仲有個零月就到萬眾期待嘅聖誕節啦！2021年嘅最後一個月當然要食好啲叉叉電。多間餐廳已經陸續推出聖誕下午茶啦，有朱古力、Baileys甜酒同魚子醬主題等，等大家喺儲返啲脂肪過冬天～佳節要約閨蜜同另一半一齊過喔。
想一家大細過一個難忘嘅聖誕節？今年呢間酒店再次同德國著名玩偶品牌 Steiff合作，推出Steiff小熊節慶下午茶。下午茶以品牌小熊嘅經典提腳造型茶架示人，啱晒相機食先，而且款款甜鹹點都好吸晴，包括焦糖朱古力配香草栗子樹形蛋糕，焦糖香味好突出，配埋幼滑嘅栗子蓉食更豐富。經典組合烤蘋果醬配肉桂丁香撻，加上充滿牛油香嘅撻皮，好有驚喜。鹹點方面有龍蝦香草配肉桂忌廉撻，龍蝦肉鮮甜彈牙，忌廉汁味道啱啱好唔會蓋過龍蝦鮮味。
價錢: 港幣$468/位，港幣$798/兩位 (2021 年 12 月 24 日至 26 日除外)
Green GODIVA 甜蜜獻禮下午茶 
各位朱古力lovers準備好未？呢度簡直係朱古力愛好者嘅天堂呀，呢間酒店餐廳再度同比利時朱古力品牌GODIVA合作，除了推出全新GODIVA主題下午茶外，行政總廚仲設計咗多款以GODIVA朱古力做主題嘅甜品！首先今次下午茶以黑膠唱盤造型呈現，像真度高，啱晒打卡～各款甜品都玩味十足，好似檸檬馬鞭草覆盆子馬卡龍手袋，以幼滑香甜嘅GODIVA朱古力、法國檸檬馬鞭草以及覆盆子夾心製成，味道酸酸甜甜幾清新。另外可以兩小時任食GODIVA士多啤梨朱古力同朱古力軟雪糕，臨走仲會每人有一份GODIVA朱古力，真係滿載而歸。
日期: 2021年11月15日起 （需提前一天訂座）
價錢: 星期一至五港幣$408/位；兩位港幣$748/兩位，星期六、日及公眾假期港幣$438/位；港幣$788/兩位
櫻田日本餐廳 北海道鱈場蟹午後喫茶 
唔係太好甜品嘅朋友，推介呢個冬日限定嘅北海道鱈場蟹午後喫茶，以北海道帝王級鱈場蟹做主題，啱晒各位海鮮控～重點推介鱈場蟹三杯醋，以米醋、醬油同味醂調製而成，鱈場蟹配上酸甜醬汁，愈食愈開胃。三文魚籽蟹膏豆腐都好出色，嫩滑豆腐配上濃郁蟹膏，食完蟹膏嘅鮮味會長期留喺口腔～冰鎮鱈場蟹腳當然不得不試，鱈場蟹生長於低溫環境，適合凍食，冰鎮製法更能突顯原汁原味。蟹肉爽甜飽滿，肉汁鮮美。
日期: 2021年11月20日至2022年1月30日 (2021年12月25日及2022年1月1日除外)
供應時間: 星期六、日及公眾假期 15:00 - 16:00
價錢: HK$588/兩位
大堂酒廊 Baileys X Republica del Cacao下午茶
今次呢間餐廳同Baileys、Republica del Cacao兩大知名品牌合作推出全新下午茶，法籍行政糕餅總廚以厄瓜多爾產嘅優質可持續朱古力同比利時朱古力愛爾蘭忌廉甜酒Chocolat Luxe入饌，炮製出一系列甜點同鹹點！花生醬牛奶朱古力熱情果蛋糕好有特色，底層為香脆曲奇餅底，中層為熱情果啫喱同花生醬，頂層係40%牛奶朱古力同花生醬慕絲，然後以56%黑朱古力包住成半球蛋糕，最後以帶焦化牛油味道嘅Dulcey朱古力塑造成花生粒嘅形狀，每一啖都感受到誠意。百利甜酒海鹽焦糖粟米餅都一樣咁有驚喜，以31%白朱古力混合日本粟米打成幼滑慕斯，內藏百利甜酒同海鹽焦糖夾心，化身原條粟米低溫冷藏12小時，粟米味都幾濃郁。
日期: 即日起至2022年1月31日，每日下午3時至6時供應
價錢: 港幣$488兩位
REIGN Caviar 魚子醬主題下午茶
想食得豪華啲，呢間新開嘅魚子醬專門店有個魚子醬下午茶，包括10克歐洲魚子醬(或+$200升級至俄羅斯Premium Osetra魚子醬)，配以乾脆多士(Melba Toast)、法蔥、紅蔥、酸忌廉、蛋白、蛋黃，令客人以唔同配搭品嚐魚子醬，感受當中嘅變化。除此之外，下午茶包埋鴨肝意粉、法式四甜點、雪燕奶凍或松露提拉米蘇、咖啡或茶(或+$100轉配松露奶蓋南非國寶茶/咖啡)，呢類下午茶坊間真係少見啲，間中豪一次囉，值得一試呀。
價錢: $688/兩位
香港嘉里酒店大堂茶座 黑鑽魚子醬下午茶
呢間酒店餐廳同樣推出以魚子醬做主題嘅下午茶呀～大廚團隊巧妙地將Plantin Kaviari嘅精選黑松露同魚子醬完美融合喺法式創意鹹點之中，包括Kaviari皇家煙燻三文魚及晶鑽魚子醬配酸瓜柳、香蔥及法式忌廉，鹹香煙燻三文魚配上魚子醬，別有一番風味。另設有各款法國傳統肝醬點心，如黑松露蘑茹醬配黑蒜蛋黃醬及全麥麵包、煙燻Rougié鵝肝醬配野藍莓醬同法式麵包、鯖魚及鱈魚肉醬配魚子醬及竹炭麵包等，食完大滿足。
日期：2021年11月1日起至12月31日
供應時間：星期一至五下午2時半至5時半 ，星期六、日及公眾假期下午1時半至6時
價錢: 星期一至五︰HK$668/兩位，星期六、日及公眾假期HK$688/兩位
更多聖誕節慶餐飲、活動及折扣詳情：(按此)
文: Yanica