今年夏天大家飲過幾多杯黑糖珍珠鮮奶？喺銅鑼灣排咗幾耐隊？無可否認今年飲食界最Hit嘅就係嚟自台灣嘅黑糖珍珠鮮奶，台灣過江龍越開越多。開飯仔就幫大家精選10間今年新開台灣飲品店，由黑糖珍珠鮮奶飲到芋頭鮮奶，從新派到珍珠奶茶始祖都應有盡有。
 

黑糖虎紋IG洗版　老虎堂

嚟自台中，號稱全台黑糖虎紋創始店嘅老虎堂，銅鑼灣首間分店可以話係揭開今年黑糖珍珠鮮奶風潮。雖然後來台灣爆出黑糖唔係手炒嘅醜聞，但依然無阻大家去排隊影相打卡。咁平心而論佢地嘅黑糖波霸的確係入味又有咬口，難怪分店越開越多嘅。
 

即席手炒黑糖珍珠　幸福堂

同樣主打黑糖珍珠，第一間香港分店同樣開喺銅鑼灣渣甸街嘅幸福堂，被大家喻為老虎堂勁敵，高峰期同樣都有長長人龍。不過大家嘅著眼點可能已經由一開始人手炒製黑糖變成炒「花生」：台灣總公司同香港代理商不和而鬧上法庭，香港分店隨時全線結業！
 

黑糖珍珠多種配搭　珍煮丹

以上兩間嘅黑糖珍珠都係配鮮奶，而呢間同樣開喺銅鑼灣嘅珍煮丹（溫馨提示多次，店名唔係珍煮母呀）就有多啲唔同配搭：泰式奶茶、布丁鮮奶，到最近推出嘅奧利珍，即係Oreo奶蓋！多啲選擇自然無咁容易覺得膩啦。
 

台灣人氣芋頭鮮奶　迷客夏

以上年台灣大學生票選No.1嘅手搖飲品專門店之名嚟到銅鑼灣開首間香港分店，令各位台灣人同香港人都大讚嘅就係佢地嘅招牌大甲芋頭鮮奶，用台灣大甲芋頭手工燜煮再壓成蓉，啖啖香甜軟綿。想清新啲嘅話亦有柳丁綠茶。
 

無添加芋頭鮮奶　沐白小農

無獨有偶，呢間台灣過江龍同樣主打大甲芋頭鮮奶，仲話百分百純天然無添加，用新鮮牛奶取代奶霜，而且唔額外添加任何糖。其他飲品用嘅亦係全天然蔗糖或者黑糖，甜度唔高勝在味道的確自然討喜。兩間打和啦Super！
 

 
手沖清新茶飲　木衛二鑄茶所

銅鑼灣又唔係剩係得黑糖珍珠同芋頭鮮奶嘅，呢間嚟自台北淡水嘅飲品店就主打現泡茶飲同手作鮮果飲，味道清新得多。茶葉全部嚟自台灣，好似東方美人茶、金萱、烏龍等，而奶霜法芙娜配搭味道有驚喜。店裡面仲有月球燈，影相起嚟特別有文青Feel。
 

丫頭主理天然台茶　不要對我尖叫，日常茶間，

品牌主理人之一係台灣藝人丫頭，主打選用天然材料，而且店名、Logo、甚至杯上面嘅字句都非常獨特，成為中環一個新文青打卡點。招牌冬瓜菊花茶清香微甜，加上可以搭配白玉珍珠、爆漿珍珠或者地瓜芋圓，定價亦合理，難怪旋即成為人氣店。
 

足料招牌Q罩杯　恰迷紅茶

呢間就最啱煙韌控，皆因招牌Q罩杯飲品有差唔多三分一杯都係珍珠、芋圓同地瓜圓，珍珠煙韌而芋圓同地瓜圓都有咬口。珍珠奶茶同樣有近三分一杯都係珍珠，啖啖都咬到珍珠夠哂爽歪歪。仲有香港限定嘅芝士奶蓋系列呀。
 

台灣珍珠奶茶始祖　春水堂

自稱係台灣珍珠奶茶始祖嘅春水堂今年都開到嚟香港！茶葉同珍珠都從台灣直送到港，特別係珍珠更加要求喺調茶嘅時候先烹煮，保持新鮮同Q彈口感。雖然暫時得高鐵站外賣店，但好消息係出年一月將會喺觀塘apm開設人文茶館，到時會有埋小食供應呀。
 

台灣國宴級珍奶　翰林茶館

同樣自稱台灣珍珠奶茶始祖，翰林茶館仲有杯國宴珍珠奶茶：被台灣政府選為招待世界各地外賓嘅指定珍珠奶茶！另外熊貓鮮奶茶即係有齊白珍珠同黑珍珠嘅珍珠奶茶，一杯有兩款口感。而且尖沙咀嘅茶館仲有供應一系列以茶入饌嘅菜式，飲完茶仲可以食碗麵。

文：Cathy
相、片：Kar、Cathy、Yanica、Timothy