香港以海鮮做主題嘅餐廳唔少，不過蝦嘅專門店就唔多。最近九龍城就開咗間新餐廳，招牌寫住米線泡飯專門店，同時又有大大隻龍蝦喺度，原來主打蝦湯底嘅麵食同泡飯，蝦湯用足8斤鮮蝦，再加其他配料每日熬煮。想食豪啲配料仲可以揀波士頓開邊龍蝦呀！
 

蝦匠顧名思義以蝦做主題，招牌係佢地嘅足料蝦湯。先用豬骨、雞、青紅蘿蔔煲清湯，再加8斤鮮蝦蝦殼蝦頭，加蝦籽、蝦乾、蝦米熬足3-4個鐘頭，將鮮紅香濃嘅蝦油煲出嚟，唔需要任何味精都夠哂惹味！
 

蝦匠湯配龍蝦半隻（配摻摻）（原價$88，開業特價$68）

蝦匠湯即係原味蝦湯，本身配料就有蝦、札肉或腩肉、豆卜、芽菜，想鮮味升級就可以再加半隻波士頓開邊龍蝦。蝦湯聞落的確帶非常香嘅蝦味，飲落一開始可能會覺得有少少淡，之後辣味就會湧上嚟，就算係夏天都會令人忍唔住一啖接一啖咁飲。
 

麵底可以揀油麵、米線、米粉或者摻摻，即係油麵加米粉，一碗試勻兩種口感。加埋彈牙嘅龍蝦肉、札肉，同吸哂湯汁嘅豆卜等，相當豐富。
 

冬陰功蝦湯（配米線）（$48）

想再刺激啲嘅話，就可以揀冬陰功蝦湯麵！香茅等香料味道相當濃郁，略嫌有少少蓋過蝦湯本身嘅香味，不過飲落就夠哂酸辣開胃。配料有蝦、青口、魚片、秀珍菇同蕃茄。
 

花膠雞湯泡飯（晚市$98半隻，午市$78例牌）

招牌寫得米線泡飯專門店。當然亦有泡飯食啦。除咗蝦匠湯之外，仲特別推介呢款花膠雞湯泡飯！湯底用上等金華火腿、瘦肉、老雞同花膠熬煮6個鐘頭。之後加三黃雞同花膠，以鑊仔上枱，下面會點火保溫。建議大家可以先飲一啖鮮甜帶少少膠質嘅湯，之後再加飯食泡飯。
 

 

蝦蝦霸霸（$68）

小食同樣充滿蝦香！蝦餅食得多，好似手掌心咁大嘅就比較少見。餐廳每日用新鮮蝦自家手打，再炸至金黃色、外脆內彈嘅蝦餅，點少少酸辣醬食更香口。
 

蝦匠皮蛋（$20）

即係麻辣蝦香皮蛋，皆因餐廳特別喺紅油當中加咗少少蝦乾碎，聞起來帶蝦香而食落先麻後辣，最後仲有少少蝦嘅鹹味。配以皮蛋軟滑又彈牙嘅口感，層次豐富。
 

冰鎮青瓜（$22）

食咗咁多香辣惹味嘅菜式，可以食返呢碟冰鎮青瓜清清味蕾。青瓜條用冰鎮形式上枱，視覺效果突出。中間兩條玻璃管分別裝住芥末豉油同麻醬，前者帶辣後者香濃，按自己口味想點幾多就幾多。
 

（左）檸檬天葵花，（右）百香天葵（各$38）

蝦匠
九龍城福佬村道20-22號學林軒地下A舖

文、相、片：Cathy