東南亞菜多數都酸酸辣辣，香料味重，九龍站呢間新開嘅東南亞菜餐廳都唔例外，印尼、越南、泰國、柬埔寨等國嘅菜式都有，一次過味覺大旅行！

呢間東南亞菜餐廳，由國際名廚Will Meyrick掌舵、印尼籍大廚Gede Budiana主理，淨係門面裝修都已經充滿異國風情。鹹蛋黃脆炸軟殼蟹沙律比平時嘅沙律多咗隻鹹鴨蛋黃，原來係東南亞人嘅家常食。柬埔寨蒸咖喱三文魚係柬埔寨嘅一款傳統美食，混合羅勒、香茅、紅咖喱、檳榔葉與椰子忌廉等製作，魚肉鮮嫩，仲有濃濃嘅椰奶香。

唔好睇少呢道巴東椰奶燉牛肋骨，用上和牛牛肋骨製作呢！以印尼巴東醬醃製後，加入辣椒、椰漿等香料，快炒完再以慢火燉煮，肉質軟腍，而且仲索晒啲香料味添。

鍾意食魚嘅朋友，可以一試泰式青胡椒炒鯛魚或者芭蕉葉叢林咖喱魚，前者外酥內滑，陣陣辣香；後者以以薑黃、羅勒、辣椒等醃製，香料味突出，魚肉仲好嫩滑啊。

甜品點少得芒果黑糯米飯？仲配埋芒果雪糕添。味道香甜、軟糯，最有驚喜係糯米飯中仲有粒粒椰肉食到啊！

越南焦糖布丁配咖啡冰沙呢個配搭都幾新鮮，布甸蛋香十足，浸住超香濃嘅咖啡味沙冰。

而甜魔一定會鍾意嘅花生朱古力奶油芭菲，無論視覺定味覺上都有啲似snack bar，脆脆地中間又軟心，係甜架喇但都係間中一次啫~

多款cocktails同樣充滿東南亞特色，Monsoon睇名就知係signature cocktail啦，味道都特別複雜，混合vodka、熱情果、新鮮檸檬、辣椒等調製而成，最後仲要倒多層啤酒喺扮到好似嗰層foam咁~ 飲落先酸，爽一爽後就有微甜，最尾再有啲辣回滲返出嚟，精彩。

而家去光顧午巿套餐嘅話，仲可以無限量添飲泰式奶茶啊！

Monsoon
地址：尖沙咀柯士甸道西1號ELEMENTS圓方1樓1044-45號舖

文：Kar
相、片：Tom Li