唔知大家細細個有無睇過卡通片入面嘅主角去食流水麵呢？開飯仔自小已經受到日本卡通嘅薰陶，立志大個之後要親身去日本坐喺瀑布面前食流水麵，而且一定要食到「殊殊」聲，咁先算正宗！今次嚟到鹿兒島指宿，終於有機會親身試流水麵喇！（尖叫）

 

巴士到達指宿嘅唐船峽後，馬上就見到唐船峽市營流水素麵醒目嘅招牌。店內分為室內用餐區同半露天用餐區，由於當時天氣比較寒冷，大部分客人都選擇坐室內用餐區，亦有擺放多部暖爐，非常貼心。室內用餐區嘅裝修以木造為主，更設有日式坐席，背靠著窗外嘅小型瀑布，環境清幽。可能因為係冬天嘅關係，店內人流唔算好多，只係坐咗幾枱當地人同一枱香港遊客，寧靜之中大家可以更專心地享用流水麵。


大家可以選擇叫各款定食，亦可以散叫流水素麵。定食比較豐富，有日式飯團、各款燒魚、魚刺身、味噌湯，當然唔少得主角流水麵，另外亦配有醬汁、蔥花同芥末，客人可以按自己喜好調配醬汁。

飯團選用日本珍珠米，份量頗大，可惜味道較淡，但適合用嚟填一填肚。

兩條燒魚做得出色，魚肉鮮甜，當中鹽燒比汁燒更美味可口，但會比較多骨，大家食嘅時候亦要多加留心。至於魚刺身，亦有少量魚骨，但食得出鮮味，同平時食到嘅刺身口感唔同，幾特別。味噌湯味道亦算濃郁，最緊要係夠熱，喺幾度低溫下飲到一碗熱湯，令人感到滿滿嘅幸福感。

到主角出場，流水麵麵質幼滑，放落迥轉嘅泉水入面浸下，然後再放入充滿醬汁嘅碗，食落味道清甜。望住流水麵隨住水流不停轉動，會有一種心靈被治癒嘅平靜感覺。同傳統流水麵唔同，唐船峽呢度嘅流水麵為咗改善衛生情況，全部都以電動迥轉轉盤代替以前嘅竹架運送，一方面可以更有效確保衛生，客人亦唔洗怕錯過流過自己嘅麵條，可以慢慢食、唔洗急。順帶一提，唐船峽曾經入選「水鄉百選」，確保水質優良，大家可以食得放心。

食完流水麵，可以喺唐船峽附近散步，比自己個胃消化一下，又可以欣賞下指宿嘅景色，不過記住要預時間準備搭下一班巴士，如果唔係又有排等嫁喇！

地址：鹿兒島縣指宿市開聞十町 5967

營業時間：10:00-17:00 （全年無休，夏天有機會延長營業時間）

交通：由JR指宿站坐巴士前往「唐船峽」下車即可到達，記得要注意巴士班次時間。

電話：0993-32-2143


文、相：Dap


其他精選文章推介：
【國際新食力】日本Legoland下月開幕 Lego形薯條超過癮
【飲食潮流】尖沙咀新發現 北海道汽球牛奶布甸 香港都有得賣喇
去尖沙咀玩具展覽睇白兵！博物館附近美食懶人包