臨近年尾，特別多美食展！由今日起至11月20日，喺太子花墟公園有第2屆香港國際美食巡禮。會場尤如小型工展會咁，各款家電廚具、乾貨海味都有賣，當然唔少得我哋非常留意嘅熟食小檔啦！今次美食巡禮除咗有得食有得買之外，可以喺場內試穿日本浴衣添，仲要係免費，即刻睇詳情！
交代咗基本資料先！今年活動以「中西薈萃、質優味美」為主題，喺場內分成11個展區，一共有約200個攤位，當中最要留意嘅係今年新增設嘅「日本區」、「韓國區」及「美食車區」，其餘展區為「百年及知名品牌區」、「國際食品區」、「參茸海味區」、「休閒食品區」、「家居及生活用品區」、「鮮活及社企區」、「美食區」及「創意市集」。
大會仲搵嚟本地著名設計師麥雅端擔任展會設計師，將Chocolate Rain帶入會場各個角落，由門口、表演台、橫額、場內展板都有Chocolate Rain蹤影，粉絲們可隨意搵到影相位。
有乜食？
金鳳大餐廳 攤位：F02
場內最矚目嘅小食檔，可算係首次喺美食巡禮擺檔嘅金鳳大餐廳。喺香港開舖都有接近半個世紀嘅金鳳，梗係會售賣招牌金鳳一口牛，即叫即煎，連埋分量多多嘅蒜蓉，好惹味！
一份大約有4-5件左右，size比較大粒啲，厚身啲！口感同喺金鳳食到嘅一樣，好軟腍，亦好有蒜味。
另外舖頭仲做緊$1鳳尾蝦優惠。只要like咗金鳳大餐廳、好媽媽美食館Facebook專頁，就可以$1食到即炸鳳尾蝦一隻，炸到外層好脆口，入口依然鮮甜架！（正價$30/5隻）
美味海味 攤位：C09、C10
美食展常見嘅美味海味，繼早前曾推出嘅$20花膠片之後，今次佢哋推出──$15皇冠牌罐頭鮑一隻。鍾意嘅話，$40/罐就可以買到番屋企喇！
浸住濃郁鮑魚汁嘅罐頭鮑魚，比想像中大隻，而且好入味，係鮑魚平價之選。
紹香園 攤位：A27
紹香園除咗售賣小食，亦有即時焗製嘅小食，好似佢哋嘅新作「老貓燒酥」，香脆嘅酥餅入面有流心半融嘅麥芽糖，素食者都食得，價錢為$30/4個。
打開酥餅，入面的確有半融麥芽糖，食落不算好甜。每日下午3點鐘，仲推出限時優惠，$1個咋，優惠只限售30個即止，記得mark實！
仲有佢哋最新嘅黑松露雞仔餅系列，價錢$25/5件。
慶發記海味 攤位：L07-L08
來自長洲嘅慶發記售賣招牌芒果糯米糍，除咗芒果味，仲有花生、綠茶、紅豆等等，價錢為$12/個。
華記永昌有限公司 攤位：A39
台灣小食方面，有即烤黑橋牌香腸，香脆煙韌，價錢為$12/條、$20/2條。除咗原味，仲有飛魚、墨魚味。
想食飽肚嘢，呢度有香煎蔥油餅，價錢為$12/片、$20/2片。
紫薯味手抓餅，$30/份，包一款餸。餸可選擇火腿、煙肉、肉鬆或雞蛋。
振超有限公司 攤位：K10
行到攰，可以食番支樂天益力多唧唧冰，另有士多啤梨味，價錢為$15/支。
價錢最抵食嘅有Binggrae梳打沙冰，$5支咋！
Department of Foreign Trade 攤位：B03-B04
喺國際食品區入面，有一間主打芒果糯米飯嘅攤檔。糯米飯除咗原味，仲有斑蘭味、薰衣草味等等，顏色好eye-catching，價錢為$40/份。
Natural Mill 攤位：B05、B07
泰國常見嘅菠蘿仔，好的骰，夠解渴，$20/個。
椰皇啫喱，用埋椰皇水製作啫喱，好有「椰」味呀！價錢為$30/個、$110/4個。
會場內有固定美食車──王子食品，售賣各款調味料。另外每日會有兩架美食車駛入會場，為食客提供小食，參考番以下時間表先：
11月16日：有得餃、The Butchers Club
11月17日：菠蘿仔、The Butchers Club
11月18日：菠蘿仔、大師兄
11月19日：菠蘿仔、大師兄
11月20日：菠蘿仔、有得餃
同餐廳風格一樣，The Butchers Club美食車充滿美式風格，主打迷你漢堡及牛肋條，價錢由$35起。
咦，粵廚點心專門店嘅美食車都嚟咗會場，售賣魚蛋粉、叉燒包、腸粉等等港式小食。
有乜買？
威馬企業有限公司 攤位：A01
威馬電器同Hello Kitty聯乘推出3款Hello Kitty小家電：（左起）LED柔光香薰加濕機、旅行電水壺以及趣趣鬆餅機，size睇落細細件，不太佔空間，粉絲們可入手呀！
億慧貿易公司 攤位：L05
呢度搵到My Melody及Little Twin Stars嘅焦糖爆谷罐，好靚，用嚟做聖誕禮物都OK呀，女生收到應該會幾開心，原價係$108/罐，而家會場優惠價係$88/罐。
天匯食品貿易有限公司 攤位：L03
泰國必買嘅MAMA杯麵，原本要$8/個，呢個攤檔做緊$20/5個咋，不過要注意，只有豬頸肉、青咖喱兩款口味。
有乜玩？
今年新增設嘅日本區、韓國區，除咗有日韓好hit嘅零食、麵類等可買到，仲有港人遊日最鍾意做嘅───試穿日本浴衣，重點係免！費！不過要留意一下每日浴衣試穿嘅時間表呀！
另外，會場亦設多個文化表演，好似廚藝表演、柔道、劍道、合氣道、劍玉、椿年糕、Cosplay、日本舞踊及樂團表演等。今日下午有日本神輿巡遊，錯過咗都唔緊要，11月18及19日一樣有得睇！
11月18日
13:00 Janet Park 韓廚示範
14:15 日本神輿巡遊
15:30 日本樂團表演
16:30 日本Cosplay表演
17:00 日本劍道示範
11月19日
11:30 Janet Park 韓廚示範
14:45 日本柔道、椿年糕表演15:30 日本合氣道示範
16:00 日本舞踊表演
16:30 日本劍玉表演
第2屆香港國際美食巡禮
活動日期及時間：2017年11月16-20日10am-8pm
地址：九龍界限街花墟公園
入場費：免費
交通：大會設免費穿梭巴士往返會場及港鐵石峽尾站B1出口，每20分鐘一班；港鐵旺角東站、太子站亦可步行前往
文、相、片：Joy