近年越嚟越多得意點心登場，呢間新派點心店都係代表之一，繼梳乎蛋同Little Twin Stars等得意點心之後，今次同百厭又鬼馬嘅蠟筆小新Crossover！唔單止繼續有唔同流沙包畀大家任玩之外，仲有個Pat Pat奶凍畀大家變身美冴媽媽，瘋狂打小新屁股！
喺中環同尖沙咀都有分店嘅点心代表即日開始會有呢個蠟筆小新系列嘅點心供應，當中最搶眼嘅，一定係呢個震震屁股奶凍！唔洗再妒忌之前日本嘅小新期間限定Cafe，因為而家你都可以親眼睇住個屁股形嘅奶凍係咁震，夠哂搞笑。奶凍用咗日本3.6牛乳、淡奶油同魚膠片製成，唔容易融所以拍片都可以玩多陣。
講起拍片，又點少得流沙包呢？最鬼馬嘅可以話係呢個不理不理左衛門奶黃流沙包，豬仔外表得得意意咁，但只要用筷子向佢個鼻篤落去，佢就會變咗一隻好似識流鼻水嘅豬咁。當然入面嘅餡其實係用咗咸蛋黃、好立克粉、煉奶同鮮牛油嘅秘製奶黃嚟。
想再「重口味」啲？仲有籠大象朱古力流沙包，點解叫大象？因為其中一個包印住小新無著褲嘅正面，咁咪見到小新嘅「大象」囉。裡面係用咗瑞士原粒朱古力同咸蛋黃整成嘅朱古力流沙，所以個餡係啡色嘅。亦所以如果你從小新背面個Pat Pat篤落去嘅話......效果係點開飯仔相信你應該想象到。
想食流沙包又唔想咁「重口味」嘅，仲有個小新 & Friends牛奶流沙包，裡面係有日本3.6牛乳嘅流沙餡。
另外仲有三兄弟鮮蝦餃同小新&小白松子百合餃，前者入面有越南原隻大蝦同手打豬肉，後者一樣有越南原隻大蝦，不過變成搭松子加鮮百合。
呢個蒙蒙豬蝦餃海鮮腸粉亦非常特別，小新其實係一粒蝦餃，張被就係腸粉皮嚟，中間仲夾住塊生菜，方便大家掀起小新張被叫佢起身。
另外仲有甜品，例如非常得意嘅真真假假西瓜糕，特別用咗蘭香子嚟扮西瓜籽，真係幾可亂真。唔想食凍糕嘅話，仲有情人蛋撻同小新椰皇燉奶任揀。
飲品方面都有心思，小新桃味特飲上面仲要有個震震屁股奶凍，可以繼續打小新Pat Pat啦。另外爸爸啤酒係100%日本進口嘅麒麟沙冰啤酒，連上面嘅泡沫都係啤酒嚟！女士們仲可以一試比較少有嘅媽媽櫻花味啤酒。小朋友唔可以飲酒就可以嗌小白朱古力特飲。
不過咁，得意卡通點心就少不免會用到唔少食物色素。而且點心味道驚喜唔大，例如個不理不理左衛門奶黃流沙包嘅流沙餡其實唔太食得出好立克味，而且個皮太厚，幸而粒粒香口咸蛋黃補返數咁啦。
以上點心、甜品同飲品即日起供應到2017年1月17號，無論你係小新忠實Fans，定貪得意想嚟試下打Pat Pat都記得留意喇。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
1. 牛頭角特色食店攻略
隨時接收最新資訊
讚好OpenRice專頁！