感軟滑得嚟又帶脆，微甜剛剛好。
***3月25號更新***
H.K. Lovecraft Nitro Dunkel氮氣黑啤
平時飲開嘅啤酒，大多數打入嘅都係二氧化碳，不過氮氣啤酒喺外國查實好流行下。香港最近都有酒廠新推出咗隻氮氣啤酒，斟出嚟嘅泡沫，比一般啤酒嘅綿密同埋順滑，好creamy嘅感覺。而酒體本身帶有烘烤過嘅麥芽香，仲飲到微微香醇嘅咖啡味。暫時得TAP The Ale Project、Second Draft、The Madhouse Taproom、Golem Craft Beer 呢幾間Taproom先有得飲！
***3月20號更新***
Circle K Skippy 特濃花生醬甜筒
早前出過雪條嘅Skippy花生醬，最近仲出埋甜筒添！花生味嘅雪糕，中間滲有花生醬，面層仲有粒粒花生碎，不過食落又冇想像中咁濃郁嘅花生香，微微甜咁啦，咬到花生醬嗰啖就開心啲啦。
各大便利店+超巿 雀巢鷹嘜奶條
細細個食到大嘅雀巢鷹嘜居然都攻入雪條巿場喎！成條白雪雪嘅雪條，以煉奶製成，啖啖都係煉奶香甜味，但又唔會話超甜，口感幼滑。
7-SIGNATURE x 伊藤久右衛門 抹茶系列
便利店繼續同日本抹茶品牌合作，帶嚟3款抹茶甜品，最推介嘅係抹茶長崎蛋糕，採用伊藤久右衛門宇治抹茶粉同日本麵粉製作，做出嘅嘅蛋糕鬆軟，滲有淡淡茶香，底部有烘烤過嘅粗砂糖，食落焦香甜身。另外，甜甜地嘅抹茶蜜瓜包同抹茶忌廉包拎嚟做早餐都唔錯。
7-11 BE-KIND堅果棒
想食零食又要食得健康嘅，呢款美國堅果棒係個唔錯嘅選擇。本身已經有海鹽黑朱古力、海鹽焦糖杏仁等口味，最新出埋花生醬黑朱古力味！使用天然原粒堅果同野生花提煉而成嘅蜂蜜，配埋原粒烤花生磨製嘅花生醬同黑朱古力，甜度適中，重要嘅係呢款零食又高纖又含植物蛋白，啪一條就補充到能量啦~
7-11 SANRIO DIY曲奇套裝連餅乾/軟糖/棉花糖
呢排唔係wfh，就係減少咗好多聚會，總之就多咗時間留喺屋企，多咗時間可以做下啲平時冇乜機會做嘅嘢，例如自己整餅？Sanrio最新推出咗一set 3款嘅DIY曲奇套裝，粉絲可以跟住自製到Hello Kitty、Little Twin Stars同My Melody造型嘅曲奇餅啦~
7-11 公仔麵重口味
又有新味撈麵啦~ 兩款都辣嘅，赤辣牛肉味撈麵用咗牛至、羅勒等香辛料製作個辛辣醬汁；口水雞味撈麵亦都啖啖辣中帶香麻，兩者麵條煙韌，索晒啲辣汁係幾刺激嘅。
***3月17號更新***
各大超巿及期間限定店 Ekselence脆皮雪糕批系列
呢個北歐拉脫維亞直送嘅雪糕品牌舊年年底登陸香港，最近喺尖沙咀海運大廈LCX仲有期間限定店呀。品牌採用最高質嘅自由放養奶牛，用全脂天然牛奶製作，配搭比利時朱古力脆皮！
特別推介白朱古力紅莓雪糕批同布朗尼雪糕批，前者以白朱古力配搭紅莓醬，酸甜清爽；後者有香濃朱古力味，口感厚實。
各大超巿及期間限定店 Ekselence黑魔法酒布朗尼雪糕
品牌除咗雪條之外亦有雪糕，里加黑魔法酒係拉脫維亞嘅國酒，含45%酒精！所以加入朱古力同布朗尼，食落朱古力嘅甜同魔法酒嘅甘調和，香濃醉人。
各大超巿 Lakto北歐脆皮鮮涷芝士棒
品牌嚟自北歐，專門為小朋友設計嘅「芝」味營養小食，選用優質拉脫維亞芝士製作，有豐富蛋白質而且低糖低鹽。脆皮鮮涷芝士棒係外面再包一層比利時朱古力脆皮，食落口感就好似雪糕批咁！新出嘅紅桑子石榴夾心夠清新，係小朋友同大朋友都會鍾意嘅口味。
city'super 櫻花祭
每年到咗3、4月，本嚟都係出遊賞櫻嘅時間，可惜今年冇得飛。不過唔緊要，有日式超巿舉行櫻花祭，有唔少以櫻花為主題嘅季節限定同新貨，止住癮先啦。
日本櫻花士多啤梨 (季節限定)
呢款粉粉地色嘅係櫻花士多啤梨，全個日本得5位佐賀縣農夫種㗎咋！由農園直送到港，清香味甜，果肉結實。
ROYCE’櫻花系列 + Pioneer企劃 梳乎厘櫻花班戟粉
好多人平時返鄉下都會買呢個品牌嘅朱古力返嚟做手信，今次推出期間限定櫻花味朱古力，片片都帶有花香；如果想喺屋企自己DIY梳乎厘班戟嘅話，可以揀呢款櫻花味嘅班戟粉，配埋櫻花果醬或者櫻花糖漿就更有feel了。
***3月4號更新***
7 -11 伊藤久右衛門抺茶甜品系列
抹茶控出動喇！有便利店引入日本直送漑宇治抹茶甜品系列，包括抺茶千層蛋糕、甜品杯同忌廉泡芙。千層蛋糕有多層可麗餅皮疊住由伊藤久右衛門宇治抺茶製成嘅抹茶忌廉，不過抹茶味感覺較輕。
想要重味之選，呢個甜品杯就啱晒，五層分別係抹茶海綿蛋糕、抹茶忌廉、北海道牛奶忌廉等，口感幼滑。頂層再撒上宇治抹茶粉，陣陣甘醇茶香。
至於抺茶忌廉泡芙 ，口感軟熟，以獨家秘方製成嘅抹茶忌廉嘅茶味係幾香嘅，收尾有微微甘澀。
各大便利店及超巿 紅桑子脆皮雪糕批
Haagen Dazs又又又有新口味登場，紅桑子脆皮雪糕批，唔止內裡嘅雪糕有一條條紅桑子果醬紋，外層嘅比利時白朱古力上都有一粒粒真‧紅桑子乾果肉，味道酸酸甜甜。
***2月25號更新***
7-11 Häagen-Dazs 軟芝士無花果冧酒脆皮雪糕三明治
Haagen Dazs又有新味啦~ 係日本直送嘅軟芝士無花果冧酒味，外層有馬斯卡邦軟芝士朱古力脆皮同威化，一咬落去，係奶香味重嘅軟芝士雪糕，食到中間，仲有酸甜嘅無花果冧酒夾心。雖然得0.2%酒精應該唔會食醉人，但會醉心啊科科。
Circle K(優先發售) DREYER’S 草莓紅豆醬雪米糍
一包得一粒嘅雪米糍，係煙韌控嘅至愛。喺淡淡嘅士多啤梨雪糕中間夾有微甜嘅紅豆醬，甜度有層次。
Don Don Donki/Sodamall 日田天領水
呢支日田天領水喺日本大為流行，而家引入咗香港啦。嚟自九州地區，取自大分縣日田盆地嘅地下深層嘅天然水，水質純淨，氫自由基含量甚高，有助調整體質、促進新陳代謝，更有養顏之效。就咁飲又得，用嚟沖茶或熬湯則可以令茶/湯變得更醇更甜。
***2月19號更新***
7-11 CW麻糬朱古力曲奇
嗚呀，呢隻韓國出嘅麻糬朱古力曲奇平時要等Friend去完旅行送手信先有得食㗎，而家唔使啦~ 有便利店引入咗，外層係軟身嘅朱古力曲奇，內餡夾住煙韌麻糬，好有口感。
7-11 全新包裝排裝朱古力
由細食到大，都係一粒一粒咁食嘅M&M'S同麥提莎，突然變咗一排排咁食，係有啲唔慣。不過都幾有新鮮感，感覺就好似一次過將好多粒M&M'S放晒入口咁，甜度十足！
各大便利店 KOIKEYA火鍋味脆條 + BABYSTAR火鍋味脆片
好想打邊爐但呢排又唔係好敢打住？試下呢款新出嘅零食啦，以火鍋湯底味為主題，脆條嘅有生薑雞同花椒味，脆片嘅就有雞白湯同麻辣味，一路食一路幻想住自己打緊邊邊先啦。
各大超巿及零售店 日清湖池屋 蕃茄汁味薯片
就咁望可能你以為又係蕃茄味薯條，但望真啲，有啲唔同喎，係蕃茄汁味！日清湖池屋今次同番茄汁品牌KAGOME合作，採用特製蕃茄粉製成，一食就知，真係好「茄汁」，多咗份酸酸甜甜。
***2月14號更新***
Circle K 海太黑糖珍珠奶茶雪條
珍珠奶茶嘅熱潮好似一直都冇減退過，最新嘅產品有呢款黑糖珍珠奶茶雪條。外層係奶香濃郁嘅奶茶雪糕，食嗰陣小心啲，咬開中間係會流出嚟嘅黑糖漿，細心啲會咬到幾粒珍珠嘅，係幾唔錯，不過可惜細條咗啲，黑糖流心位好快完咗。
開售日期：2 月20 日
7-11 雀巢奶蓋芝士桃茶味甜筒
呢排是咪興將茶飲變做雪糕？呢款奶蓋芝士桃茶味嘅甜筒，頂層係芝士味雪糕，但淡味咗少少。食食下就會食到桃茶味嘅雪糕，微甜啦；再食仲有朱古力漿，甜度幾有層次。
***2月7號更新***
7-11 天仁茗茶麵包
便利店同天仁茗茶聯乘，推出咗兩款茶味麵包，綠茶紅豆白玉包混入天仁茗茶台灣綠茶製，內餡粒粒白玉口感煙韌；黑糖珍珠紅茶忌廉包，內餡嘅忌廉係阿薩姆紅茶，又真係有淡淡紅茶香，不過珍珠就略嫌少咗啲啲同腍咗啲啲。
7-11 栗子蛋糕
苦中一點甜！由日本直送嘅栗子蛋糕，以意大利栗子蓉同北海道牛奶製，口感幼滑，啖啖栗香。
7-11 冷泡無糖紅茶
以冷泡技術沖製嘅茶飲，大吉嶺紅茶帶有獨特果香，而英式紅茶則使用皇室傳統英國混合茶，味道香濃。兩者都係無糖，飲多幾啖都唔怕肥。
***1月23號更新***
7 -11 PABLO忌廉芝士味新地
呢隻大受港人歡迎嘅日本半熟芝士撻品牌，最近同香港便利店合作，推出咗隻得香港先有嘅軟雪糕口味呀！呢隻忌廉芝士味新地口感軟滑，食落完全係cheese tart嗰隻味，$15都試得過呀芝士控。
7 -11 士多啤梨味可口可樂
過完年好快又情人節，可口可樂特別推出咗款甜到入心嘅新口味——士多啤梨味可樂！之前淨係得日本有，而家香港都有啦~ 就咁聞都聞到陣士多啤梨味，飲落隻味反而冇咁出，淡淡地咁，但都可能會有人覺得微微藥水味咁~
7 -11 Doritos芝士粟米片
脆卜卜嘅Doritos芝士粟米片出埋dip醬，分別有香蒜蛋黃醬同莎莎醬，dip下嚟食又真係唔同啲，兩款口味都係香口嘢，仲有陣陣微酸，好易令人食唔停口。
Circle-K DYDO X PIERRE HERMÉ朱古力咖啡
咖啡控又有新咖啡試，呢個brand聯乘法國甜點品牌，選用清爽嘅巴西咖啡豆，搭配清香嘅厄瓜多可可豆，調配出嚟嘅咖啡帶有朱古力香，甜度輕微。
***1月22號更新***
7-11 卡通精品連零食
今次同大家介紹呢批零食，相信主角都唔會係啲零食，而係一眾cuty嘅卡通~ 迪士尼帆布包同透明包都連埋曲奇，前者有索繩又有手挽，放飯盒放零食都好方便；後者分別有Daisy大蝴蝶結同唐老鴨水手帽兩款，大小朋友都啱用。
Chip & Dale、小飛象、Marie三款護照套內，各有三包蛋黃餅，唔好以為跟得呢啲精品嘅都唔求好食，呢幾包嘢又幾有驚喜喎，鹹香脆口。
多啦A夢嗰款打開包裝，嘩！係多啦A夢造型嘅朱古力夾心餅呀！係幾得意嘅不過可惜味道一般，口感唔夠鬆化；至於Super Mario就係全塊造型朱古力，好甜。
***1月14號更新***
Häagen-Dazs 日式紫薯撻脆皮雪糕三明治
終於唔使葡萄日本人，因為香港都食到日本直送嘅Häagen-Dazs雪糕同雪糕批啦！呢款外面有鬆脆嘅紫薯威化同紫薯朱古力脆皮，入面就係帶蛋香嘅吉士雪糕同幼滑香甜嘅紫薯醬，紫薯味道香濃得嚟又自然，而且口感層次豐富。7-11有售，1月20號起日資超市有售。
Häagen-Dazs 香濃南瓜雪糕迷你杯
另一款香濃南瓜雪糕迷你杯用嘅係北海道產惠比壽南瓜，特色係圓潤飽滿，味道濃郁香甜。而南瓜更會烘烤以帶出南瓜本身嘅甜味，喺綿密嘅南瓜雪糕中加入濃厚南瓜醬，雙重享受呀～7-11有售，1月20號起日資超市有售。
***1月8號更新***
Rankingdak 雞胸肉小籠包
健身朋友幾乎餐餐都要食雞，呢個嚟自韓國嘅人氣即食雞胸肉品牌，最近又新出咗幾款雞肉產品。雞胸肉小籠包嘅外皮以薯粉製成，內餡有雞胸肉有菜，三款口味包括有原味、泡菜味同燒肋骨味。放入微波爐（700W）叮3分鐘，或者隔水蒸8分鐘就搞掂。
Rankingdak 醬汁雞胸片
餐餐都白烚雞胸又真係寡咗啲嘅，為咗keep靚個body嘛。不過都唔係冇辦法嘅，呢個LOVEEAT® SAUCE 系列選用韓國本土產雞肉，伴以三款醬料：蒜味、燒烤味同蕃茄味，原本dry dry der雞胸肉即刻變得惹味咗。未解凍時，直接放入微波爐（700W）加熱 3分 30秒就食得，夠晒方便。
Rankingdak 山蔘雞湯飯
以韓國產雞腳長時間烹煮而成嘅湯頭，骨膠原豐富，配埋手撕雞肉同初芽GABA糙米，既飽肚又健康。煮法亦方便，只需打開一半包裝頂膜，再放入微波爐叮約7分30秒至8分30秒就可以食。
7-11 7-SIGNATURE x Pablo
Pablo可以話係香港人最愛嘅日本品牌之一，次次返親鄉下都要去食下佢哋嘅芝士撻同產品，新一年就有好消息帶畀大家喇！而家喺香港便利店都買到Pablo喇！兩款由日本直送嘅甜品，分別係杏脯啫喱芝士忌廉泡芙同杏脯啫喱芝士忌廉瑞士卷，兩者都係酸酸甜甜，軟綿綿嘅口感，但芝士味就淡咗少少，唔係好濃郁。
7-11 7-SIGNATURE熱捲餅
冬天就算要快食，都會想食啲暖笠笠嘅嘢食，新出嘅熱捲餅啱晒，放入微波爐叮一叮就食得，既方便又快捷。兩款口味包括辣辣地嘅香辣肉醬腸仔，同埋可以微微拉到絲嘅芝士火腿。
文：Kar
相、片：Tom Li