大熱天時，出街都盡量留喺室內，約朋友去唔同餐廳食好嘢、影靚相就最舒服喇。今次同大家share兩間環境靚，食物都有唔少好評嘅餐廳，佢哋嘅晚市同下午茶二人套餐用OpenRice訂座預付都有優惠㗎。
玩味泰西Fusion菜館
融入叢林同復古元素，有老虎、舊式鐵閘、木屋feel廂坐等設計，有種東南亞小店嘅玩味氛圍，每個角落都別具特色，就連菜名都好盞鬼㗎。
4道菜晚餐包括2款前菜同2款主菜，分量十足，而且融入多款食材，色彩繽紛好啱打卡。飲品則提供美式咖啡、蜂蜜紅茶同青檸梳打畀你揀，口味幾大眾化。
開胃前菜先試是日精選廚師湯同泰式黃金粟米酸辣沙律；沙律配上特調泰式醬汁，酸酸辣辣幾開胃，清甜嘅粟米切成一片片好有咬口𠻹。
主菜方面，「人人都嗌的啖啖蟹肉飯」係餐廳嘅人氣菜品，蟹肉同蟹籽鋪滿飯面，分量好有誠意；而飯底吸滿以花生醬為基底嘅醬汁，鹹香微辣幾惹味。
烤泰式香辣無骨春雞（半隻）用泰式香料醃製夠入味，外皮烤得香脆唔肥膩，肉質鮮嫩，火候控製啱啱好。佐以蝦片、沙律等配菜，口感層次更豐富。
有時想食個late tea傾吓偈，但怕分量太多？呢款下午茶就啱你喇，7款鹹甜點比一般分量細少少，但精緻度不減啊～甜點由清新到濃味都有，如草莓松糕、竹炭巴斯克；鹹點則有鹹蛋黃軟心曲奇三文治、鴨肝多士配無花果醬等香口款式。
No Money So Lonely 
地址: 旺角彌敦道700號T.O.P This is Our Place 4樓406-408號舖
度假風異國情調
花系裝潢幾時都咁浪漫，餐廳再融合木系度假風，環境更加寫意，配合高樓底、暖色系燈光，感覺好relax，同BFF聚餐或約會都啱呀～
5道菜晚餐包括頭盤、是日精選餐湯配香草麵包、配菜、意粉/意大利飯同主菜，以及無酒精飲品兩杯，部分可以自選菜式，組合你嘅心水口味。
頭盤可以揀雜錦海鮮沙律，或升級轉配安格斯牛肉他他佐海膽醬配墨西哥薄餅，味道鹹鮮好開胃。
鍾意清香口味嘅朋友不妨試白酒醉阿根廷天使赤蝦，肉質爽口帶酒香；另外亦有較濃味嘅西班牙蒜片辣椒炒辣肉腸大蝦配多士可以揀。
澱粉控唔少得嘅意粉同意大利飯有4款選擇，其中香濃蟹膏雙色意大利麵配手拆松葉蟹肉刺身帶子用料豐富，帶子輕煎後依然鮮嫩又大隻，同松葉蟹肉好夾。而16小時慢煮醬烤法國鴨腿配牛油燴意大利飯，鴨腿皮香肉腍，仲好入味𠻹。
主菜則齊集豬、牛、羊、雞、魚5款選擇，而且有西式、秘魯同泰式口味𠻹。好似香煎秘魯風味鮮鱸魚柳配濃蝦鮮番茄汁，鱸魚大大件，汁底好開胃；香煎12小時慢煮澳洲羊架就配阿根廷青醬解油膩感；牛魔王就必試香煎紐西蘭特級肉眼扒，淋上黑松露燒汁帶獨特香氣。
想chill吓就梗係嘆下午茶啦～呢款峇里風精緻鳥籠拼盤下午茶*，包括9款鹹甜點，如泰式斑蘭巴斯克微焦芝士蛋糕、夢幻法式鮮果馬卡龍、吉列黃金牛油果、經典懷舊蝦多士，但最令人「意猶未盡」嘅係梳乎厘班戟呀！原味鮮果同法式焦糖吉士達口味可以隨心挑選㗎。
*選用時令食材，不定期更新款式。
Be Leaf
地址: 觀塘敬業街55號皇廷廣場地下2號舖
主持：Nicole
文：Cathy
相：Michael
片：YanYan
