對於唔少抹茶控嚟講，呢幾年應該覺得好幸福，唔單止越嚟越多日本老字號嚟香港開分店（最近一間仲要係京都300年老店！），本地甜品店嘅抹茶甜品水準都逐漸提升。不過亦有人話抹茶熱潮開始走火入魔，真係咩都抹茶乜乜乜，其中一個例子就係呢個冬天開始有餐廳推出抹茶火鍋。以下三間餐廳嘅抹茶火鍋，你會唔會有興趣一試？
 

自家制丸子最夾　　越後屋

圖：DollyLing

今年最先喺Instagram帶起抹茶火鍋嘅，應該就要數到大坑呢間日式刨冰店。抹茶火鍋用日本宇治抹茶粉，然後以白朱古力嘅甜融合抹茶嘅甘，最後加入忌廉同牛奶後口感亦夠幼滑。而配料就有香蕉、甘栗、士多啤梨、蜂蜜蛋糕、紅豆蓉、雪糕同丸子。當中最多人讃嘅係自家制丸子，白雪雪又煙煙韌韌咁，最緊要嘅係同抹茶紅豆最夾吖嘛。
 

莎莉蛋糕點抹茶　　糖室

圖：Chillazy Dessert 糖室 Facebook

石硤尾呢間文青甜品店加入戰團，特濃宇治抹茶火鍋鍋底一樣使用日本宇治抹茶粉，同白朱古力、忌廉同牛奶。勝在睇顏色就知抹茶粉落得夠多。配料有八款，包括新鮮水果粒、棉花糖、多士粒、雪糕球、細細個食開嘅莎莉蛋糕同比較少見嘅紫薯湯圓！唔單止配搭新鮮，而且仲特別有日式同港式聯乘嘅感覺。
 

即叫即製窩夫加分　　Ocio

圖：Ociokitchen Facebook

如果話以上兩間分別係日式同港式Fusion，呢間Cafe嘅出品就比較有西式嘅感覺。雖然鍋底一樣用咗日本宇治抹茶粉，但配料就有棉花糖、雪米糍、士多啤梨、香蕉同窩夫。佢地嘅窩夫係Cafe招牌菜之一，即叫即製。而且佢地喺旺角同大圍都有分店，兩個都係約食飯嘅熱點，三間之中最就腳。
 

 
文：Cathy

開飯編輯推介：

1. 【專訪】荃灣米線店 堅持排長龍都要逐碗煮

2. 11月份好評餐廳十強

3. 2017年港澳版米芝蓮指南

熱門文章推介：

1. 【一個人開飯】一個人喺尖沙咀食乜好？

2. 唔同Budget都有！情侶鋸扒指南

3. 顏值爆燈 「色」飲「色」食在荃灣

隨時接收最新資訊
讚好OpenRice專頁！