近年興起手工Bagel，其中呢間網店曾經創下日賣100個嘅記錄，最近仲喺旺角開咗第一間Cafe。主打自家製低溫發酵Bagel，口感煙韌，每日都有唔同創意口味限量供應。仲有主食、甜點、咖啡等，必食招牌抹茶奶酥磅蛋糕同香濃嘅Tiramisu！
 

Bforbagel by 404 LOT FINE位於旺角豉油街，轉角嘅白色簡約小屋好易認。店主指之前喺市集擺擋，最高記錄係每日賣超過100個Bagel！Bagel餡料多元化，有約30款配搭，而家開店就每日供應兩款唔同口味，因為需要低溫發酵24小時，加上全手工製作，暫時每日只可以供應約30個堂食同外賣，想食記得早啲去！Bagel選用日本NEON高筋麵粉、韓國砂糖同嚟自法國嘅酵母製作，唔添加任何防腐劑，而且係低糖配方，希望大家品嘗到食材原味。
 

奶醬多Bagel（$38）

靈感正正嚟自茶餐廳嘅奶醬多，Bagel當中加入花生醬同煉奶，翻熱後Bagel外層香脆裡面煙韌，有嚼勁得嚟又唔會太硬，同有顆粒感嘅花生醬好夾！花生香味濃郁得嚟又唔會太甜或者太膩，當早餐或者下午茶分量啱啱好。
 

泡菜芝士Bagel（$38）

有甜食亦有鹹食口味，呢款Bagel口感一樣煙韌，但餡料換上爽口酸辣嘅泡菜，同帶牛奶甜味嘅芝士。餡料分量啱啱好，味道豐富之餘又唔會多到無咗麵包嘅咬口。
 

小山園抹茶蜂蜜奶酥磅蛋糕（$45）

網店另一熱賣就係呢款抹茶磅蛋糕，採用日本小山園若竹抹茶粉，入口茶味香醇濃厚，鮮味同回甘都非常突出，帶少少甜味。而且堂食會翻熱，表面嘅奶酥增加酥脆口感，蛋糕裡面濕潤，綿密同時又有彈性，就算唔係抹茶控都值得一試。
 

Signature Tiramisu（$65）

用高腳玻璃杯奉上，自家製芝士忌廉柔滑富芝士香，原來係店主選用Cream Cheese同Mascarpone Cheese製作，前者取其香氣，後者係要佢嘅軟滑口感。挖到中間嘅手指餅就浸滿咖啡同酒，用嘅係冧酒所以酒香都幾強烈。順帶一提，店主們無落到生雞蛋製作，希望大家可以食得更放心。
 

 

Basque Burnt Cheesecake（$45）

睇到焦黑嘅外層同中間嘅半融效果，就知道呢件Basque Burnt Cheesecake對辦喇。表面比較扎實，食得出微微焦糖化嘅香氣，裡面嘅芝士蛋糕口感非常軟滑Creamy，芝士嘅奶香同甜味平衡啱啱好。
 

404 ROLL with Kimchi, Cheese & Chicken（$78）

雖然係Cafe，但除咗甜點之外，廚師亦特別設計咗鹹食嘅主菜同小食，希望供應更多選擇。好似呢個404 ROLL其實係用酥皮包住雞蛋、泡菜、芝士同雞肉。用咗車打芝士同水牛芝士，趁熱食仲會有拉絲效果！車打芝士嘅鹹香同泡菜雞肉亦好夾，加埋酥脆嘅酥皮、炸薯格同沙律，食完一份真係幾飽肚。
 

Latte（$38）

House Blend咖啡豆係咖啡師自家炒豆，中焙保留花香同果酸味，無論係配Bagel定蛋糕都好夾！前段會飲到少少類似提子嘅酸味，然後係咖啡嘅甘香，後韻帶焦糖香。
 

Kyoto Matcha Latte（$48）

抹茶拿鐵顏色翠綠，同樣選用日本小山園若竹抹茶粉，口感厚滑而且抹茶回甘悠長。不過比起磅蛋糕，拿鐵就略為甜咗啲啲，相信平時怕抹茶會苦嘅朋友都可以試下。
 

Baileys Chocolate（$52）

顧名思義係加咗Baileys酒嘅朱古力，飲落先有朱古力嘅香味，之後嘅甜味再帶出酒香，味道平衡。朱古力方面都有講究，沖朱古力用嘅係法國Valrhona可可粉，風味醇厚。而杯邊嘅朱古力醬係用意大利70%朱古力醬再調配，增加甜香。
 

Bforbagel by 404 LOT FINE
地址：旺角豉油街10號地舖

文、相：Cathy