「米」喺日本菜嚟講可以話係幾重要嘅一環，一件壽司、一碗丼飯好唔好食，同佢用嘅米有好大關係。葵芳最近就有間新開嘅日本餐廳，對米特別講究，仲首設咗部「精米機」喺舖頭，實行「當店精米」嘅理念。

呢部精米機，就係用嚟進行磨走玄米表層米糠嘅工序，將糙米打成白米，令到口感更加細軟。除咗喺米粒方面下功夫，餐廳喺食物賣相方面都花咗唔少心思，樣樣都係打卡able嘅。

好似一set兩件嘅「壽司冬甩」咁，就將飯糰整成冬甩咁嘅樣，再喺上面舖上魚生，一個以三文魚、甜蝦同帶子為主，另一個就有牛油果、松葉蟹肉、魚鬆粉等。影完相打完卡，應該從何入手？師傅建議先食有松葉蟹肉嗰嚿，因為味道相對冇咁濃喎。

另外呢兩款卷物都相當吸睛，海の櫻花卷就有好多櫻花蝦，好香口；而綠油油鰻心卷就係牛油果片包住中間嘅芝士同蒲燒鰻魚，仲有埋啲脆脆同三文魚子喺側邊，一啖有多種口感。

如果要試真啲啲精米，可以叫碗爆丼啊。唔好睇佢好似細細碗咁，飯量唔少，啲料又舖滿晒喺頂，食晒都幾飽㗎。溫泉玉子伴燒澳洲和牛肉爆丼用嘅係澳洲和牛，淋埋隻溫泉蛋落去，撈埋啲蔥花一齊食，好rich。和牛幾腍。而燒日本地雞爆丼就係用日本岩手縣嘅南部雞，雞皮燒得薄脆。

不過，舖頭最吸引嘅，可能就係葵芳一帶都比較少食到嘅鐵板燒。呢度仲有鐵板燒吧位，可以坐喺度睇「表演」呀！師傅係有超過30年經驗嘅日本鐵板燒師傅，最推介就係各款嘅鐵板海鮮同澳洲和牛厚燒。波士頓龍蝦用牛油燒香，蝦肉爽口彈牙好惹味。另外北海道帆立貝、南非鮑魚亦相當新鮮，煎香過之後更加入味。

最後介紹下呢杯嘢飲，睇落以為係抹茶鮮奶啲friend？啱一半啦。佢係抹茶米奶，即係以米奶代替牛奶，一啜啜到底，就會吸到一粒粒嘅米粒，有米香得嚟仲好有咬口，而且唔會太甜。

講多樣著數嘢你哋聽，由即日起至11月25號，每日有精選8款菜式，頭10位客人可以有1折優惠，之後40位就有半價優惠。

丸十日本食堂
地址：葵芳興芳路223號新都會廣場4樓484-487號舖

文、相、片：Kar