《美女與野獸》中一朵魔法玫瑰，令人聯想起貝兒同王子美麗嘅愛情故事。當最後一塊花瓣，俾開飯仔吞咗落肚…都不失為另一種浪漫吖！香港都有唔少餐廳將食物製成玫瑰花型，一朵食得嘅粉紅玫瑰，女仔見到實好鍾意，仲好過送真花啦係咪先？
最浪漫玫瑰雪糕 Givrés
由英國人開設的意式雪糕店，一瓣瓣花型雪糕做得細緻，雪糕於香港新鮮製作，仲有朱古力、焦糖、薰衣草等多款口味，最傳神當然要食玫瑰花味啦。
最香甜玫瑰饅頭 唐宮小聚
圖：紫琪524
呢度啲點心出名破格又有創意，呢個玫瑰饅頭相當人氣，玫瑰花造型賣相靚，粉紅色包有淡淡的花香，入面係玫瑰豆蓉，可以加煉奶一齊食，味道香甜，仲有花瓣伴碟好浪漫。
最精緻玫瑰蛋糕 Patisserie Tony Wong
呢間餅店由名廚Tony Wong開設，玫瑰花蛋糕雖然已經推出咗好耐，但直到今時今日仍然好受歡迎！每一塊花瓣都係朱古力，有分大同細size及多款顏色可揀，氹女仔一流。
最飽肚玫瑰牛肉 溫野菜
呢款花樣盛合以美國牛肋肉、丹麥豚肉、紅心蘿蔔等卷成花狀，係春天期間限定款式。放入櫻花美人湯底淥一淥就食得，肉食系女子見到一定開心死。
文：Perrins