有時想令成餐飯再提昇一個層次，唔使下下都要煲埋湯、整埋甜品嘅！只要你識用普通嘅電飯煲，撳掣前加多少少料上去（當然唔係講緊味素lol），百搭嘅白飯都可以即刻變成華麗嘅日式炊飯！重點係成個過程都好簡單，就算手殘人仕如「日日爆」嘅報料者們想炸廚房都難！
三文魚親子飯（2-3人份）
圖：cookpad
呢度講緊嘅當然唔係魚生飯啦😂三文魚易煮又高營養，買4條返嚟真係話咁快就食晒！
簡易步驟：
1. 煎起2-3件三文魚
2. 少量（大概兩湯匙）日式醬油（平時食壽司外賣剩返嗰啲都可以用）、味醂同麻油（大概各一湯匙）醃煎好嘅三文魚大約30分鐘
3. 洗米，落比平時煲飯少啲啲水（例如我屋企食珍珠米就大概2.5嘜米配3嘜水，即係今次要落2嘜水又3分1水左右就夠）
4. 將醃好嘅三文魚汁（如前述大概3分1嘜）倒埋落啲生米度開掣煲
5. 將整碎（匙羹壓又好，手指搣都得）嘅三文魚撈落熟飯度，上面再加啲三文魚籽，食得！
三文魚牛油粟米飯 （2-3人份）
圖：Gracy
同上面個食譜差唔多，但呢款感覺會比較西式啲，煲完出嚟會有啲似PEPPER LUNCH😂
簡易步驟：
1. 用鹽醃2-3件三文魚大概15-20分鐘
2. 洗米量水（同上面差唔多方式計，但今次清水比例再多啲啲），加味醂、味噌各約3湯匙、清酒1湯匙同日式醬油2茶匙
3. 粟米粒（罐頭粟米粒記得倒晒水先）同醃好嘅三文魚放面，開掣煲飯
4. 煮好之後加嚿牛油仔上去，鍾意嘅再灑啲黑椒就食得❤️
雞肉蕃薯飯 （2-3人份）
圖：Chanto
雖然番薯同飯都係澱粉質，但番薯作為原型食物本身仲帶有更多其他營養，撈埋一齊食又可以食少啲飯（始終係精緻澱粉）兼夾減輕淨食番薯所引致嘅胃氣漲添！
簡易步驟：
1. 切好雞髀肉 / 雞胸肉（約150g就夠晒）同番薯為一口大小先，之後用日式醬油、清酒（約1湯匙左右）同少少糖醃大概30分鐘
2. 洗米量水（照舊扣走少少平時4分1左右水量，加返鰹魚湯/昆布湯汁（有得直接買一樽樽，前者亦都可買粉狀嘅，加少少落啲滾水開就用得）
3. 加埋番薯同醃好雞肉一齊煲，Done！屋企有黑芝麻嘅，加埋落去食更正！
蠔飯（2-3人份）
圖：因為需要花時間處理蠔，處理呢個飯會稍為有難度少少，新手可能就熟習咗上面幾款先再挑戰會好啲啲~
1. 急凍蠔肉（斷估大家唔會拎生蠔整咁豪氣）預大概每人4-5隻左右（視乎蠔身大小，記得要預佢煮熟會縮，買太細Size唔太適合），解凍後要用清水洗幾次，最好過水過到接近透明
2. 加薑、蒜、廚酒（紹興或清酒都得）、日式醬油、味醂煎一煎啲蠔，唔使煎到全熟，真係大概30秒就夠
3. 洗米量水（照舊扣走少少平時4分1左右水量），加洗好切好嘅菇類、倒頭先煮蠔嘅汁（如果啲色水太混濁就唔要咁多，要少少再加日式醬油、味醂同清酒就得）然後開掣煲飯
4. 飯煮熟後加返之前煮好嘅蠔再保溫約10分鐘，有興致嘅可以呢個時間切啲蔥粒上去，又食得！
有期買咗盒蟹籽，撈落任何上以炊飯或者意粉都好正❤️呢刻諗返起都想食🤤
文：Apple
編：Kar