嚟到聖誕呢個咁普天同慶嘅節日，梗係要去食自助餐慶祝下~ 而且自助餐款式又多，又可以邊食邊傾。今次精選咗9間聖誕自助餐畀大家，各有特色，重點係間間都有即開生蠔呀～～～
普慶餐廳 普慶遊樂園自助餐 
因為疫情關係而家都無咩大型活動，所以呢間餐廳就以嘉年華為主題，將餐廳搖身一變，變成色彩繽紛嘅冬日嘉年華！除咗節日必食嘅傳統烤火雞、蜜汁焗火腿、威靈頓牛柳同原隻烤乳豬等，仲有加碼版嘅海鮮冷盤，有紐西蘭生蠔呢！另外亦有烤龍蝦配麵豉醬、白蘭地牛油烤帶子、薑鹽燒大虎蝦等熱食～Raclette芝士專區同聖誕甜品都唔可以錯過！唔單止有得食，仲有得玩，餐廳喺特定時段會設置遊戲專區，提供多款嘉年華必玩嘅小遊戲，例如擲彩虹或拋環遊戲等，有機會贏取多個豐富獎品，如餐飲禮券、酒店住宿同其他小禮物呢～
「普慶遊樂園」自助餐
供應日期：由2021年12月1日至31日
Alva House 海鮮聖誕自助餐
海鮮控留意！呢間自助餐有款海鮮菜式，包括人人都鍾意嘅即開生蠔，新鮮又大大隻～另外有龍蝦撻、海膽魚子青瓜沙律、席切刺身等前菜。仲有唔同國家嘅特色美食包括海膽軟殼蟹飯卷、野菌西班豚肉卷、海皇花膠羹、日式爐端燒及天婦羅等；應節主菜則包括燒原隻火雞、威靈頓牛柳、香烤戰斧牛扒同蜜糖燒火腿。當然唔少得甜品如聖誕樹蛋糕、聖誕布甸配白蘭地汁、樹頭蛋糕、果子麵包同薑餅等，真係好有節日氣氛～
海鮮聖誕自助餐
供應日期：由2021年12月24-26日、31日-2022年1月1日
The Place 聖誕盛宴
旺角呢間酒店餐廳有師傅現場即切烤火雞，熱辣辣又惹味。威靈頓牛肉外層酥脆，內層嘅牛排肉汁豐富，呈粉紅色熟成程度啱啱好～指定日子仲會會供應龍蝦濃湯、即切北京烤鴨、香煎鵝肝、芝士焗龍蝦、炒龍蝦鉗、原盅鮑魚燉雞湯及即烤芝士，選擇好多元化～海鮮方面，無限供應如新鮮生蠔同麵包蟹等，回本之選！甜品包括聖誕蛋糕及麵包、薑餅芝士蛋糕同玉桂蛋奶酒法式焦糖燉蛋等，幾有誠意。
聖誕盛宴
供應日期：由2021年12月1日至31日
Café Kool 海鮮聖誕自助餐
除咗聖誕火雞呢啲傳統嘢同埋即開法國生蠔，呢間一樣以海鮮做主打，包括法式焗龍蝦、龍蝦香氣好濃又鮮甜，各式海鮮蒸物就最能突出海鮮原味，至於香煎鴨肝入口即溶又唔會太油膩，鍾意海鮮嘅朋友可以bookmark！
海鮮聖誕自助餐
供應日期：由2021年12月24日-2022年1月1日
花月庭 愛麗絲味遊聖誕自助晚餐
一家大細去食咁有童心嘅愛麗絲夢遊仙境自助餐就啱晒，餐廳以愛麗絲夢遊仙境主角造型製作出各款聖誕美食！甜品絕對係亮點，包括「愛麗絲夢遊仙境」檸檬藍莓朱古力樹頭蛋糕、「紅心王后」雜莓意大利芝士蛋糕、紙牌僕人海鹽焦糖榛子蛋糕、「柴郡貓」紫薯草莓撻同「瘋帽子陀錶」熱情果牛奶朱古力慕絲蛋糕，全部都好靚！一眾愛麗絲fans唔可以錯過。另外，唔少得無限供應美國生蠔啦，特別推出以酸、甜、辣、甘為主題嘅四味壽司都有驚喜～
愛麗絲味遊聖誕自助晚餐
供應日期：2021年12月24日至26日及31日
馬哥孛羅咖啡廳 豐富海鮮自助餐
又係一間令海鮮控心心眼嘅自助餐！海鮮款式無論凍食同熱食都有幾多款，包括即開時令生蠔、龍蝦、小龍蝦、凍蝦、青口、翡翠螺，熱食就有香蒜粉絲蒸扇貝及清蒸海斑等。最正係有埋即席烹調美食專檯，大廚特別推介火炙和牛壽司及燒牛肉，食肉獸至愛。
豐富海鮮自助餐
供應日期：由2021年12月24-26日、31日-2022年1月1日
汀蘭居 聖誕節慶全海景海鮮自助餐
享受大餐同時想睇埋靚景嘅，汀九橋旁呢間海景餐廳就啱晒，可以飽覽180度無敵海景同青馬大橋宏偉嘅景觀～食物方面除咗即開生蠔、龍蝦鉗、大蝦、藍青口等海鮮同埋法式芝士龍蝦、香煎鵝肝、燒安格斯西冷等熱食，現場更特設惹味燒烤專區，供應烤紐西蘭羊架、德國雜錦香腸同沙嗲雞串等。甜點專櫃仲有大受歡迎嘅朱古力噴泉，即製窩夫配雪糕，以及超過十款Movenpick雪糕！
聖誕節慶全海景海鮮自助
供應日期：逢星期五至日及公眾假期
City Cafe 海鮮薈萃‧聖誕自助晚餐
呢間自助餐特別在於有多款節日限定美食，加強版冷盤海鮮有空運生蠔，其餘菜式包括上湯焗波士頓龍蝦伊麵、寶雲酥燒羊仔鞍、三色焗生蠔、低溫燒火雞、西班牙焗海鮮飯等，更現場即製阿拉斯加火焰雪山，為大家帶嚟難忘嘅聖誕回憶。
海鮮薈萃‧聖誕自助晚餐
供應日期：2021年12月6日至31日
尚廚 節日「生蠔、松葉蟹腳、鴨肝」自助晚餐
除咗平日回本之選海鮮拼盤同刺身，呢間餐廳12月24及25日更增添松葉蟹腳、波士頓龍蝦、帶子刺身、阿根廷天使粉紅蝦，夠晒豪氣！更多海鮮菜式包括阿拉斯加蟹肉芒果脆千層、炙燒帶子、黑松露醬酥炸生蠔、黑松露牛油焗扇貝、即燒鮮鮑魚、即煎鴨肝，每位奉送一客沙參玉竹螺頭燉雞湯；當鐘聲響起時，更會為客人奉上色香味俱全嘅金湯蟹肉燴花膠！
尚廚 節日「生蠔、松葉蟹腳、鴨肝」自助晚餐
供應日期：由2021年12月13日-2022年1月2日
更多聖誕節慶餐飲、活動及折扣詳情：(按此)
文: Yanica
