農曆新年就到喇，大家準備好辦年貨未？今期為大家推介8大辦年貨攻略，由開飯仔帶大家實測多區賀年食品人氣店，包括近百年中式餅店老字號、兩代老闆經營嘅角仔餅店、多年有米芝蓮街頭小食推介嘅街坊餅家、手工鳥結堂專門店等等，快啲Bookmark定去辦年貨啦～
46年家庭式經營、日賣400磅手工角仔 均香餅家
位於深水埗嘅均香餅家，每逢新年都特別忙碌，上年更以新品開心果角仔再度爆紅，創下高峰日賣400磅角仔嘅成績。現時舖頭由二代負責人爆江同佢爸爸媽媽合力經營，多年嚟堅持手工製作中式唐餅，其中最受歡迎嘅角仔有4款口味：開心果、榛子朱古力、花生同埋紫菜肉鬆。
均香餅家第二代爆江，每到新年都會同家人、伙計一齊包角仔
爆江話一粒好嘅角仔，最重要係將酥皮同餡料完美融合，而且比例啱啱好：「包餡係最難，要埋口、炸完脹卜卜，而且唔可以漏餡，餡多又要唔穿皮。」角仔外皮有別坊間單用水皮製作，餅店係用水皮同油皮摺疊成12層酥皮，再人手包餡、塑型、油炸，先做到一粒粒飽滿爆餡角仔，食落香口唔油膩。
造型好似脹卜卜嘅荷包，新年寓意財運亨通
開心果角仔內餡選用意大利開心果仁、開心果醬、自家製炸芝麻同埋糖製成，入口甜而不膩，最重要係好香果仁味。今年雖然無新口味，但爆江重新調整榛子朱古力角仔嘅食譜，改成用榛子果仁混合朱古力醬製作餡料，香脆口感更明顯。
開心果角仔（左），榛子朱古力角仔（右）
米芝蓮街頭小食推介 奇趣餅家
奇趣餅家1984年開業，長年屹立喺旺角花園街之中，每每經過旺角，都留意到呢間餅店有絡繹不絕嘅街坊購入一袋二袋嘅中式唐餅。店舖係少香港碩果僅存保留傳統「前舖後廠」嘅格局，出爐嗰陣仲會用大竹筲箕放置熱辣辣唐餅，景象喺香港真係買少見少。
平日都聚滿街坊大批入貨
餅店多年嚟都忠於傳統味道，笑口棗、蛋散、牛耳仔、油角等賀年油器款式應有盡有。開飯仔推介金黃酥脆笑口棗，金黃色澤就基本要求，但炸到開口靚、入口酥脆唔乾身就好巧功夫，而呢度絕對滿足到你。
笑口棗（$60/半磅；$120/一磅)，價錢唔算特別平，但勝在夠香口又鬆化
店舖一律只賣手工製傳統舊式唐餅
近百年老字號 新春限定芋蝦 陳意齋
提到辦年貨，又點少得呢間將近百年嘅老字號！街知巷聞嘅中式零食店開業97年，至今傳承至第三代，仍然堅持全人手本地製造糕餅、糖果、肉乾、涼果等。除咗杏仁餅同燕窩糕出名外，佢哋新年限定嘅芋蝦都好搶手㗎。
唐餅均有獨立包裝，現場有唔少本地人同遊客大量購買
芋蝦雖然名字有「蝦」，但其實成分完全無蝦㗎～呢款手工小食要先將芋頭切絲，再卷成圓碌碌繡球狀油炸而成，有「食完笑哈哈」嘅寓意。可惜因為芋蝦係手工菜，功序繁複，所以買少見少，有機會真係要試吓喇。
農曆新年限定芋蝦（$153/小；$288/大）
隱世鳥結糖專門店 多多餅店
新年當然唔少得糖果，將全盒填到盆滿缽滿。位於美孚新邨嘅呢間港式餅店，看似平平無奇，但裡面隱藏住多達10款口味嘅手工鳥結糖！鳥結糖均由餅店師傅手工製作，當中更有好多獨創新穎口味：朱古力脆心、黑芝麻脆心、藍莓榛子、抹茶南瓜籽朱古力脆心等等，層次感好豐富，脆心夾雜鳥糖牽絲質地，的確有驚喜。
選擇困難症推介揀多寶口味（$48/包)，試勻10款唔同口味
開飯仔當日咁啱遇到新鮮炸起嘅豆沙角，賣相似鹹水角，不過內餡取而代之係甜滋滋嘅紅豆餡。亮眼地方在於外皮香脆又軟糯，處理得唔錯，可以單件入手試吓味。
新年限定油器——即炸豆沙角（$11/個）
其他賀年食品店舖推介：
傳統中式唐餅 生隆餅家
一直堅持以手工製作傳統中式唐餅，每到新年都推出多款地道油器。人氣必食就係佢哋嘅芋蝦同豆沙角，芋蝦內裡用上大量芋頭，加埋蝦米調味，鹹香惹味，啱晒鍾意鹹口味嘅朋友。而豆沙角則選用綿滑嘅紅豆沙餡，外皮炸得香脆，咬落去滿口豆香，甜而不膩。仲有傳統嘅笑口棗、煎堆，每款都係手工製作，炸得乾身唔油膩，唔少街坊都話買一次食完一定要Encore！
圖：港島老字號 卓越食品餅店
港島區嘅朋友可以去呢間超過四十年歷史嘅老字號，由煎堆、芋蝦到蛋散、角仔，每款都係滿載回憶嘅懷舊滋味。餅店出品嘅油器，全數用傳統方法製作，每一樣都講求香脆鬆化，蛋散炸得薄身酥脆；芋蝦用上大量新鮮芋頭，炸至外脆內鬆，滿口芋香。每到年廿八，門外就會排起長龍，想食要趁早！
圖：純素笑口棗 東方小祇園
被譽為「香港第一齋」嘅傳統素食餐廳，梗係每年農曆新年掃年貨嘅熱點之一！其中最受歡迎嘅就係笑口棗，炸得金黃酥脆，表面微微裂開，形狀就好似一張開懷大笑嘅嘴巴，象徵新一年開心順利、笑口常開。而且呢度嘅笑口棗完全用純素材料製作，冇加入任何動物成分，連平時唔食齋嘅街坊都話正，初一齋戒更係必備款式！
圖：為食火麒麟
必試手工芋蝦 八珍醬園
講到賀年油器，真係唔可以唔提八珍醬園嘅手工芋蝦！雖然大家對八珍嘅印象多數係調味醬料，但其實佢哋嘅賀年食品同樣經典，特別係芋蝦呢款傳統小食，堅持人手製作，由資深嘅師傅親自操刀。芋蝦嘅每一粒都係慢慢炸，每年都限量一千斤，想食要早啲去買～而除咗芋蝦，仲有煎堆、油角同笑口棗等。
文：Yanica、Sharon
片、相：Tom、Sharon
