疫情再次爆發，政府亦推出新措施，由聽日開始連續七天下午六時至凌晨五時所有餐廳暫停堂食。非常時期，除咗要做足防疫措施外，食得健康都係強身健體同增強免疫力嘅好方法。而且仍然有唔少上班族需要返工及外出用餐，今次介紹5間適合lunchtime、主打健康餐廳畀大家，出街食都可以健康有營又好味！
主打全天然食品 漫活堂
健康唔一定淨係食菜嘅。佐敦呢間餐廳主打全天然有機食材，全部都無味精、無雞粉及無激素，主要供應素食薄餅、輕盈系列及慢煮系列。特別推薦慢煮系列嘅「漫」煮紅酒燴天然牛肋條，肉質軟腍啖啖肉。另外連炸物都係使用高質素無反式脂肪奧米加-9芥花油，可以減少低密度脂蛋白膽固醇。
圖: happyladynme、emmi
彩虹餃子 天虹養生餃子店
一間好食又好睇嘅餃子店！餐廳主打七色彩虹餃子，餃子皮採用天然蔬果汁造成，有紅色(紅菜頭)、橙色(蘿蔔)、黃色(薑黃)、綠色(菠菜)、青色(蝶豆花)、藍色(梔子)及紫色(紫薯)，每隻顏色代表唔同口味亦有唔同效用，有肉有菜夠健康，驚唔夠飽仲可以加粉麵食。
圖: xnganbx
自選健康魚生飯 Peek-A-Poke
銅鑼灣呢間餐廳就主打夏威夷風魚生飯Poke，好似車仔麵咁可以自選配料，主菜包括三文魚、吞拿魚、八爪魚及雜錦香菇，自由跟配壽司飯、珍珠糙飯、沙律菜或混搭都無問題。可以加配牛油果、海帶芽、青瓜、豆腐、番茄及鮮蟹肉等多款配料，連醬汁同調味料都有得自選！有選擇困難嘅朋友可以揀佢已經幫你定好嘅配搭㗎。
圖: 媽媽的味道 MUM 日常野菜料理
想感受日式家庭風味？佐敦位於酒店foodhall嘅餐廳主打日式野菜定食，自由選擇冷熱菜式三款或四款，有南瓜薯餅、昆布汁煮蓮藕、本菇茶杯蒸、海苔冷豆腐及柚子醋漬番茄等，跟配味噌湯、麥茶、香菇五穀雜炊飯或正氣薑黃飯，充滿媽媽的味道呀～
圖: foodie.nethk、簡飲簡食
純素多國菜 Confusion Plant based Kitchen
呢間餐廳據講係唔少上環人私藏素食小店，主打純素食品，中式，西式，日式，越南菜，印度菜同墨西哥菜都有，特別推介牛油果青醬意粉，有淡淡牛油果味，啱晒想加入Go Green大軍嘅朋友。
圖: 文: Yanica