哈囉，一班學生哥準備開學嘅時候，一班嘩鬼都準備要出動啦~ 仲有兩個月就係哈囉喂，但9月中開始已經有得反啦~ 今年好熱鬧，Sanrio成班主角都一齊去晒海洋公園，隻隻都鬼死咁可愛，玩鬼屋之餘仲有期間限定嘅主題餐點，食到你變飽鬼！

Sanrio 主題

等開飯仔預先指點下你路啦，想一次過捕獲咁多隻Sanrio主角，就去冰極餐廳啦~有全日祭四道菜套餐：前菜係XO香脆蟹餅配藍莓沙律汁，然後就飲湯啦，放心，唔係孟婆湯，係蛋黃哥甜椒蕃茄湯，酸甜清新。主菜呢就係Hello Kitty焗海鮮南瓜飯配菠菜汁 或者Kuromi龍蝦竹炭漢堡配炸南瓜。btw，hello kitty粉要畀定心理準備，我驚你哋唔認得呀Kitty姐呀，佢化咗個恐怖南瓜骷髏妝 LOL最後，咦？墓碑？啋~ XO已經… ？rip… rest in “piece”啦，係甜品，芝麻芭菲配牛油曲奇。

係幾豐富嘅，不過總有啲爛玩鬼，想快食爭取多啲時間玩~ 咁熊貓薈嗰邊，都有個大集合便當，一次過食晒咁多個主角落肚，夠晒方便快捷啦？

再唔係，邊行邊食都有選擇！Hello Kitty炸雞漢堡同Hello Kitty爆谷都OK㗎，個大頭爆谷桶仲可以之後循環再用。

仲有，水都餅店有幾款限定甜品，馬卡龍啦、鮮果忌廉脆筒啦、忌廉熱香餅配鮮果及杏桃啦、mousse啦、新地雪糕杯啦……好鬼多嘢啊！蛋糕控可以買埋個1.5磅裝哈囉喂蛋糕添~

供應日期：2018年9月19日至11月4日

驚嚇主題

又，如果你唔係行可愛路線嘅嘩鬼，有另一set驚嚇系列嘅餐點，應該幾啱你哋。話說海洋冰室附近有間屍營醫院，咁冰室就化身成為急症室，一入到去，就會有啲喪屍醫生護士嚟招~呼~你！行過見到啲斷肢、內臟、X光片……唔使驚，等陣有得你食！

對一個初哥醫生仔嚟講，對手術盤上嘅工具可能都未太熟手，等我慢慢話你聽。針筒呢，唔係用嚟打針㗎，係用嚟「吸血」！見唔見到兜血漿呀？用針筒抽出嚟飲啦~ 甜椒蕃茄凍湯嚟。隔籬青BB嗰兜就係蘆筍凍湯。好啦，開刀做手術啦，先搞掂隻斷掌，肉食獸就揀天殘掌嗰隻啦，煙肉燒雞卷嚟，好大嚿肉，包你可以食飽上路；素食嘅就揀幽靈鬼手啦，之係焗鮮茄雜菜釀燒烤菇。咪咁快收手呀，仲要「開腦」呀！挖開啲紅菜頭蛋白，下面就係海鮮蒸蛋嚟。
至於呢啲紗布呀繃帶呀棉花呀藥水呀，通通都係超甜嘅甜品嚟，係呀，連把較剪都食得落肚㗎！仲有杯mocktail「惡魔之類」，定驚後好聲行，繼續玩啦。

供應日期：2018年9月19、23、28-29日；10月2、5-7、12-14、17-21、25-28、31日；11月3-4日
供應時間：下午1時後

文、相：Kar