今年西營盤小店請座獲米芝蓮推介，台灣菜地位更加鞏固。尖沙咀呢一間新開冇耐嘅台式小店六両三，真係可以搵到濃濃台灣風味！門面似日式台式舊樓房，開放式廚房加埋黃燈籠，以為自己去咗當地夜市！
店主Ivan係基隆人，來港廿年，廣東話相當流利，今次係第一次開設自己嘅餐廳。Ivan話：「基隆廟口夜市係台灣小食少林寺，所以好想將當地美食帶嚟香港，而且香港好食嘅台灣菜唔多。來到呢個年紀，覺得冇一技之長，於是決定返台灣拜師學藝兩個月，實現創業夢。」
店子小小，但Ivan每一個細節都花盡功夫。鎮店之寶係兩煲牛骨湯，湯頭用10斤牛筒骨熬至少30小時，然後轉至第二個煲，加蔬菜、香料藥材等繼續用文火熬製，直至骨髓全溶化同呈現乳白色，不時要去雜質，全個過程分分鐘要60至72個鐘！
牛肉麵湯底有川味紅燒及清燉兩款，製法口味完全唔同。川味湯底要用第二煲湯，再加以四川花椒、豆辦醬、台灣豉油及藥材熬製的湯頭製作。而清燉就以第一煲湯，再混合蔬菜湯製成。真係少啲心機都唔得！湯底無味精、牛骨粉，熬製過程亦冇加清水，紅燒湯濃郁帶微辣，清燉湯則清甜。
川味紅燒牛肉麵 $68
清燉牛肉麵 $68
配料有牛肋條、牛腱同牛筋，選用美國牛肉，先炆後焗，又係至少8至10個鐘。牛肉同牛筋唔會煮到腍晒爛晒，入味之餘仍保持有咬口。
麵條則係香港麵廠依照Ivan要求製作，質感Q彈亦掛湯。Ivan教路食牛肉麵有兩件事好重要，第一係酸菜，自家浸8個鐘以上，微酸開胃，有解膩作用。另一樣就係自家提煉嘅牛骨髓辣油，加落紅燒牛肉麵之中，香氣即刻昇華晒！
滷肉飯都係招牌菜，Ivan堅持要皮脂肉相連先為之合格。用新鮮乾葱炒幾個鐘，之後將乾葱油及豉油炒新鮮五花肉至金黃色。肉粒見到脂肪及瘦肉兩層，食落不覺油膩，肉香軟滑。連拌碟的黃蘿蔔，亦是自己以山梔子染成黃色，純天然不加色素。
滷肉飯 $28 （小 $15）
其他小菜仲有午市已沽清嘅滷豬腳、豆乾、皮蛋豆腐等，遲啲仲會推出水餃。選擇唔多，但樣樣都係心機製作。
地址：尖沙咀宜昌街3號地下
文、相、片：Perrins