呢間本土扒房專注做平鐵牛扒，牛肉控就算未食過都應該聽過。佢哋中環店為咗畀大家多啲選擇，更融入豬肉料理，所以店名後面加咗「Pig Pig Pork Pork」嘅縮寫「PPPP」。而且選取豬肉食材亦好似牛扒咁採用特別部位，例如用「豬羽毛」製作高質豬扒～
豬肉會用紅色碟上
一份豬羽毛開到6-8件約300g嘅豬扒
咪以為「豬羽毛」係餐廳想引人注意而改嘅名，其實係西班牙黑毛豬左右肩膊上兩塊小豬柳pluma，呢個部位範圍唔大，所以都幾珍貴，而佢嘅形狀好似羽毛，所以有「豬羽毛」呢個別名。
西班牙黑毛豬豬羽毛（$268）
豬羽毛喺炭爐燒一陣再用鐵板燒，令肉沾上「火」嘅味道，食落有油香又唔會好肥膩，軟滑有咬口，蘸少少鹽已經好夠味。而燒過嘅桃香甜又有少少果酸，一齊食可以中和豬肉嘅油分。
Just Burger（$188）
Just Burger係雙層豬肉漢堡，配自家製手打100%豬肉漢堡扒，冇加入其他肉類㗎。漢堡扒煎到微微焦香，口感彈牙；配搭蔬菜、Monterey Jack同American Cheese兩款芝士外，重有味道似蜂蜜芥末醬嘅自家製醬汁，鹹中帶甜，味道層次豐富。
是日特別版招牌平鐵牛扒（$238）
話晒呢度嘅主打菜式係牛扒，都要帶啲新意畀大家嘅。每日限量供應嘅是日特別版招牌平鐵牛扒，先慢煮4個鐘令成塊肉嘅軟嫩程度平均啲，之後再燒香表面，口感幾香軟。 另外特別自家製清甜嘅粟米汁，吊起肉嘅鹽味，感覺亦清爽啲。
USDA Prime Flat Iron配W’s秘製法式香草牛油汁 （$288），暫定供應到2月尾
另外，USDA Prime Flat Iron配W’s 秘製法式香草牛油汁，係聯乘2017年結業嘅法式牛扒屋W's Entrecôte一齊創作嘅期間限定菜式。配搭嘅「W’s秘製香草牛油汁」由W's Entrecôte主理人製作，用龍蒿、茴香、迷迭香、百里香等幾十種香草同大量牛骨熬煮，香滑又有肉香，令牛扒嘅味道更濃郁。
每個主菜依然配任食薯條
藜麥沙律配自家靚湯（$60）
雖然所有主菜都配任食薯條，但想豐富啲亦有side dishes可以揀。鍾意多啲蔬菜平衡下嘅話，藜麥沙律配自家靚湯係唔錯嘅選擇。沙律面頭加咗蟹肉，味道鮮甜；而自家靚湯每日用大量蔬菜製作，入口好順喉。
是日小食（$70）
而是日小食則有自家製蟹餅同洋蔥圈，當日出邊款就按來貨而定。其中蟹餅一件大約40g，入面嘅蟹肉餡撈咗芥末醬同洋蔥調味，鹹鹹甜甜好香口，唧埋檸檬汁就更提味。
店主特別引入波爾多列級酒莊嘅紅酒（$130/杯）
餐廳設計充滿現代感
門口攞飛重好似喺ATM撳錢
Top Blade Steak Lab VS PPPP
地址: 中環士丹利街11號Stanley 11地下
文、相：Cathy.C