可能你聼朋友講過，如果想減肥，就要食少啲飯，究竟有冇科學原理嘅呢？今日就同大家探討一下，究竟減肥係咪要食少啲飯就減到，以及當中嘅科學理論。

其實，白飯嘅主要成分為碳水化合物，當被身體消化後，會轉換成最少嘅分子——葡萄糖，畀細胞當能量用。但係，如果你一次過食太多飯或者富含碳水化合物嘅食物，細胞就未必會一次過用得曬啲糖，多餘嘅糖，就會進入肝臟，喺肝臟轉化為肝醣(glycogen)，作儲存備用。再有多餘嘅糖，就會儲存為脂肪，呢個就係點解話食得多飯會肥嘅原因。

不過呢度又牽涉另一個concept，係關於血糖嘅波動情況，如果你食嘅係白飯而唔係粗糧，會好易升高血糖，因爲白米飯係屬於精製嘅碳水化合物，升糖指數高，當血糖高時會刺激胰島素分泌，而胰島素水平高時，就會促進脂肪儲存。所以，如果一個人長期攝取太多精製嘅碳水化合物例如白飯、白麵條同面包嘅時候，就好容易肥。

值得一提嘅係，精製碳水化合物會容易令人食上癮，特別係麵粉類製品同含糖食品，例如面包、餅乾、pizza、雪糕、蛋糕、糖水等等。有研究發現，呢啲食物同毒品一樣，都係刺激大腦嘅相同區域，令人越食越想食。如果某日你唔食麵粉類製品或含糖食品，就特別想食，咁你可能已經糖上癮(sugar addiction)。當糖上瘾，精製米麵糖容易食多，而你仲食好多肥膩野嘅話，糖都未消耗曬，再食大量脂肪，想唔肥都難。

咁應該點食好呢？首先，少食精製米麵糖，多食粗糧之類，低升糖指數嘅碳水化合物，例如糙米、黑米、裸麥粒麵包等等。進餐時多食蔬菜，並配合適當嘅肉類同好油一齊進食。如果用一個碟去顯示分量嘅話，蔬菜佔半碟，肉佔1/4碟，粗糧佔1/4碟，咁血糖波幅就較平穩，胰島素水平都唔會大起大落，激素平衡，身體都無咁易肥。

Like營養師Sharon Chan的fb專頁(點擊)

※上述內容純屬作者個人意見，不代表本網立場。※