又有一間人氣台灣珍珠奶茶店開到嚟香港！主打黑糖珍珠，勝在黑糖香濃厚而且口感煙韌，仲可以配泰式奶茶、抹茶歐蕾、紫薯鮮奶等等。而且除咗鮮奶之外，尖沙咀店所有原材料都從台灣運到香港，保證飲到同台灣一樣嘅味道呀。
 

小黑糖嚟自台北，香港首店位於尖沙咀加拿芬道近厚福街，見到淺藍色裝修就即係搵到喇。黑糖同珍珠都係嚟自台北店，而店家風味獨特嘅秘訣係每日要將手炒黑糖磚，按秘方分別熬成黑糖珍珠同黑糖漿，熬製時間、溫度等都要注意。
 

小黑糖鮮奶珍珠（$30）

先試一杯最基本嘅鮮奶黑糖珍珠，黑糖掛杯紋唔算明顯，而飲嘅時候用飲管搞勻就得。原來係因為店家已經將黑糖珍珠熬成最理想嘅煙韌口感，唔需要靠冰將珍珠變硬。選用明治鮮奶，柔滑奶香同帶焦香嘅黑糖珍珠係無得輸嘅組合，而且奶香同黑糖味平衡。最值得稱讚嘅係珍珠非常入味又唔會過於軟腍。
 

泰好喝歐蕾珍珠（$30）

除咗鮮奶之外，呢度嘅黑糖珍珠仲可以加落唔同飲品當中，好似呢杯泰好喝歐蕾珍珠就係最受歡迎嘅配搭之一。用嘅係泰國茶葉，而且見到呢個橙色都知道係泰式口味，入口比一般原味多一重茶香，無咁容易膩。
 

紫薯於你（$30）（珍珠+$2）

而打卡之選就要數要呢杯紫薯牛奶，上面有紫薯蓉，形成天然漸層相當搶眼。紫薯蓉唔會太甜，而且食到一絲絲紫薯口感相當討喜。不過加埋黑糖珍珠就會偏甜少少，大家可以揀少糖呀。
 

 

宇治抹茶歐蕾珍珠（$32）

相反如果想飲返啲無咁甜嘅，就可以試呢杯加入日本宇治抹茶嘅抹茶歐蕾珍珠，單飲抹茶歐蕾有明顯回甘，加埋黑糖珍珠味道就啱啱好。當然如果你係抹茶控，鐘情抹茶清香嘅話，可以揀返半糖更突顯抹茶味。
 

小黑糖冬瓜鮮奶（$28）

除咗黑糖珍珠之外，其實店家嘅冬瓜系列亦係心機出品。同一般台灣冬瓜茶唔同，佢地用黑糖代替砂糖，係另一種嘅台灣古早味。所以飲落甜味亦更有層次，加上牛奶口感柔滑。
 

細心嘅你或者已經留意到，呢間店同坊間大部分黑糖珍珠飲品店唔同，係可以選擇甜度，亦可以揀少冰！當然最近天氣轉涼，大家亦可以揀熱飲暖身呀。
 

小黑糖
地址：尖沙咀加拿芬道 45-47 號宏生大廈地下D1號舖

文、相、片：Cathy